Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mawu Yesus kimui si sire murit'E mapul᷊o dua su kataune pinẹ̌komolẹ̌, kụ nẹ̌gěllị u kawasa si sire apěnokol᷊'u manga rohkẹ̌ dal᷊aị dingangu mapạkapian kal᷊awọu haghin sakị dingangu tědụ u wadang.
2 I sire ene ute kai: humotong, i Simon (isẹ̌sẹ̌bạ lai si Petrus) dingangu tuarine i Andreas, mase i Yakobus dingangu tuarine i Yohanes, manga anạ i Zebedeus.
3 Bọu e i Filipus dingang i Bartolomeus, i Tomas dingang i Matius maghaghělle bea ringangkewen Yakobus anạ i Alfeus, dingang i Tadeus;
4 mase pěngěnsueěnge i Simon, i Anu Wahani ringang i Yudas Iskariot, i anu nẹ̌tul᷊ạen Mawu Yesus.
5 I sire mapul᷊o dua ene niroloh'i Yesus ringangu nitumbal᷊ungang u, "Kumbahang měmpahundal᷊eng makahumpạ u wanuam bal᷊ine tau Yahudi. Dingangu abe lai kakoạ sarang soan tau Samaria.
6 Kaiso kahumotongange kakoạko sarang anun tau Israel apan něngkailang.
7 Pẹ̌habarẹ̌ko si sire u Ruata e sarung mal᷊ighạ mẹ̌parenta kere sěngkatau Ratu.
8 Pakapiangkon masasakị; Pamiahẹ̌ko apan nate; pakaul᷊ekong apang piạ sakịe su pisị makạtatakụ, dingangu pěnokol᷊ẹ̌kon manga rohkẹ̌ daral᷊aị. I kamene seng něnarimạu kěbị ene tawẹ bawaehe, kụ pěmpěgěllịko l᷊ai tawẹ bawaehe.
9 Abe pěmpẹ̌bawa roitẹ̌ bul᷊aeng, roitẹ̌ sal᷊aka arau lai roitẹ̌ tambaga.
10 Abeko l᷊ai pěmpẹ̌bawa kawih'u roitẹ̌ arau l᷊ahaweng u rarua waug'u raral᷊engu, arau sapatu, arau těking. U i sai měkẹ̌karadiahange ute hinone wue makahombang laidope.
11 Kereu i kamene makahumpạen soa arau kampong sude, ute pěmpẹ̌deạbe si sai mapulu manarimạ i kamene. Kěngkatanạbe ringange sarạeweng i kamene měmpahundal᷊eng kạpia wọu ene.
12 Kereu i kamene kạdangenge su wal᷊e ute, pẹ̌berako, 'Karimạko Mawu e měngal᷊amatẹ̌ si kamene.'
13 Kamageng taumata su wal᷊e ene manarimạ u ene, ute pěngangadat'u e remben marěpang si sire. Kai kereu i sire tawe manarimạ i kamene ute kaul᷊e e kapia pangangadat'u e.
14 Kereu piạ bal᷊e arau soa tawe manarimạ i kamene arau tawẹu rumaringihẹ̌ si kamene, ute pahuntěntangkeng kamene tampạ ene ringangu tontongke awul᷊ẹ̌ bọu pal᷊ed'u laedu.
15 Tahěndungeko u, su Ěllong Kiamatẹ̌, Duata e mạhaěngangbe mangonggọu ampung su taumatan soan Sodom dingangu Gomora e sul᷊ungken taumatan soa ene!"
16 "Pẹ̌daringihẹ̌ko: Iạ e měndoloh'i kamene kere domba su tal᷊oaran dal᷊ugẹ̌ marangěngisẹ̌. Kụ pakapapentesẹ̌ko i kamene kere těmpu ringangu pakatatul᷊idẹ̌ naung, i kamene kere paluma.
17 Pakaral᷊ěndị bue, batụ u i kamene sarung samekang kụ ipẹ̌těngo manga mělahukung. U i kamene sarung ipakasịgěsạ su kanisan sire.
18 I kamene sarung isarakang su těngom mangangawasa ringangu manga ratu ual᷊ingu i kamene kawe tumatol᷊e Siạ. Kụ seng tempone si kamene waụg'u měmpẹ̌sahiding Iạ si sire ringangu su taumata apạewem bẹ̌gan Duata.
19 Arawe kamagengu i kamene kawe i sarakang su mělahukung ute, abe ghěnggangu apa hinong i werang kamene, arau kereapa i kamene hinong mẹ̌bisara. U apa hinong i werang kamene ene, sarung ihabarẹ̌ si kamene su tempone.
20 U měbẹ̌bisara su tempo ene e wal᷊inewe i kamene, kaiso kawe Rohkẹ̌ i Amang su Sorga e su ral᷊ung i kamene.
21 Sarung mariadi u taumata e sarung manarakangu anạ u sěmbaụe sẹ̌sane mědeạu ipakapate. Dingangu ene lai sarung mariadi sutal᷊oarang amange ringangu anạe. Manga anạ sarung dumokạ si ninange ringangu si amange ku manarakang i sire mědeạu pakipate.
22 I kamene sarung ipẹ̌binsị u kěbị ual᷊ingu i kamene kawe tumatol᷊e-Ku. Arawe i sai makakẹ̌dang sarang pangěnsueěnge, sarung masal᷊amatẹ̌.
23 Kereu i kamene sẹ̌sahusuang su soa sěmbaụ, ute pahuntal᷊ang sol᷊ong soa sěmbaụ. Iạ maul᷊ị si kamene: U mambeng kahěngang těntal᷊ang i kamene reng ta nakạsuen pěpide kal᷊awọu soang Israelẹ̌ e, Ahus'u Taumata e seng diměnta.
24 Muritẹ̌ e wal᷊inewe limembong gẹ̌guwạ bọu mananěntirone, ringangu ěllange wal᷊inewe limembong kasěllahẹ̌ wọu mawune.
25 Seng kapapiane kereu sěngkatau muritẹ̌ mariadi kere mananěntirone, ringangu sěngkatau ěllange kere mawune. Kereu matimad'u wal᷊e seng nisěbạ si Beelzebul ute, rumakeleng kawe ral᷊ohom bal᷊ene. I sire sarung kaghělirangu areng limembong karal᷊akise!"
26 "Abe kěngkatakụ u taumata. U tawẹu kạl᷊ahěmbung kụ tawe ikasilo, dingangu tawẹu kạbawuni kụ tawe kasingkateng.
27 Apạeweng takụ nipaul᷊ị si kamene su marěndung, ul᷊ịko su matualagẹ̌. Dingangu apạeweng nịsasiang su tul᷊ing kamene ute wohangko pakal᷊ikụ!
28 Abe kěngkatakụ i sire apam měmpamate wadang, kai tawẹ kawasa měmpamate himukudẹ̌ e. Kai kěngkatakụben Mawu Ruata kụ kai makạbinasa himukudẹ̌ ringangkewelaing badange su naraka.
29 Hěnggeng duambaụ botonge kawěliangu roitẹ̌ sěngkal᷊ẹ̌pa kakạdodokange. Maning kerene kai tawẹu sarang sěmbaụ manawo su ěntana su l᷊ikud'u kasingkạ i Amang i kamene.
30 Kakěpal᷊u utạ su těmbọ u seng nirekenang kěbị.
31 Batụ u ene, abe kěngkatakụ! I kamene limembowe maarẹ̌ga wọu manga hěnggeng!"
32 "Tangu i saịewen mangakung Iạ su těngon taumata e, sarul᷊aing takụ iaku su těngong Amang-Ku su Sorga e.
33 Arawe i saing kawe mẹ̌sunial᷊ẹ̌ su těngong lawọe, Iạ e lai sarung mẹ̌sunial᷊'i sie su těngong Amang-Ku su Sorga."
34 "Abe pěmpangiral᷊ingu Iạ e kawe ruměntam pẹ̌darame su dunia ini. Iạ e wal᷊inewe riměntam pẹ̌darame, kaiso kai pẹ̌darokạ.
35 Iạ e riměnta mapẹ̌daral᷊aị anạu esẹ dẹ̌duang amange, anạ bawine rẹ̌duan ninange, ringangu anạ mirarating bawine e rẹ̌duan ninange kinaratingang.
36 Ore, kụ sarung mariadi sědụ kạguwakenge, ute kai ral᷊ohong bal᷊ene sẹ̌sane.
37 I saing kụkěndag'i amange arau i ninange limembo wọu Iạ e, tawe hinone makoạ muritẹ̌-Ku. Kerene lai isaing kụkěndagu anạe esẹ arau anạe wawine limembo wọu Iạ e.
38 Dingangu i sain tawe mapulu mamasaěng kuruisẹ̌ e ringangu tumol᷊e si Siạ, ute tawe hinone makoạ muritẹ̌-Ku.
39 I sai mẹ̌tẹ̌tatahangu pẹ̌bawiahẹ̌ sarung kailangeng pẹ̌bawiahe, arawe i sai mẹ̌tẹ̌tatahangu pẹ̌bawiahẹ̌ e ual᷊ingu satiane si Siạ, e ute, sarungbe makahombang pẹ̌bawiahẹ̌."
40 "I sai manarimạ i kamene ute, manarimạu Iạ. Dingangu i sai manarimạu Iạ e ute manarimạ i Sie něndoloh'u Iạ e.
41 I saim manarimạu nabi, ual᷊ingu i sie kai nabi ute, sarung manarimạ bawal᷊ise waug'u sěngkatau nabi. Dingangu i sai manarimạu sěngkatau mapia ual᷊ingu i sie mapia ute, sarung manarimạ bawal᷊ise waug'u sěngkatau mapia.
42 I sai mapěnginungu sěngkatau wọu tal᷊oaran sire kasiang ini e manịeng tumbạ u akẹ lěnding ual᷊ingu i sie kawe muritẹ̌-Ku ute, pěmpangimangke u i sie mambeng těngadẹ̌ sarung manarimạ bawal᷊ise!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA