Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Basa faik nee dale na, boema Yesus leleko Petrus ma Yakobis no tolanoon Yohanis, de leu leo lete madema esa lain leu.

² Ala losa lete ka poi na boema Yesus mata-panan nasafali; mata-panan nangale'do sama leo le'do a, ma papake-ngganggaon fula mangadilak.

³ Basa boema ana mana tunga katelu nala, lita Musa ma Elia kokolak lo Yesus.

⁴ Boema Petrus nafa'da Yesus nae, "Lamatuak, ita leo nai mamanak ia soona mana'a hiik. Hu ndia de, metema Lamatua ka nau soona, au tao a lalaak telu mai ia: fo Lamatua ka soa esa, Musa soa esa, ma Elia soa esa."

⁵ Petrus bei kola-kola te, ko'a fulak bubuak esa fula elu-elu ana poti nalas, ma hala ka nananamanemek neme ko'as ndia dalek mai nae, "Ia nde Au ana susue nga. Nandaa no Au dale nga. Mamanene neun!"

⁶ Lelek fo Yesus ana mana tunga nala lamanene halak ndia, boema ala bii lanseli, de nalosa ala tu'u latotono kala leu dae.

⁷ Tehu Yesus mai de Ana koi la'es boema nafa'das nae, "Fo'a leona, boso bii!"

⁸ Lelek ala fo'a de ala mete neu te, ta lita hataholi esa boen, ka'da Yesus mesa kana nai ndia.

⁹ Lelek fo ala kona leme letek lain mai, boema Yesus pa'da kasa nae, "Boso mafa'da na'kasa emi mita manda'dik ndia, neu hataholi esa boen, metema Ana Hataholi ka, Ana beita naso'da falik neme mamate sa mai fa."

¹⁰ Boema ana mana tunga nala latanen lae, "Tao le'e de, mese agama la lafa'da lae, Elia muse mai nakahuluk?"

¹¹ Yesus nataa nae, "Memak Elia mai fo ana tao matalolole basa hata lala'ena.

¹² Tehu Au afa'da neu emi, te Elia mai so, tehu hataholi la ta lalela kana fa; ala taon tunga ka'da sila dale hihii-nanau nala. Ma neukose, ala tao Ana Hataholi ka leondiak boe."

¹³ Boema ana mana tunga nala bubuluk lae, Yesus kokolak Yohanis Mana Salani ka nde ndia.

¹⁴ Lelek Yesus ma ana mana tunga katelu nala, fali leo hataholi makadotok sila la leu boema, touk esa mai de, ana senek neu Yesus mata na,

¹⁵ de nafa'dan nae, "Ama, fali ma au ana nga dei. Au anang ndia, kamulu bi'ik. He'di mulu bi'ik ndia, mangalau hiik, de nalosak ana tao na au ana nga nasi'a ana tu'da leo ha'i dale, ma oe dale neu boe.

¹⁶ Au o hain neme Ama ana mana tunga nala neu so, tehu ala ta tao lahai fan."

¹⁷ Boema Yesus naen nae, "Emi ia anseli! Tete'e ka, nanoli doak emi ia, ma emi ta mamahele fa. Au muse leo-apalasa o emi losa fai hi'da, ma Au ta haelai amanasa soaneu emi? Mo ni'i ana ndia, leo ia mai!"

¹⁸ Boema Yesus paleta dula dale mangalauk manai ni'iana ndia dale ka de ana kalua. Dula dale mangalauk ndia ana kalua boema ni'iana ndia, ana hai hate matak ndia boe.

¹⁹ Basa boema ana mana tunga nala mai de latanen lae, "Ama, te tao le'e de, ami ta hapu usiheni dula dale mangalauk ndia fa?"

²⁰ Boema Yesus nafa'das nae, "Hu ka nde emi namahehele ma beita dai fa. Mafandendelek! Metema emi namahehele ma leomae anak nanseli, tehu emi hapu mafa'da pupukuk ia mae, 'Keko leo eli muu!' soona tao leo bee o neukose ana keko. Ta hapu hata esa boen, fo emi ta hapu tao mala fan!

²¹ Tehu dula dale mangalau matak leo ia ka, emi hapu usihenin, ka'da ninik hule-haladoi ka, ma oka ao ka mesan."

²² Lelek fo Yesus no ana mana tunga nala lakabubua leme Galilea, boema Yesus nafa'das nae, "Ta doo ka so'on te, neukose Ana Hataholi ka, nanafek leo hataholi daebafa ka koasan dale neu.

²³ Neukose ala taolisan, tehu neu fai katelu na naso'da falik." Boema ana mana tunga nala dale nala he'dis nanseli.

²⁴ Lelek fo Yesus no ana mana tunga nala losa Kapernaum boema mana susu bea manai Manetualain uma na, ala mai de latane Petrus lae, "O mese ma, ana bae Manetualain Uma na bea na do ta?"

²⁵ Boema Petrus nae, "Ana bae!" Lelek Petrus fali ma'in boema, Yesus nabenga nakahulu kana nae, "Simon, o hahapu ma leo beek? See ka nde muse bae bea neu mane daebafak ia la? Lau nala, do hataholi mana mai kala?

²⁶ Boema Petrus nae, "Hataholi mana mai la," Yesus nae, "Metema leondiak soona, ta paluu lau nala bae fa.

²⁷ Tehu ita boso tao takahehe'dik hataholi sila dale nala. Da'di muu leo dano dale muu, fo dolu i'ak. Basa soona, ho'i ma o dolu ma i'a makasososa ka, fo hea bafa na te, neukose o mita doi ka nai bafan dale nai ndia, soona ho'i man te doik ndia dai ita dua bea na so. Ho'i ma doik ndia fo muu bae ita dua bea na soaneu Manetualain Uma na."

Matius

Video Matius 17

Ikuti Kami:

KONTAK | PARTISIPASI | DONASI