Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jahawen andau limbah te Yesus mimbit Petrus dengan Yakobus tuntang paharie Yohanes, mangejau arep ewen akan ije bukit gantong.

² Intu hila baun ewen, Yesus hobah ampie; Baue manjadi hasangkowong sama kilau matanandau tuntang pakaian Ayue baputi malinyau.

³ Limbah te katatelo murid Ayue te mite Moses dengan Elia hakotak dengan Yesus.

⁴ Palus Petrus hamauh dengan Yesus, "Tuhan mangat toto itah hong hetoh. Amon Tuhan maku, aku tau mampendeng telo huma hetoh: ije akan Tuhan, ije akan Moses, tuntang ije tinai akan Elia."

⁵ Metoh Petrus magon hakotak, maka baunandau je balawa toto mangalukop ewen tuntang bara baunandau te tarahining auh je hamauh, "Ie toh anak-Ku je inyinta-Ku. Ie manyanang atei-Ku. Hining Auh Ayue!"

⁶ Katika kare murid Yesus mahining auh te, ewen paham mikeh sampai mahingkep akan petak.

⁷ Tapi Yesus dumah tuntang manigong ewen. "Hingkat," koae, "ela mikeh!"

⁸ Katika ewen manampayah, ewen jaton mite ewe-eweh beken bara Yesus ih.

⁹ Katika ewen mohon bara bukit te, Yesus mampingat ewen, "Ela mansanan akan eweh bewei taloh je jari gitan keton nah, helo bara Anak Olon impisik bara pampatei."

¹⁰ Kare murid Yesus misek Dengae, "Mbuhen kare guru agama hamauh je Elia musti dumah labih helo?"

¹¹ Yesus tombah, "Elia puna dumah tuntang ie handak manatap kare taloh samandiai.

¹² Tapi Aku hamauh dengan keton, Elia jari dumah, tapi oloh dia mangasene ie; ewen mawi ie sakahandak ewen kabuat ih. Tuntang kalote kea ewen handak mawi Anak Olon."

¹³ Palus kare murid Ayue harati je Yesus hakotak tahiu Yohanes Pampandoi.

¹⁴ Katika Yesus dengan katatelo murid Ayue haluli manalih oloh are te, ije biti oloh hatue dumah, sontop manyembah intu taharep Yesus,

¹⁵ tuntang hamauh, "Bapa, pasi anakku. Ie haban awi inyon. Amok inyon te karas toto sampai ie kinjap toto lawo akan apui tuntang kinjap kea akan danum.

¹⁶ Aku jari kea mimbit ie akan murid Bapa, tapi ewen dia olih mampakeleh ie."

¹⁷ Yesus tombah, "Lalehan keton toh! Keton toh toto-toto oloh je layau tuntang dia percaya. Sampai hamparea Aku musti melai hinje keton tuntang sabar dengan keton? Imbit anak te akan hetoh!"

¹⁸ Palus Yesus manyoho roh papa te je huang anak te balua. Tuntang roh papa balua, palus anak te keleh hemben te kea.

¹⁹ Limbah te kare murid Yesus dumah manalih Ie marak sama arep ewen ih tuntang misek Ie, "Pa, en sababe ikei dia olih maharak roh papa te?"

²⁰ Yesus tombah, "Awi tapas kapercayan keton. Ingat! Amon ain keton aton kapercaya kahain bawak sawi, keton tau hamauh dengan bukit toh, 'Bindah akan kanih!' pasti bukit toh kareh bindah. Tuntang ije mahin jaton taloh je dia keton tau mawie!

²¹ [Tapi roh papa je macam toh, baya tau iharak hapan lakudoa tuntang puasa ih.]"

²² Metoh kare murid Yesus hapumpong hong Galilea, Yesus hamauh dengan ewen, "Dia tahi hindai, Anak Olon inyarah akan kuasan kalunen.

²³ Ie kareh impatei, tapi hong andau kateloe Ie kareh impisik." Maka kare murid Ayue paham angat kapehen ateie.

²⁴ Katika Yesus dengan kare murid Ayue sampai hong Kapernaum, kare panagih pajak Human Tuhan dumah manalih Petrus tuntang misek, "En Gurun keton mambayar pajak Human Tuhan atawa dia?"

²⁵ Petrus tombah, "Bayar!" Katika Petrus buli, Yesus labih helo misek ie, "Simon, kilen manumon tirokm? Eweh je musti mambayar bea atawa pajak akan kare raja hong kalunen toh? En rayat atawa oloh tamuei bara luar?"

²⁶ "Oloh tamuei," koan Petrus. "Amon kalote," koan Yesus, "Rayat dia perlu mambayar.

²⁷ Tapi mangat ela manjadi tantarang pangkeme kare oloh te, keleh ikau haguet akan danau uka mamisi. Duan lauk je pangkasolake ikau dinoe. Hong nyamae te ikau kareh sondau bintap duit je sukup hapa mambayar pajak itah badue. Duan duit te tuntang bayar akan ewen pajak itah akan Human Tuhan."

Matius

Video Matius 17

Ikuti Kami:

KONTAK | PARTISIPASI | DONASI