Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idilo Jesus ajar-AjarNa si sepulu dua kalak, jenari IberekenNa man ajar-AjarNa e kuasa mpelawesken setan ras mpepalem erbage-bage penakit.
2 Gelar rasul si sepulu dua kalak e: Simon (igelari Petrus) ras Andereas, duana ia sembuyak; Jakup ras Johanes, duana ia anak Sebedeus;
3 Pilipus ras Bartolomeus; Tomas ras Matius pengalo cuke; Tadius ras Jakup anak Alpeus;
4 Simon Pejuang ras Judas Iskariot si ndayaken Jesus.
5 Jesus nuruh rasul si sepulu dua kalak e. Ope berkat nina Jesus man kalak enda, "Ola kam bengket ku daerah si labo kalak Jahudi ntah ku kuta-kuta kalak Samaria.
6 Tapi dahilah kalak Israel biri-biri si nggo papak e.
7 Berkatlah jenari nindu erberita, 'Kinirajan Surga nggo reh deherna.'
8 Pepalemlah kalak si penakiten, pegeluh kalak si nggo mate; pepalemlah kalak si gadamen, janah pelaweslah setan-setan. Kerina e ialokenndu la ertukur. Emaka berekenlah man kalak si deban alu la ngaloken upah.
9 Ola baba emas, pirak ntah tembaga.
10 I bas perdalanenndu ola baba bekal, baju ose, sepatu ntah ciken, sabap kalak si erdahin patut ngaloken kai si iperlukenna.
11 Adi bengket kam ku kuta si meriah ntah kitik, pepayolah lebe i bas kuta e ise si patut inganndu kesilang. Jenari kesilanglah kam ras ia ngayak kam lawes nadingken kuta e.
12 Adi bengket kam ku sada rumah nindulah, 'Mejuah-juah!'
13 Adi meriah ukur si empu rumah e ngalo-ngalo kam, tading i bas ia pasu-pasundu, tapi adi la kam ialo-alona, mulih man bandu pasu-pasundu e.
14 Adi i bas sada rumah ntah sada kuta la kam ialo-alo kalak ntah la kam ibegikenna, tadingkenlah rumah ntah kutana e, kisamken abu si lit i bas nahendu.
15 Inget! I bas wari pendungi pagi, beraten ukumenna asangken ukumen anak kota Sodom ras Gomora."
16 "Begikenlah! Kam Kusuruh bagi biri-biri ku tengah-tengah serigala. Emaka kam arus cerdik bagi nipe janah lemah-lembut bagi nderapati.
17 Metengetlah, sabap nandangi lit me kalak si nangkap kam; ibabanandu ku pengadilen agama janah iligasnandu i bas rumah-rumah persembahen.
18 Iaduken kalak me kam man si erkuasa ras man raja-raja erkite-kiteken Aku. Alu bage banci iturikenndu Berita Si Mehuli man si erkuasa ras raja-raja e bage pe man si labo kalak Jahudi.
19 Sanga kam ibaba ku pengadilen e, ola aru atendu kerna kai ras uga arus ikatakenndu, sabap i bas paksa si e ibereken me man bandu kai si man turinkenndu.
20 Kata-kata si ibelaskenndu e labo kata-katandu, tapi Kesah Bapandu nge si ngerana i bas kam.
21 Kalak si sembuyak ngendesken sembuyakna pagi gelah ibunuh, bapa pe bage nandangi anakna. Anak ngelawan orang tuana pagi janah ngendeskenca gelah ibunuh.
22 Segat pagi ate kalak kerina man bandu erkite-kiteken Aku. Tapi kalak si megenggeng seh ku kedungenna terkelin kap.
23 Adi i bas sada kuta isiksa kalak kam, lompatlah ku kuta si deban. Inget! Ope denga serser isiarindu kuta-kuta Israel, nggo reh Aku, Anak Manusia si isuruh Dibata.
24 Labo lit murid ganjangen asangken guruna; labo lit suruh-suruhen belinen asangken tuanna.
25 Cukup min iakap murid adi jadi bali ia ras guruna, janah suruh-suruhen jadi bali ras tuanna. Adi tuan rumah igelari Balsebul, apai dengan ka isi jabuna?"
26 "Dage ola kam mbiar man manusia. Kerina si terligen teridah nge pagi, janah kerina buni-buni tereteh nge pagi.
27 Si Kukataken man bandu i bas gelap, turikenlah e i bas terang, janah si ibegindu alu kusik-kusik momokenlah man kalak si nterem.
28 Ola kam mbiar man kalak si ngasup munuh kula tapi la ngasup munuh tendi; tapi mbiarlah man Dibata si erkuasa namaken kula ras tendi ku neraka.
29 Dua perik cip-cip banci itukurndu alu piga-piga rupia saja; tapi labo sada pe perik e ndabuh ku taneh adi la bage peraten Bapandu.
30 Janah buk takalndu pe nggo IbeligaiNa.
31 Emaka ola kam mbiar, sabap ergan kap kam asangken melala perik cip-cip!"
32 "Ise ngaku i lebe-lebe manusia maka ia ajar-ajarKu, ia pe pagi Kuakui i lebe-lebe BapangKu si i Surga.
33 Tapi ise si merso i lebe-lebe manusia maka ia ajar-ajarKu, ia pe pagi Kupersoken i lebe-lebe BapangKu si i Surga."
34 "Ola akapndu Aku reh ku doni enda maba dame. Aku reh labo maba dame, tapi erbahan perang.
35 Aku reh erbahanca rubati anak si dilaki ras bapana, anak si diberu ras nandena, permain ras si metuana,
36 janah kerina si lit i bas jabuna imbangna kerina.
37 Ise kelengen atena bapana ntah nandena asangken Aku, la metunggung ia ras Aku; ise kelengen atena anakna si dilaki ntah si diberu asangken Aku, la metunggung ia ras Aku.
38 Ise la mersan kayu persilangna ngikutken Aku, la metunggung jadi ajar-ajarKu.
39 Kalak si mpertahanken kesahna ia kebenen kesah, tapi kalak si kebenen kesah erkiteken Aku, ia ndatken kelegeluhenna."
40 "Ise ngalo-ngalo kam, ia kap ngalo-ngalo Aku; janah ise ngalo-ngalo Aku, ialo-alona kap Ia si nuruh Aku.
41 Ise ngalo-ngalo nabi erkiteken ia sekalak nabi, ialokenna me upahna bagi ialoken sekalak nabi. Ise ngalo-ngalo kalak bujur erkiteken ia sekalak si bujur, ialokenna me upahna bagi ialoken kalak bujur.
42 Inget! Ise mereken sada cangkir lau mbergeh lah gia man sekalak ajar-ajarKu si kitikna kal erkiteken ia ajar-ajarKu, tuhu ialokenna nge pagi upahna."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA