Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Raduni Isa cawa jama ulun lamon rik jama jelma-jelma sai nutuk Ia,

² "Guru-guru agama rik ulun-ulun Farisi mansa kekuasaan untuk menafsirko hukum Musa.

³ Ulihni seno taati rik turutido sunyinni sai tian perintahko. Kidang dang ngelakuko api sai tian lakuko, mani tian mak ngejalanko api sai tian ajarko.

⁴ Tian nuntut hal-hal sai sulit rik ngeni atoran-atoran sai biak, kidang cutik pun tian mak nulung ulun ngejalankoni.

⁵ Sunyinni sai tian lakuko angkah untuk diliak ulun gaoh. Tian sengaja makai tali sembahyang sai berak-berak rik ngejungko rumbai-rumbai jubah tian!

⁶ Tian gering rang sai paling helau di pesta-pesta, rik kursi istimewa di lamban-lamban ibadah.

⁷ Tian senang dihormati ulun di pasar-pasar, rik diurau 'Bapak Guru'.

⁸ Kidang keti, dang haga diurau 'Bapak Guru', mani Gurumu angkah wat sai rik keti sunyinni muari.

⁹ Rik dang keti ngurau sai jelma pun di dunia inji 'Bapak', mani Bapakmu angkah sai, yakdo Bapa sai di surga.

¹⁰ Rik dang keti haga diurau 'Jelma Sai Mimpin', mani jelma sai mimpin niku angkah wat sai, yakdo Raja Penyelamat sai dijanjiko ulih Allah.

¹¹ Jelma sai paling langgar di hantara keti, harus jadi jelma sai ngelayani niku.

¹² Jelma sai ngelanggarko dirini haga direbahko, rik jelma sai ngerebahko dirini haga dilanggarko."

¹³ "Celakado keti guru-guru agama rik ulun-ulun Farisi! Keti tukang icak-icak. Keti ngehalangi ulun untuk jadi anggota umat Allah. Keti tenggalan mak haga jadi anggota umat Allah, rik ulun bareh sai haga, keti halangi!

¹⁴ [Celakado keti guru-guru agama rik ulun-ulun Farisi: Keti tukang icak-icak. Keti nipu randa-randa rik ngerampas lambanni rik untuk nyalok kejahatan ano keti bedua kejung-kejung. Udi sebabni hukuman keti kanah biak!]

¹⁵ Celakado keti guru-guru agama rik ulun-ulun Farisi! Keti tukang icak-icak! Keti mik jaoh-jaoh nyeberang lawok, rik ngejelajahi darak angkah untuk nyani sai jelma kuruk agamamu. Rik seraduni ulun udi kuruk agamamu, keti nyani ia calon neraka sai rua kali lipat lebih jahat jak keti tenggalan!

¹⁶ Celakado keti jelma-jelma sai mimpin sai buta! Keti ngajarko inji, 'Kik ulun besumpah demi Lamban Ibadah, ulun udi mak teikok jama sumpahni; kidang kik ia besumpah demi emas di delom Lamban Ibadah, ia teikok jama sumpahni ano.'

¹⁷ Keti ulun-ulun bugu sai buta! Sepa sai lebih penting; emasni, atau Lamban Ibadah sai ngejadiko emas udi suci?

¹⁸ Keti ngajarko inji juga, 'Kik sai jelma besumpah demi mezbah, ulun udi mak teikok ulih sumpahni, kidang kik ia besumpah demi persembahan di atas mezbah ano, ia teikok sumpahni udi.'

¹⁹ Hara butani keti! Sepa sai lebih penting? Persembahanni atau mezbah sai ngejadiko persembahan ano suci?

²⁰ Ulihni seno, kik sai jelma besumpah demi mezbah, udi retini ia besumpah demi mezbah, rik demi sunyinni persembahan sai wat di atasni.

²¹ Rik kik sai jelma besumpah demi Lamban Ibadah, udi retini ia besumpah demi Lamban Ibadah udi, rik demi Allah sai tinggal di dudi.

²² Rik kik sai jelma besumpah demi surga, udi retini ia besumpah demi takhta Tuhan, rik demi Allah sai mejong di takhta udi.

²³ Celakado keti guru-guru agama rik ulun-ulun Farisi! Keti tukang icak-icak. Rempah-rempah injuk selasih, adas manis, rik jintan pun, keti keni sepersepuluhni jama Tuhan. Padahal hal-hal sai paling penting delom hukum-hukum agama, injuk misalni: Keadilan, belas kesian, rik kesetiaan, mak keti hirauko. Padahal senodo sai seharusni keti lakuko, tanpa ngelalaiko sai bareh-barehni juga.

²⁴ Keti jelma-jelma sai mimpin sai buta! Lalar delom inumanmu keti saring, padahal unta keti belot!

²⁵ Celakado keti guru-guru agama rik ulun-ulun Farisi! Keti tukang icak-icak! Cumbung-cumbung rik piring-piringmu keti basuh kecah-kecah bagian luahni, padahal bagian delomni kamak nihan jama hal-hal sai keti dapok jama kekerasan rik keserakahan.

²⁶ Farisi buta! Basuhdo pai kecah-kecah bagian delom jak cumbung-cumbung rik piring-piringmu, in bagian luahni jadi kecah juga!

²⁷ Celakado keti guru-guru agama rik ulun-ulun Farisi! Keti tukang icak-icak! Keti injuk kubor sai dicat handak; di luahni keliakan helau, kidang di delomni latap jama tulan rik sunyinni sai busuk-busuk.

²⁸ Injuk reno juga keti. Jak luah keti keliakan betik jama jelma; kidang di delom, keti latap jama kepalsuan rik pelanggaran-pelanggaran."

²⁹ "Celakado keti guru-guru agama rik ulun-ulun Farisi! Keti tukang icak-icak! Keti ngebangun kuboran sai helau untuk nabi-nabi, rik ngehiasi tugu-tugu peringatan jak jelma-jelma sai hurikni betik.

³⁰ Rik keti cawa, 'Seandaini sekam hurik di zaman nenek muyang sekam tumbai, sekam mak haga nutuk jama tian ngebunuh nabi-nabi.'

³¹ Jadi keti ngaku tenggalan bahwa ketido keturunan ulun-ulun sai ngebunuh nabi-nabi!

³² Kik injuk reno, terusko rik selesaiko dusa-dusa sai radu dimulai ulih nenek muyangmu ano!

³³ Keti jahat rik keturunan ulun jahat! Repa keti dapok nyelamatko diri jak hukuman di neraka?

³⁴ Dengiko betik-betik: Nyak haga ngirim jama niku nabi-nabi, jelma-jelma bijak, rik guru-guru; sebagian jak tian haga keti bunuh, rik sebagian sai bareh haga keti salibko. Wat sai haga keti siksa di delom lamban-lamban ibadah, rik keti bedak-bedak jak sai kota mik kota sai bareh.

³⁵ Ulihni seno, keti haga dihukum mani pembunuhan sai dilakuko tehadap sunyinni jelma sai mak besalah -- mulai jak pembunuhan Habel sai mak besalah, sampai pembunuhan Zakharia anak Berekia, sai keti bunuh di hantara Lamban Ibadah rik mezbah.

³⁶ Percayado: Sunyinni ano haga ditanggung ulih jelma-jelma zaman inji!"

³⁷ "Yerusalem, Yerusalem! Nabi-nabi niku bunuh. Utusan-utusan-Ni Allah niku tayar jama batu sampai mati. Radu pira kali Nyak mirak ngerangkul sunyin pendudukmu injuk manuk ngelindungi anak-anakni di bah kepini, kidang keti mak haga!

³⁸ Ulihni seno Allah mak lagi jama-jama niku.

³⁹ Pandai mak: Mulai tano inji niku mak haga ngeliak Nyak lagi sampai niku cawa, 'Diberkatido Ia sai ratong atas gelarni Tuhan.'"

Matius

Video Matius 23

Ikuti Kami:

KONTAK | PARTISIPASI | DONASI