Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu, ojo kagananya ono mbengi, i Yesu mangansale i Petrus, i Yakobus, pasi i Yohanes to moa’i pei i Yakobus etu. Panewa i Yesu mangkeni sira togo nto’u tongku to malangan. Wali rata ndate rapa ntongku etu, ojo sira opo to ndate ria.
2 Wali tempo etu i Yesu mambali ta’aNya ri tango nu anaguruNya to togo etu. Tempo Ia mambali ta’aNya etu, lioNya mareme ewa mata nu eo, pasi pakeNya mawali buya makilo ewa reme.
3 Wali tempo etu anaguruNya sira togo re’e mangalo’a pei gete, kodi majoli re’e seja i Musa pasi i Elia to tempo owi, sira dua magombo-gombo pei i Yesu.
4 Tempo sira togo mangkita etu, i Petrus manganto’oka i Yesu, to’onya, “Pue, masanang kojo kita apa re’i rire. Ane nuporoe, aku damangika togo kandepe. Samba’a raikaka Komi, pasi samba’a raikaka i Musa, pasi samba’a wo’u raikaka i Elia.”
5 Pei tempo i Petrus tongo mpagombonya etu, tempo etu re’e limu to makilo to tudu mangangkumuti yau sira ndate rapa ntongku etu. Pasi kodi majoli sira mangandonge loo yako ri raya limu etu, loo etu manganto’o, “Si’imo anangKu. Aku mamporayang kojo Ia pasi Aku masanang kojo resi Ia. Wali padongeka kojo gomboNya.”
6 Wali ojo pangandonge nu anaguru i Yesu gombo etu sira mamo’o yau ri wawo ntana apa meka kojo raya nsira.
7 Pei i Yesu yau mampotaka sira togo pei manganto’oka sira, “Pakore! Ne’e meka.”
8 Wali tempo sira togo mantengku mbo’o mangalo’a, jamo i Yesu to nakita nsira. Tamore tau to yusa.
9 Roo see sira opo malonso muni yako ri rapa ntongku malangan etu. Tempo sira malonso etu i Yesu mamporentangika sira togo, to’oNya, “Ne’e kojo mangansaritaka sa’e mangkonong anu to nukita ngkomi etu. Tempo Aku, Wiyaa nto Lino, roomo rawangu muni yako ri kapatengKu panewa maya rasarita.
10 Wali anaguru i Yesu etu mampotanaka resi Ia, sira manganto’o, “Kami manasa komi semo Makole parajanji i mPue Allah, pei tau to mampoguru porenta i Musa manganto’o taa maya taa i Elia ma’i muni ruyu mampatiruyu pei i Makole parajanji i mPue Allah. Wali maka pei sira manganto’o ewa wetu apa re’imo Komi pei i Elia ia tawa ma’i muni?”
11 Wali i Yesu mangansono see damanasa resi sira i Yohanes to Pombaptis, ia semo to rato’oka i Elia. I Yesu manganto’o, “Monso pu’u i Elia ia matiruyu damampasilonga muni samparia.
12 Pei Aku manganto’oka komi i Elia ia roomo nama’i muni pei tau taa mangansani ia. Sira ojo mangika maja’a resi ia mangalulu pamporani to si siraja. Pasi ewa see seja damawali resi Aku, Wiyaa nto Lino, apa tamo masae Aku seja danasesai nsira.”
13 Wali ojo pangandonge nsira togo gombo i Yesu resi sira etu, panewa sira manasanya i Yohanes to Pombaptis semo to raporapaka ewa i Elia.
14 Wali yako etu i Yesu sira opo rata muni ri pu’u ntongku etu. Tempo sira rata la’u ria sira simparata pei tau boros kojo. Wali re’e samba’a tau ri oyo ntau boros etu mangampago i Yesu pei mambokotu ri tangoNya.
15 Ngkai etu manganto’o, “O Pue, porayang anangku to langkai. Masesa kojo ia apa re’e panyaki poso resi ia. Wali mandudu ngkani ia poso pei mapuka yau ri raya nu apu bara ri raya nu ue.
16 Wali aku mangkeni ia resi anagurumu pei sira taa nakurang mampakatao muni ia.”
17 Wali i Yesu mampogomboka tau boros etu Ia manganto’o, “Gete komi to tuwu ri tempo si’i! Komi taa kojo mangaya. Pasi komi pusa, taa mangalulu jaya to monso. Pei nempo masaemo Aku maroo resi komi pei komi bara tiroowa taa mangaya. Wali masusa rayangKu mampobuuka komi taa kojo mangaya Aku!” Wali yako etu i Yesu manganto’oka ngkai to masaki ananya, to’oNya, “Kenika Aku ana etu.”
18 Wali ojo pangkeni ntau ana etu resi i Yesu, Ia manganseko measa to pu’u mpanyaki etu pasi mangarubak ia. Roo see measa etu miyai muni yako ri ana etu. Wali tempo etu semo ana etu rapakatao muni. Tamo re’e panyaki poso resi ia.
19 Wali yako etu, tau boros mayoko muni, panewa tempo tamore tau to yusa, kami to anaguru i Yesu yau resi Ia pei mampotanaka resi Ia, kami manganto’o, “Kesaa sabanya naka pei kami taa mangkurang mangarubak measa resi tau etu?”
20 Wali i Yesu manganto’o, “Apa saba mayu’u pangaya ngkomi see naka taa nukurang. Pei Aku manganto’oka komi, monso pu’u nempo kodi kojo pangayamu ewa wua nsesawi to mayunu kojo, ane ewa see, komi nempo manganto’oka tongku, ‘Palimba njo’uture,’ pei tongku etu damalimba. Pasi ane ewa see, si’a ojo to etu to komi nukurang mangika, tare to taa nukurang ngkomi mangika.
21 (Pei ane measa to irubaki ngKu ngena, ane measa to ewa wetu, nempo re’e pangaya ngkomi, taa maya rarubak ane komi tawa makai-kai ruyu resi i Pue Allah pasi mangorop seja.)”
22 Wali yako etu re’e seore i Yesu pasi kami to anaguruNya siromu nja’u propinsi Galilea. Tempo etu Ia manganto’oka kami, to’oNya, “Aku, Wiyaa nto Lino, daraposora yau resi tau.
23 Panewa tau etu damampopate yau Aku, pei ri rayanya togo eo Aku darawangu muni yako ri kapatengKu.” Wali ojo pangandonge mami gomboNya etu, kami mawo kojo raya mami.
24 Wali yako etu, i Yesu pasi kami to anaguruNya yau njo’u kota Kapernaum. Ojo karata mami nja’u ria i Yesu masua ri raya banua ntau. Panewa ma’i to pantagi asele nu banua i mPue Allah pei mampotanaka resi i Petrus, sira manganto’o, “Wimba, guru ngkorom bara mangabayar asele banua i mPue Allah, bara taa?”
25 Wali i Petrus mangansono, “Ia mangabayar.” Wali roo see i Petrus masua ri raya banua damampogomboka i Yesu pei i Yesu semo to uyunya magombo, Ia manganto’o, “Wimba ane ewa pampobuuka ngkorom Petrus? Ane makole-makole ri lino si’i, to imba tau to napakasaaka nsira mangabayar asele, bara ngananya, bara tau to yusa?”
26 Wali i Petrus mangansono, to’onya, “Tau to yusa semo.” Panewa i Yesu manganto’o, “Monso pu’u, wali ane ewa see, ngananya nempo taa mangabayar taa mawei.
27 Pasi kamonsonya ewa see seja kita to ngana i Makole ngkita, i Pue Allah, nempo taa mangabayar asele banuaNya. Pei kita taa rani mampakasusa raya ntau si’i, wali see naka kita damangabayar asele etu. Wali inta njo’u rano pei mameka. Panewa oko bau to uyunya nupeka ngkorom pei woe nganganya. Nja’u raya nganga nu bau etu korom damangarata sangkomba doi to gana mangabayar asele ngkita dua. Wali oko doi etu pei inta waika sira mangabayar asele ngkita dua.” Wali i Petrus yau mangika ewa nato’oka i Yesu ia etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA