Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ki Yesus nogoiní kom murí-Nya inta mopuḷuh bodoyowá tua bo nobogoi ing kawasa ko'i monia poguntun kon dimukud mita mora'at bo pongundam kom bayongan takit bo roriga.
2 Na'a in tangoi monia mopuḷuh bodoyowá tua: Ki Simon inta dinonoi ki Petrus bo ki Andreas ki utatnya, ki Yakobus ki adí i Zebedeus bo ki Yohanes ki utatnya.
3 Ki Pilipus bo ki Bartolomeus, ki Tomas bo ki Matius inta mononagih kom pajak, ki Yakobus ki adí i Alpeus, ki Tadeus,
4 ki Simon intau in Zelot bo ki Yudas Iskariot inta nomangkang ko'i Yesus.
5 Taya mopuḷuh bodoyowá tua pinotabá-Nya takin koyow nana'a: "Dona'ai mo'ikow mayak in lipú in intau ibanea inta de'eman Yahudi andeka mayak in lipú intau in Samaria,
6 ta'e bayakdon kon intau mita Israel inta nongo iḷale.
7 Bayakdon bo poguman, kong ki Allah in ḷagidon mamangoi momarentah saḷaku Raja.
8 Undamaidon intau notakit, biagdon bui intau minatoi, undamai doman intau inta pinanyaki kusta, bo untun in dimukud mita mora'at. Na'a komintan inogoi pinonotabi ko'i monimu, manangka intua yo pomorosen domandon.
9 Dona'aidon mo'ikow modia kom buḷawan, perak andeka tambaga.
10 Dona'ai mo'ikow mobaḷun kom binaya'an, dona'aidon modia kon ḷambung doyowa no par, aip in síoḷ andeka tungkud, sin intau inta mogaid patusbí motarima kong gaji.
11 Bo aka mo'ikow mayak in tobatú kotá andeka lipú, yo potayak muna kon intau inta mota'au pogutunan bo pogutundon kon tua modapot im mo'ikow mobui.
12 Bo aka mo'ikow tumu'ot kom baḷoi intau, yo pohormatbí ko'i togi baḷoi.
13 Aka tarimaan monia, yo hormatmu tatua mobalí barakat ko'i monia, ta'e aka diá tarima'an monia yo barakatnya im mobui ko'inimu.
14 Bo aka oyúon intau doí motarima ko'i monimu bo doí doman mokidongog kon singogmu, yo ḷuai bo taḷa'aidon im baḷoi bo kotá tatua bo topirai in ḷobud kon síoḷmu.
15 Pogumanku ko'i monimu, kon singgai pohakiman intau mita in Sodom bo Gomora moga'a-ga'an in hukumannya nongkon intau mita tatua."
16 "Tarukira in singog-Ku, Aku'oi mopotabá ko'i monimu, náonda bo domba dinia kon yuá-yuák in serigala, manangka intua mokopoingat totok náonda bo uḷag, bo mokopotulid kong gina náonda bo ḷagapan paḷoma.
17 Ta'e mokopo'ingat kom bayongan intau, sin oyúon im moposarahkan ko'i monimu kon itoi mita in agama, bo sikisa'an monia i mo'ikow kom baḷoi pososambayangan.
18 Bo lantaran pirisayamu ko'i-Nakó, sahingga mo'ikow in diaan kon tayowon mongonguasa mita bo raja saḷaku tobatú katarangan ko'i monia bo kon intau mita inta diá nonota'au ko'i Allah.
19 Bo aka mosia moposarakan ko'inimu, yo dona'aidon mohawatir bo momikir kon onu in singogon monimu kon tayowon monia, sing komintan tua in ogoi bidon ko'i monimu aka wakutunyadon.
20 Sin de'eman bidon mo'ikow i mosingog, ta'e Rohobí i Amámu mosingog kom bonu ing ginamu.
21 Bo nana'a im mobalí: Intau mita moposarakan ko'i utatnya sim pokilimod. Soáḷ tatua aidan doman ing guyanga ko'i adínya. Bo adí im momarontak bo molimod kong guyanganya.
22 Mo'ikow in saturuon im bayongan intau si mo'ikow i murí-Ku. Ta'e ki ine mokotahang modapot ing kopaḷutannya sia tua im mosaḷamat.
23 Aka mo'ikow pogutu'on monia kon tobatú kotá yo poḷaguidon kong kotá ibanea. Sim poguman-Ku ko'i monimu, ko wakutu in diápa modait monimu kobaya'an in lipu-lipúannya kon Israel, yo Adí Intau mamangoidon bui.
24 Diábí im murí mo'iliu kong gurunya, andeka simpaḷ mo'iliu kon i tuangnya.
25 Mobalídon aka tobatú murí motongkai i gurunya andeka simpaḷ bo motongkai i tuangnya. Aka ki togi baḷoi bo tangoion ki Betzebul, yo bambíkabí tombonu im baḷoinya tua."
26 Manangka intua dona'aidon mo'ikow mo'ondok ko'i monia, sin diábí tobatúmai inta no'ilingkop in diá bukatan bo diábí doman in tobatúmai inta no'i buni in diá popota'au.
27 Onu inta pinoguman-Ku ko'i monimu ko wakutu in doḷom musti buion monimu poguman wakutu in singgai mobayagdon, bo onu inta pinogombong kom bongoḷanmu, popota'audon kom bayongan intau.
28 Bo dona'aibí mo'ondok ko'i monia inta mota'au molimod kon awak, ta'e diá inogoian ing kawasa morabut kon nyawa. Ta'e mo'ikow musti mo'ondok ko'i Allah inta kokawasa molimod kon awak bo morabut kon nyawa kom bonu in naraka.
29 Ḷagapan dui-duit doyowa mota'aubí potaḷui komura'an totok! Ta'e umpakahbí natua diábí tobatúmai nongkon ḷagapan mita tatua im moḷabú kom butá aka de'eman ibog i Amámu kon soroga.
30 Bá kota'auan monimu, kom bayongan bu'ok kon uḷumu kinota'auan-Nyabí ing kobayongea.
31 Manangka intua dona'aibí mo'ikow mo'ondok, sim mo'ikowbí im momaha-mahaḷ nongkon ḷagapan dui-duit mita tatua.
32 "Pomuḷoi intau inta diá mo'oyak mongaku kon tayowon intau moántó kon sia in dumodudui-Ku, yo sia in ḷabiton-Ku doman kon tayowon i Amá-Ku inta kon soroga.
33 Ta'e ki ine im momayow kon tayowon intau mobarong kon sia in de'emanbí dumodudui-Ku, yo sia im bayowan-Ku doman kon tayowon i Amá-Ku inta kon soroga."
34 "Dikabí kon raionmai monimu Aku'oi na'a im mamangoi modia kon dodamean kon dunia na'a, sin Aku'oi mamangoi de'emanbí modia kon dodamean, ta'e nodiabí kon ropatoi.
35 Aku'oi mamangoi mopoyotondí kon adí ḷoḷaki nongkon i amánya, adí bobay nongkon i inánya, mototaka bobay nongkon i iguyánya.
36 Tobaḷoian tua mobalí mososaturuan.
37 Ki ine i motabi ko'i amánya andeka ko'i inánya mo'iliu kon tabinya ko'i-Nakó, sia tua diá patus mobalí dumodudui-Ku; natua doman, ki ine im motabi ko'i adínya ḷoḷaki andeka bobay bo mo'iliu kon tabinya ko'i-Nakó, sia doman tua in diá patus mobalí dumodudui-Ku.
38 Bo ki ine in doí momota'an kong kayu pinoyotalempang bo dumudui ko'i-Nakó, sia doman tua in diá patus mobalí dumodudui-Ku.
39 Bo ki ine im moramiji mobiag yo sia im matoi, ta'e ki ine im matoi lantaran dinumudui ko'i-Nakó yo sia im mosaḷamat."
40 "Ki ine in notarima ko'i monimu, sia tua in notarima doman ko'i-Nakó bo ki ine in notarima ko'i-Nakó, sia in notarima doman ko'i-Nia inta nopotabá ko'i-Nakó.
41 Ki ine in notarima kon tobatú nabi saḷaku nabi, yo sia i motarima doman kom barakat i nabi, bo ki ine i motarima kon intau inta mobanar saḷaku doman intau mobanar, yo sia im motarima doman kom barakat in intau mobanar.
42 Bo ki ine im mobogoi in tubig noánay inumon umpakahbí tongá topalo kon intau inta bogá na'a, sin sia in dumodudui-Ku, poguman-Ku ko'i monimu, popirisayabí sia tua in diá kobulian im barakatnya nongkon inia!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA