Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma moi ge'ena 'o Yesus 'awi do-domoteke yamogiooko de modidi wakitoomu. Ge'enaka de wakikula 'o guata ma ngale yoginiiki 'o ngomasa ma do-dorou de yosi'aiki 'o panyake de 'o roese ma bolohi 'i'ini-'inioka.

² 'O su-suloko yamogiooko de modidi go'ona manga ronga-ronga konee: Ma di-disiraka, 'o Simon gee wisironga mita 'o Petrus, de ma dodoto 'o Andreas, ge'enaka de 'o Yakobus de ma dodoto 'o Yohanes, ge'ena la 'o Zebedeus wi ngowa-ngowaka.

³ Ge'enaka de 'o Filipus de 'o Bartolomeus, 'o Tomas, de 'o Matius 'o balasitengi woga-ga'asoko, de 'o Yakobus 'o Alfeus wi ngowaka, 'o Tadeus,

⁴ de 'o Simon 'o Zelot ma nyawa, de 'o Yudas Iskariot gee 'o Yesus wiwuku-wukunu.

⁵ Ge'enaka de 'o su-suloko yamogiooko de modidi 'o Yesus wakisuloko de wakisibesesongo koneda: "'Uwa niaika gee ko 'o Yahudiokawa manga daeraaka de mita 'o Samaria manga soa-soanika.

⁶ Ma niosikaika 'o Israelika gee yoliba-libaka. 'Ona 'isoka 'o domba ma dutu koi'iwa.

⁷ Niositotara 'onaka ma ngale ma Jo'oungu ma Dutu wacobou wopareta.

⁸ Niakisi'aiki 'o nyawa gee yopa-panyake; niakisiwango 'o nyawa gee yosonge-songenuku; niosi'aiki 'o nyawa yakipado-pado de nioginiiki 'o ngomasa ma dorou. Ngini niadawongokau ge'ena 'iodumu koniofanguwa. So, niokula mita ma bo-bangu koi'iwa.

⁹ 'Uwa nio'asa 'o pipi 'o guraci, 'o pipi 'o saaka, bolo 'o pipi 'o tambaga.

¹⁰ Mita 'uwa nio'asa nia tasi, bolo nia ga-gali nia do-dagioka, bolo nia tarupa bolo nia papadi. Sababu 'o nyawa yomanarama ge'ena ma raiokau yakikula 'okia naga yoparaluu.

¹¹ Nako ngini niototarika 'o kotaka bolo 'o soanoka, nianonu 'o nyawa moi gee yomodeke nimasido-dogumu. Niomanoa de de 'ona sigado niotagioli.

¹² Gee niowosama manga woaka, de niakitabea.

¹³ Nako 'o woa ma dutu go'ona nidawongo, madaka la nia tabea ge'ena naga 'onaka. Ma nako 'ona konisidabinowa, niosigilioli nia tabea ge'ena.

¹⁴ Nako naga 'o woaka bolo 'o kotaka konisidabinowa bolo konisigisenuwa, niamadaka ma ngii ge'ena de nia dou ma soata ma kakawo niodabarisuku ge'ena ma ngale ngini niakiitomokau 'ona.

¹⁵ Niosi-singina! 'O dunia ma do-dogumoka, 'o Sodom de 'o Gomora ma nyawa dua manga hukumani 'ifoloi 'iku'arene de gee 'o kota ge'ena!"

¹⁶ "Niosi-singina ne'ena: Ngoi tinisuloko 'isoka 'o domba 'o haewani 'iti-tingkai ma 'igutika. Ngini salingou niocawaro 'isoka 'o ngia de nia singina yaowa 'isoka 'o namoro 'o pombo.

¹⁷ Nimajaga-jaga sababu ngini dua nitagoko de ni'asa 'o 'agama ma balu-balusika. Ngini 'asa nipesana 'o lo-lomu ma woa-woaka.

¹⁸ Ngini dua ni'asa yopa-paretaka de 'o koa-koanika sababu ngini to ngoi 'ai do-domoteke. De ge'enau ma 'orasi ngini niokula 'o sakisii ma ngale ngoi 'onaka de mita 'o nyawa gee ma Jo'oungu ma Dutu kowinako-nakokawa.

¹⁹ Ma nako ngini nisitaari 'o hakimika, 'uwa niododato ma ngale 'okia dua salingou niongose, bolo niosibicara, sababu 'okia naga dua gee salingou niongose, dua nisidemo gee ma 'orasi ya'adono de.

²⁰ Sababu niobicara ma 'orasi ge'ena, ge'ena ko nginiwa ma sirete ma 'ena 'ania Dea 'o sorogaaka wi Ngomasa.

²¹ Dua 'asa 'idadi 'o nyawa manga 'esa moi ma dutu yakidukula 'o nyawaka la yakito'oma. De mita dua koge'enali 'idadi naga 'o dea de 'o ngowaka. 'O ngowa-ngowaka 'asa yomalawani manga 'esa de manga deaka, de yakidukula 'o nyawaka la yakito'oma.

²² Ngini 'asa 'o nyawa 'iodumu nidu'uduku sababu ngini to ngoi 'ai do-domoteke. Ma nago'ona yomatongosono sigado ma do-dogumika, 'ona 'asa yakisilaha.

²³ Nako ngini nisikisaa naga 'o kota moioka, ge'ena nioowara 'o kota 'iregukali. De ngoi tinisidemo, dua koniabootuawasi niodongosama 'o Israeloka ma kota-kotaka, 'ena 'o Nyawa ma Ngowaka woboakauoli.

²⁴ 'O do-domoteke koyofoloidewa de 'o guru, de 'o ro-riwo koyodaduiewa de manga balusu.

²⁵ Yaowakau nako 'o do-domoteke moi yodadiokau 'isoka 'o guru, de 'o ro-riwo 'isoka manga balusu. Nako 'o woa moi ma balusu wisirongakau 'o Beelzebul, de dua ma woa ma dodakoli? Dua 'onasi 'ifoloi 'o ronga 'ito-torou yakisironga!"

²⁶ "'Uwa nimodongo 'o nyawaka. Koi'iwa naga isigi'iunino gee dua koyamakewa, de koi'iwa naga 'isibongonino gee dua koisupuwa.

²⁷ 'Okia naga gee tinisidemo 'o sakautuoka, salingou niositotaroli 'o wangeka. De 'okia naga gee tinisisudu nia ngauika, niosikawasa kiaka naga bato!

²⁸ 'Uwa niakidomodongo 'ona gee yato-to'oma nia roese, ma koya'akunuwa yado'oanikia nia jiwa. Salingou winidomodongo ma Jo'oungu ma Dutu gee wokuasa wabinasa nia roese de mita nia jiwa 'o 'ukuoka gee koisonge-songenuawau.

²⁹ 'O tui-tui 'o ngai modidi 'idadi posi'ija de 'o pipi ma etaka. Ngaro koge'ena ma ka 'o ngai moi ma koi'iwa 'iotaka 'o tonauku nako nia Dea kowomauwa.

³⁰ De ngini nia utu nia saeoka ma 'idoimukou 'iodumu.

³¹ Sababu ge'ena 'uwa nimodongo! Ngini 'ifoloi niobaraguna de 'o tui-tui!"

³² "Nago'ona yomangaku 'ato 'ona ge'ena to ngoi 'ai do-domoteke 'o kawasa ma bionoka, ngoi mita 'asa tomangaku 'onaka 'ai Dea 'o sorogaaka wi bionoka.

³³ Ma nago'ona yomadidumu 'o kawasa ma bionoka 'ato 'ona ko to ngoiwa 'ai do-domoteke, ngoi mita 'asa koge'enali 'onaka 'ai Dea 'o sorogaaka wi bionoka."

³⁴ "'Uwa niongose 'ato ngoi toboa 'o duniano ne'ena ge'ena dua ngini nimakasanangi. Ngoi toboa ge'ena dua 'idadi galawani so nimakati-tingaka.

³⁵ Ngoi toboa so ma rai 'o ngowa-ngowaka 'o nauru koyakisingounuwa manga deaka, 'o ngowaka 'o ngeweka koyakidomotekuwa manga 'esaka, de 'o dungunu 'o gooka koyosingounuwa manga dungunu 'o berekika.

³⁶ Dua 'asa 'idadi 'o saturuu ma amoko ge'ena la ka 'o woa ma dodaku!

³⁷ 'O nyawa gee yosibosono manga balusika 'ifoloika de ngoino, koyadaenuwa yodadi to ngoi 'ai do-domoteke. Koge'enali mita 'o nyawa gee yosibosono manga ngowaika 'ifoloika de ngoino.

³⁸ De 'o nyawa gee yooluku yamoku 'o salip de koimotekuwa, koyadaenuwa yodadi 'ai do-domoteke.

³⁹ Nago'ona gee manga 'ahu yariwo, dua manga 'ahu 'iisanga, ma nago'ona manga 'ahu 'iisanga sababu yosingounu ngoino, 'asa yamake 'o 'ahu."

⁴⁰ "Nago'ona nidawongo ngini, ge'ena ma ngale 'idawongo ngoi. De nago'ona 'idawongo ngoi, ge'ena ma ngale widawongo 'una gee woisulo-suloko.

⁴¹ 'O nyawa gee yadawongo 'o nabii sababu yanako 'o nabii, 'asa yamake 'o nabii ma parasengi. De nago'ona yakidawongo 'o nyawa gee manga singina 'ibo-boooto sababu yanako manga singina 'iboooto, 'asa yamake to 'ena ma parasengi.

⁴² Nago'ona yakisi'okere 'o nyawa gee kokiawa yakidae-daene ngaro ka 'o 'akere ma somoa ma sababu 'ona to ngoi 'ai do-domoteke, niongano-nganono ma raiokau 'ona 'asa yamake ma parasengi!"

Matius

Video Matius 10

Ikuti Kami:

KONTAK | PARTISIPASI | DONASI