Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Enem jelo sesampun nike, Deside Isa gadingang Petrus, Yakub dait Yahya semetonne Yakub, taẽk ojok sopoq gunung saq atas. Cume ie pade saq araq lẽq derike.

² Beterus Deside Isa begentiq rue lẽq julun ie pade. Penjarupan-Ne jari menah maraq sinar jelo dait kuace-Ne jari putẽq becahaye.

³ Selung-selung ie pade serioq Musa dait Elia lẽq derike kenyeke bebaos kance Deside Isa.

⁴ Petrus matur lẽq Deside Isa, "Junjungan Saq Mulie, maiq gati ite lẽq deriki, lamun Pelungguh kayun, gen tiang penganjeng telu kẽmah lẽq deriki: Sopoq umaq Pelungguh, sopoqne umaq Musa dait sopoqne malik umaq Elia."

⁵ Lẽq waktu Petrus kenyeke matur, turun awan saq becahaye lẽq atas ie pade dait lẽman awan nike kedengahan suare saq ngeraos maraq niki, "Niki Bije Tiang saq Tiang kasihin. Ie nyenengang Tiang. Pade dengahang Ie!"

⁶ Sewaktu pengiring-pengiring Deside Isa dengah suare nike, ie pade takut gati jangke nyungkur ojok tanaq.

⁷ Beterus Deside Isa rauh dait kintur ie pade sambil bemanik, "Pade ures, ndaq takut!"

⁸ Sewaktu ie pade ures, ie pade ndẽq serioq sai-sai kecuali Deside Isa.

⁹ Waktu ie pade turun lẽman gunung nike, ie pade teperinget siq Deside Isa, "Ndaq tuturang sai juaq napi saq baruq side pade serioq nike, sendẽqman dateng waktune Bije Manusie teidupang malik lẽman ninggal-Ne."

¹⁰ Beterus pengiring-pengiring Deside Isa metakẽn lẽq Ie, "Kembẽq ahli-ahli Taurat bebase bahwe Elia gen dateng juluan?"

¹¹ Jawab Deside Isa, "Mule tetu Elia gen dateng dait ie gen siepang selapuqne.

¹² Laguq Tiang badaq side: Setetune Elia sampun dateng laguq dengan-dengan ndẽq kenal ie. Elia saq dateng nike teperlakuang semẽlẽ angen ie pade. Dait maraq nike ẽndah ie pade gen perlakuang Bije Manusie."

¹³ Beterus pengiring-pengiring-Ne ngerti bahwe Deside Isa bebaos mengenai Yahya Pembaptis.

¹⁴ Sewaktu Deside Isa dait ketelu pengiring-Ne tulak ojok dengan luwẽq nike, sopoq dengan mame parek, sujut lẽq arepan Deside Isa,

¹⁵ dait matur, "Junjungan Saq Mulie, periakang anak tiang. Ie sakit mopok, dait menderite gati sehingge ie rimpes geriq ojok dalem api dait rimpes ẽndah ojok dalem aiq.

¹⁶ Tiang sampun jauq ie ojok pengiring-pengiring Pelungguh, laguq ie pade ndẽq tao nyelahang ie."

¹⁷ Jawab Deside Isa, "Luar biase side pade niki! Side pade tetu-tetu dengan-dengan saq ndẽq percaye dait sesat! Jangke piran Tiang harus araq kance side pade dait tetep sabar tipaq side pade? Jauq kanak nike ojok deriki!"

¹⁸ Sesampun kanak nike tejauq, Deside Isa prẽntahang sẽtan saq araq lẽq dalem kanak nike adẽqne sugul. Dait sẽtan nike sugul, beterus kanak nike langsung selah.

¹⁹ Sesampun nike, pengiring-pengiring Deside Isa secare husus parek dait metakẽn, "Kembẽq tiang pade ndẽq bau sediq sẽtan nike?"

²⁰ Jawab Deside Isa, "Sẽngaq side pade kurang percaye. Keranaq nike Tiang badaq side: Lamun side pade bedowẽ iman belẽqne maraq tolang sawi, make side pade bau bebase lẽq gunung niki, 'Ngalih ojok to!' pasti gunung niki gen ngalih. Ndẽq araq sopoq juaq saq ndẽq bau side pade piaq!

²¹ [Laguq roh jahat saq maraq niki cume bau tesediq siq do'e dait puase doang.]"

²² Sewaktu pengiring-pengiring Deside Isa bekumpul lẽq Galilea, Deside Isa bemanik tipaq pengiring-pengiring-Ne, "Bije Manusie gen teserahang tipaq kuase manusie.

²³ Ie gen tematẽq. Laguq lẽq jelo saq ketelu, Ie gen teidupang." Make pengiring-pengiring-Ne jari asẽq gati.

²⁴ Sewaktu Deside Isa dait pengiring-pengiring-Ne rauh lẽq Kapernaum, penagih-penagih pajek Gedẽng Allah dateng tipaq Petrus dait beketuan, "Gurunde bayah pajek Gedẽng Allah atao ndẽq?"

²⁵ Jawab Petrus, "Bayah!" Sewaktu Petrus ulẽq, ie teketuan juluan siq Deside Isa, "Simon, berembẽ menurut pendapet side? Sai saq harus bayah pajek tipaq raje-raje lẽq dunie niki? Rakyatne atao dengan pendateng?"

²⁶ "Dengan pendateng," jawab Petrus. "Lamun maraq nike," manik Deside Isa, "rakyat ndẽq perlu bayah.

²⁷ Laguq ndaq ite singgung perasaan dengan-dengan nike. Jari, silaq lumbar mancing ojok danao. Bait empaq saq penembẽq side bau. Lẽq dalem biwih empaq nike side gen ndait kẽpẽng logam saq cukup tekadu bayah pajekte kance due. Bait kẽpẽng nike dait bayah pajekte lẽq ie pade."

Matius

Video Matius 17

Ikuti Kami:

KONTAK | PARTISIPASI | DONASI