Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pangeh anem aco Yésus nenguit Pétrus, Yakub, idi kinanakneh Yahya amé' setau' luun aceh pegkung luk medita'.

² Kareb diteluh nenier Yésus, idi ayuNeh nisu' pa kiung diteluh, idi kiungNeh merasat mepad kudeng mateh aco, idi ayungNeh pana' mebuda' mepad kudeng acang teh.

³ Idi Musa Idi Elia sinier diteluh pebala dengan Yésus.

⁴ Idi Pétrus nepebala inan Yésus, "O Tuhan, do' tau tudo ieni; kudeng Tuhan pian, ui sikal mudut teluh lepo ieni; sebuleng kuanMu, sebuleng kuan Musa, idi sebuleng kuan Elia teh."

⁵ Idi uned ieh pebala, inan aceh laput luk merasat iné' ngelungung nedeh; idi inan aceh tang rat bang laput ineh luk nepebala, "Ini AnakKu luk inanKu mawa; idi Ui mawang niat Neneh; do' muyuh ninger balaNeh."

⁶ Kareb anak-anak sekola' Yésus neninger tang ineh idi ideh neluka' luun tana', idi ideh pelaba tot.

⁷ idi Yésus iné' ngakem nediteluh, keburi'Neh, "Do' meteluh tumui, aleg matot."

⁸ Idi diteluh netengook idi na nenier seburur lemulun baken, iamo' Yésus sebuleng.

⁹ Idi laba' ideh temurun rat luun pegkung ineh, Yésus neperiteteng nediteluh, keburi'Neh, "Aleg mada' luk sinier meteluh kuan seburur lemulun pana', pad Anak-Lemulun pangeh tumui rat arang lun naté."

¹⁰ Idi anak-anak sekola'Neh nengitun Yésus, keburi' diteluh, "Ngudehké guru-guru Ukum pebala, na miak na Elia macing atun?"

¹¹ Idi kebala Yésus, "Matu, Elia macing atun, pad nganau' temina'.

¹² Iamo' Ui pebala nemeteluh, Elia pangeh nacing idi ideh na miti neneh, iamo' ideh pangeh nenganau' kuanneh anun-anun luk piandeh sebuleng. Kudeng ineh teh Anak-Lemulun uendeh ngedereh."

¹³ Idi diteluh ineh nekali' Ieh pebala ratnan Yahya luk Ngerereb.

¹⁴ Idi kareb ideh nacing nelun mula', inan aceh lemulun iné' idi netekeradung Neneh, keburi neh,

¹⁵ "O Tuhan, do' Iko méi' kuan anakku luk deléi. Ngaceku ieh mét meruai, idi ieh pelaba dereh, ngaceku ieh megéi' meluka' bang apui idi bang abpa' pana'.

¹⁶ Ui nenguit neneh amé' matun anak-anak sekola'Mu, idi na ideh miak ngedo' neneh."

¹⁷ Kebala Yésus, "O inul luk na manu idi luk neraruh ini, tuda' ioké Ui tudo dengan muyuh? Tuda' ioké Ui mekadang niat nemuyuh? Do' nguit neneh amé' Negku."

¹⁸ Idi Yésus nengecuk ada' ineh buro, idi ada' ineh neremuat, pad anak ineh petacu do'.

¹⁹ Idi anak-anak sekola' ineh iné' lulem matun Yésus idi keburi'deh, "Ngudehké ada' ineh na metala' kai?"

²⁰ Idi kebala Yésus nedeh, "Ngaceku muyuh na petap anu. Ngerawé do'-do', kudeng anu muyuh kirayeh aceh ngilung sesawi' pana', miak mo' muyuh pebala kuan pegkung ini, 'Mubuh iko rat tungé' idi amé' déi',' idi kali' rungen ieh mubuh peh; idi na luk idi anun-anun luk na miak ruen muyuh.

²¹ Iamo' ada' luk kudeng ini na miak ruaten dengan anun-anun, iamo' dengan sembayang idi mawa' mo'."

²² Kareb amung anak sekola' ineh nepamung déi' Galilia, idi Yésus nepebala nedeh, "Anak-Lemulun miak barén bang palad lemulun.

²³ Idi ideh sikal ngaté Neneh; idi aco luk keteluh Ieh miak tuyen teh." Idi ideh pelaba dat niat.

²⁴ Kareb ideh nacing Kapernaum, idi lemulun luk ngamung usin pupuk luk kinula'neh limeh ngepulu' sin iné' ni Pétrus, keburi'deh, "Naké Gurumu mayar limeh ngepulu' sin pupuk?"

²⁵ Idi keburi' Pétrus, "Mayar!" Kareb Pétrus nesemuet bang ruma', Yésus nengitun neneh atun, kebalaNeh, "Kudeng apehké terawému, Simun? Ratnan idéké amung raca' tana' ini nengalap acam idi usin pupukdeh? Ratnan anak itindehké, kian ratnan lun sakai lek?"

²⁶ Idi keburi' Pétrus Neneh, Rat nelun sakai." Idi kebala Yésus neneh, "Ngaceku ineh anak-anakneh na mayar ineh.

²⁷ Iamo' pad tau na ngesabeng nedeh, amé' iko tangeb takung, idi ngeluit idi ngalap lawid luk pun-pun lupung; idi kareb iko ngukab tangneh, bang tangneh miak iko kali' sebalad pirak, ieh ineh aceh rigit. Lapenmu balad pirak ineh idi maré ineh ku pupukKu idi pupukmu pana'."

Matius

Video Matius 17

Ikuti Kami:

KONTAK | PARTISIPASI | DONASI