Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Annan allona mangkanna joo, nasolanmi Puang Isa to Petrus, Yakub sola Yahya sile'tona, namale messarak de' buntu majao.

² Ia tonna ratumo de', nakitami to Puang Isa balik rupan-Na. Ia to rupan-Na susi allo mangngarrang na ia to pakean-Na memmabuccang cumbia'-bia'.

³ Nakita toomi to Nabi Musa sola Nabi Elia sipangkada-kada sola Puang Isa.

⁴ Nakuamo Petrus, "Oo Puang, masannangki' ntee. Ia ke takabudai la ngkabua'na' tallu bola-bola, mesa' tanii, mesa' nanii Nabi Musa, na mesa' nanii Nabi Elia."

⁵ Ia tonna mangkada unapa Petrus, ratumi to saleu' macorrang mbombonnii sola ngasan na den gamara nasa'ding lan mai nakua, "Iamo tee to Anak kupakamoja' to mpamasannangna'. Pesa'dingngii!"

⁶ Silajatanmi sola tallu joo anak gurun-Na Puang Isa tonna sa'dingngi to gamara, namessuju' do' litak.

⁷ Apa nakandoppi'i Puang Isa nakaka'i, nakuanni, "Jenjen kamu', danggi' mimalaja'!"

⁸ Ia tonna mengkitamo, te'da bangmo tau laen nakita saliwanna Puang Isa mandamo.

⁹ Ia tonna solohmo jao mai buntu, napakainga'mi Puang Isa nakua, "Ia ke dipatuo pole'mo' jio mai kamatean tee Aku', Anak Mentolino, mane'ri wa'ding mipauan tau to apa mangka mikita."

¹⁰ Mekutanami to anak gurun-Na nakua, "Matumbai pale' nakua to guru agama, kumua la ratui jolo to Nabi Elia?"

¹¹ Mebalimi nakua, "Tongan, la ratui to Nabi Elia, la mpasadia ngasanni.

¹² Apa sitonganna kukuan kamu': Ratumi ia to Nabi Elia, apa nasakka' gaukki bangngi tau, sanga te'da naissenni. Susi toomi to la nagaukanna' tee Aku', Anak Mentolino."

¹³ Napahang anak gurun-Na kumua Nabi Yahya to nasanga Puang Isa.

¹⁴ Ia tonna polemo Puang Isa sola to tallu anak gurun-Na lako to nanii tobuda, den muane ngkandoppi'i, namengguntu' suju' jio olo-Na,

¹⁵ nakua, "Oo Puang, takamaseii dikka' joo anakkaku'. Nakannai saki ta'ta', naliwa' maparri'na. Pembudamo melolin tama api ba'tu do' wai.

¹⁶ Mangkamo kusolan lako anak gurun-Ta', apa te'da nakullei mpamalagahhi."

¹⁷ Mebalimi nakua, "Takkaliwa' ngasan kamu' tee! Tangmatappa' sola sala lalan to tau too allo! Piranpara masainna la kunii torro, to la minii mpa'dikki penawang-Ku'. Bawai mai tuu pea."

¹⁸ Nagarra'i Puang Isa joo setang namessun lan mai joo pea. Messunmi, nata'pa malagah silalona joo pea.

¹⁹ Ia tonna Puang Isa mandamo sola anak gurun-Na, mane'ri nakandoppi' anna mekutana nakua, "Oo Puang, ciapari na te'da kikullei nnula'ii joo setang?"

²⁰ Mebalimi nakua, "Malammai to kamatapparanmi. La miingaran tee kadang-Ku' kumua, ia ke denni kamatapparanmi moi pada bangra lise' sawi, wa'ding kamu' kumua lako tee buntu, 'Tiangka'ko lako ntuu joo', nang la tiangka' ia. Te'da to apa tanglamikulle mipugauk.

²¹ [Apa ia manda to passambajang sola puasa wa'ding nnula'i to setang susi joo.]"

²² Ia tonna sirempunmo Puang Isa sola anak gurun-Na jio tana Galilea, nakuamo Puang Isa lako, "Te'damo namasai ia tee Aku', Anak Mentolino, kuladipangben lako kuasanna tolino.

²³ La dibunona', apa allo mangpentallun la dipatuo pole'na' jio mai kamatean." Masussami penawanna to anak gurun-Na sola ngasan.

²⁴ Ia tonna ratumo re' Kapernaum Puang Isa sola anak gurun-Na, ratumi to ba'tu pira-pira tomangrempun sima la dipatama Bola Puang Allataala namekutana lako Petrus nakua, "Nabajah unaraka gurummu to sima dipatama Bola Puang Allataala?"

²⁵ Mebalimi Petrus nakua, "Tantu nabajah." Ia tonna polemo lako bola, napajoloimi Puang Isa ngkutanaii to Petrus nakua, "Simon, umbo nakua pahangmu? Indara to parallu mbajah sima sola sassung lako raja lan lino? Topangtondokanraka ba'tu tomentamaraka tondok?"

²⁶ Mebalimi Petrus nakua, "Tomentama tondok." Nakuamo Puang Isa, "Ia ke susii joo, te'da naparallu to pangtondokan mbajah sima.

²⁷ Apa dikua danggi' namabirih tee mai tau, malemoko mamekan lako randan tasik. Ia to bale bungah muala den doi' lan anga'na, alai tapamajaranni sola dua tama Bola Puang Allataala."

Matius

Video Matius 17

Ikuti Kami:

KONTAK | PARTISIPASI | DONASI