Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anam ari sasudah tu Isa Almasih mambawok si Petrus, si Yakobus sarato jo karek-annyo si Yahya, payi ma asiangkan diri ka sabuwah gunuang nan tinggi.

² Di adok-an urang nan batigo tu, Isa Almasih barubah rono muko-Nyo: Muko-Nyo manjadi tarang bakcando matoari, jubah-Nyo manjadi putiah bakilauan.

³ Sasudah tu katigo urang pangikuik-Nyo tu, manampak Nabi Musa jo Nabi Elia sadang mangecek jo Isa Almasih.

⁴ Si Petrus bakato kabake Baliau, "Tuhan, lamak bana parasaan kito disiko. Jikok Tuhan layi satuju, ambo ka managakkan tigo buwah kemah disiko: ciyek untuak Tuhan, ciyek untuak Nabi Musa, nan ciyek lai untuak Nabi Elia."

⁵ Samantaro si Petrus sadang mangecek, tibolah awan nan sangaik tarang marawok-inyo kasodonyo, dari dalam awan tu tadanga suwaro nan mangatokan, "Ikolah Anak-Den nan Den kasiahi. Inyo nan manyanangkan ati-Den. Iyokanlah sagalo kato-kato-Nyo!"

⁶ Kutiko pangikuik-pangikuik Isa Almasih mandangakan suwaro nan bakcando itu, inyo bi tabik takuik, sainggo bi tasungkua ka tanah.

⁷ Mako tibolah Isa Almasih sambia ma awai pungguang pangikuik-Nyo tu. "Bi tagaklah," kecek Baliau, "jan takuik!"

⁸ Dikutiko pangikuik-Nyo tu bi mancaliak, indak surang juwo doh urang lain nan nampak dek inyo, salain daripado Isa Almasih.

⁹ Dikutiko urang-urang tu bi turun dari gunuang, mako Isa Almasih mamparingekkan pangikuik-Nyo tu, "Jan dicuritokan ka siya-siyanyo apo nan lah angku-angku caliak cako, sabalun Anak Manusia di iduikkan baliak sasudah mati."

¹⁰ Pangikuik-pangikuik Isa Almasih bi batanyo ka Baliau, "Baa mangko guru-guru agamo Yahudi bi mangatokan, baraso Nabi Elia musti tibo labiah dawulu?"

¹¹ Isa Almasih manjawab, "Batua tu apo nan dikatokan dek guru-guru agamo tu, Nabi Elia tibo labiah dawulu, inyo nan ka manyegehi sagalo sasuatu.

¹² Tapi nak Ambo katokan banalah ka angku-angku, Nabi Elia lah tibo, tapi urang-urang tu indak tawu jo inyo; urang-urang tu mampabuwek Nabi Elia sakandak atinyo sajo. Sarupo itu pulolah nan ka dipabuwek dek urang-urang tu kabake Anak Manusia."

¹³ Barulah mangarati pangikuik-pangikuik Isa Almasih, baraso Baliau mancuritokan tantang Nabi Yahya Pambaptis.

¹⁴ Kutiko Isa Almasih sarato jo katigo pangikuik-Nyo, babaliak ka tampaik urang nan banyak, tibolah surang laki-laki, sujuik di adok-an Baliau,

¹⁵ inyo bakato, "Angku, tolonglah, iboilah anak ambo. Anak ambo tu disawan. Panyakik sawannyo tu sabana barek, sainggo acok bana inyo jatuah masuak api, acok pulo jatuah masuak ayie.

¹⁶ Ambo lah mambawok anak ambo tu kabake pangikuik-pangikuik Angku, tapi indak bisa doh pangikuik Angku mancegakkannyo."

¹⁷ Isa Almasih manjawab, "Angku-angku iyo sabana indak bakailieran! Angku-angku iyo sabana urang nan indak mangarajokan suruah, samo jo urang nan indak ba iman. Sampai pabilo andaknyo Ambo musti sapayi jo angku-angku, sampai pabilo Ambo musti basaba jo angku-angku? Bawoklah paja tu kamari!"

¹⁸ Sudah tu, Isa Almasih mamarentahkan roh jahek nan di dalam diri paja tu, supayo kaluwa. Roh jahek tu pun kaluwa, mako cegaklah paja tu sakutiko tu juwo.

¹⁹ Indak lamo sasudah tu pangikuik-pangikuik Isa Almasih bi tibo ka Baliau untuak bi batanyo, tapi agak tajarak dari urang nan banyak, "Ngku, apo sababnyo mangko kami indak bisa ma usie roh jahek tu?"

²⁰ Isa Almasih manjawab, "Dek karano angku-angku kurang picayo. Kana-ilah apo nan Ambo katokan ko! Jikok santano angku-angku layi ba iman agak sagadang bijo sasawi, mako angku-angku bisa mangecek kabake bukik ko, 'Pindahlah ka tampaik nan lain!' mako bukik ko pun pindah. Indak ciyek juwo doh nan indak bisa angku-angku karajokan!

²¹ [Tapi roh jahek nan sarupo iko, hanyo bisa di usie jo sacaro badowa, sarato jo bapuwaso.]"

²² Kutiko pangikuik-pangikuik Isa Almasih bakumpua di Galilea, mako Baliau mangecek kabake pangikuik-Nyo tu, "Indak ka lamo lai, Anak Manusia ka disarahkan ka dalam kuwaso manusia.

²³ Inyo ka dibunuah, tapi di ari nan katigo Inyo ka di iduikkan baliak." Dek mandangakan kecek Isa Almasih tu, sangaik sadiahnyo ati pangikuik-pangikuik-Nyo.

²⁴ Kutiko Isa Almasih sarato jo pangikuik-pangikuik-Nyo sampai di Kapernaum, mako tibolah tukang mintak pajak Rumah Tuhan, batanyo ka si Petrus, "Layikoh sato Guru angkau mambayie pajak Rumah Tuhan, layi atau indak?"

²⁵ Si Petrus manjawab, "Layilah, baa ka indak pulo!" Kutiko si Petrus ka pulang, Isa Almasih labiah dawulu manyapo inyo, "Simon, baa pandapek angkau? Siya nan musti mambayie beo atau pajak kabake rajo-rajo dunia ko? Rakyaik atau urang asiang?"

²⁶ "Urang asiang," kecek si Petrus. Isa Almasih bakato, "Jikok baitu, rakyaik indak paralu doh tu mambayie.

²⁷ Tapi janlah kito manyingguang parasaan urang-urang tu. Jadi, kiniko payilah mamapeh ka danau. Sudah tu ambiaklah ikan nan partamu dapek. Mako di dalam muncuang ikan tu, ka basuwo dek angkau pitih nan sacukuiknyo, untuak pambayie pajak kito baduwo. Ambiaklah pitih tu, bayielah pajak kito untuak Rumah Tuhan kabake urang-urang tu."

Matius

Video Matius 17

Ikuti Kami:

KONTAK | PARTISIPASI | DONASI