Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Õnõ ngaluo aefa da'õ I'ohe Wetero, Yakobo ba Yohane si fatalifusõ andrõ Yesu numalõ yaw̃a ba hili salaw̃a. Ha ya'ira zi so ba da'õ.
2 I'anema'õ tobali nga'eu Yesu fõnara, muhaga mbawa-Nia hulõ haga luo, ba nukha-Nia no takile.
3 Aefa da'õ ba la'ila ira nifahaõ si datõlu andrõ Moze ba Elia, fahuohuo ira khõ Yesu.
4 Imane Fetero khõ Yesu, "He So'aya, wa'asõkhi nahia da'e. Na omasi Ndra'ugõ, da ufasindro tõlu nose ba da'e; sambua khõ-U, sambua khõ Moze ba sambua khõ Gelia."
5 Me fahuhuo na Wetero, ifasui ira lawuo si haga sibai. Ba moroi ba lawuo andrõ terongo li sanguma'õ, "Ya'e nono-Gu ni'omasi'õ-Gu. Wa'omasi-Gu Ia. Mifondrondrongo li-Nia!"
6 Me larongo li andrõ ira nifahaõ Yesu, ata'u sibai ira irege tegaõlõ tou ba danõ.
7 Mõi Yesu wanufa ya'ira, "Mifaoso, bõi mi'ata'ufi!"
8 Me lafakhõlõ ira, ba lõ hadia ni'ilara niha, baero Yesu.
9 Me mõi ira tou moroi ba hili, Ifangelama ira Yesu, "Bõi la'ombakha'õ gofu ha'õkhõ hadia ia zi no la'ila andrõ, fatua lõ te'orifi mangawuli Nono Niha moroi ba wa'amate."
10 Ba lasofu khõ Yesu ira nifahaõ-Nia, "Hana wa law̃a'õ ira sangila amakhoita wa ofõna tohare Gelia?"
11 Itema lira Yesu, "Ofõna tohare Gelia ba wama'anõ fefu hadia ia.
12 Uw̃a'õ khõmi, no tohare Gelia, ba lõ niha sangila ya'ia; lalau khõnia zomasi dõdõra. Ba si manõ gõi nilaura ba Nono Niha andrõ."
13 Ba gafuriata awena aboto ba dõdõ ndra nifahaõ Yesu wa huhuo Yesu andrõ manandrõsa khõ Yohane Samayagõ Idanõ.
14 Me mangawuli ira awõ niha sato andrõ, ba tohare samõsa ndra matua, mangalulu fõna Yesu.
15 Imane, "He Ama, hakhõsi tõdõ nonogu. Mofõkhõ faniri ia. Wa'abõlõbõlõ wanirinia irege asese aekhu ia ba galitõ ba ba nidanõ.
16 No u'ohe ia khõ ndra nifaha'õ-U ba tebai lafadõhõ ia."
17 Itema li Yesu, "Fondrege ami andre! Duhuduhu wa niha si fahole ami ba lõ famati. Hawa'ara tõ nasa torõi Ndra'o khõmi? Hawa'ara tõ nasa Ubologõ dõdõ-Gu khõmi? Mi'ohe nono andrõ ba da'e!"
18 Awena Ifofanõ wa'abõlõ zi lõ sõkhi andrõ Yesu moroi khõ nono andrõ. Ba me aheta wa'abõlõ zi lõ sõkhi da'õ, i'anema'õ dõhõ wõkhõ nono andrõ.
19 Aefa da'õ la'ondrasi Yesu ira nifahaõ-Nia, ba zi lõ nihaniha lasofu khõ-Nia, "He Ama, hadia mbõrõ wa tebai mafofanõ wa'abõlõ zi lõ sõkhi andrõ?"
20 Itema li Yesu, "Bõrõ wa'ambõ famatimi. Mitõngõni! Na so khõmi wamati si mane fa'ebua danõmõ geu saw̃i, tola miw̃a'õ ba hili andre, 'Fawu'a'õ moroi ba da'e ba ae'e ba da'õ!' Lõ tola lõ'õ ifawu'a ia hili andrõ. Lõ hadõi si tebai milau!
21 [Ba fa'abõlõ zi lõ sõkhi si mane da'e, awai tola mufofanõ ia ha faoma fangandrõ ba fuasõ.]"
22 Me owulo nifahaõ Yesu ba Galilea. Imane khõra Yesu, "Lõ ara tõ ba labe'e ba danga niha Nono Niha andrõ.
23 Labunu Ia, ba hiza ba ngaluo si tõlu tefuli tesusugi Ia." Tobali abu sibai dõdõ ndra nifahaõ-Nia.
24 Me larugi Gafana'uma ira Yesu awõ ndra nifahaõ-Nia, ba la'ondrasi Wetero ira sangozara be'elõ ba Nomo Zo'aya, lasofu khõnia, "Hadia ibu'a gõi mbe'elõ ba Nomo Zo'aya Gurumi andrõ ma lõ'õ?"
25 Itema li Fetero, "Ibu'a!" Me mangawuli Wetero fatua lõ iw̃a'õ hadia ia, Isofu khõnia Yesu, "He Simoni, hewisa wangerangerau? Haniha zombu'a be'elõ khõ Razo ba gulidanõ andre? Hadia, ono mbanua ba ma niha si fatewu?"
26 Itema li Fetero, "Niha si fatewu." Imane Yesu, "Na si manõ, lõ moguna labu'a ono mbanua.
27 Ba hiza, bõi tabaosi dõdõ niha andrõ. Ae'e ba mbaw̃a ba wogaini i'a. Ba halõ gi'a si fõfõna õgaini. Bakha ba mbawa gi'a andrõ õsõndra gefe, sobõnõ famu'a mbe'elõda darua ita. Halõ gefe andrõ ba bu'a mbe'elõda sanandrõsa ba Nomo Zo'aya."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA