Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Yésus nenawar pulu' dueh anak sekola'Neh amé matun Neneh, idi Ieh nemaré lalud nedeh pa luun ada'-ada', pad miak masut nedeh, idi pad ideh ngedo' amung-amung luk mét, idi amung-amung laya' burur lemulun.
2 Ini ngadan pulu' dueh rasul: pun-pun Simun luk titen Pétrus, idi kinanakneh Andrias; Yakub Sabdi, idi Yahya kinanakneh;
3 Pilipus, Bartolomius, Tomas, Matius luk ngamung rigit pupuk, Yakub Alpius, Tadius;
4 idi Simun lun Selot, idi Yudas Iskariot luk nemasui Yésus.
5 Yésus nengecuk pulu' dueh rasul ini,idi Ieh neperiteteng nedeh, kebalaNeh, "Aleg muyuh semuet bang bawang lun pupu baken, idi aleg semuet bang bawang-bawang Samaria.
6 Iamo' do' muyuh amé' inan amung dumba luk neraruh ratnan lun pupu Israil.
7 Amé' mada', kebala muyuh, 'Imet surga pangeh muneng.'
8 Ngedo' lun luk mét, idi nui lun luk naté, ngeligan lun luk mét susud, idi masut amung-amung ada. Muyuh pangeh nengalap mo'-mo', idi do' muyuh maré mo'-mo' teh.
9 Aleg muyuh nguit amas, pirak, idi usin bang kapil muyuh,
10 idi luk inan balu' kareb nalan, idi dueh kuyu', kasut, idi rukud pana'. Ngaceku anid-anid lemulun luk ngakem petulu ngalap luk kenenneh.
11 "Kareb muyuh semuet bang bawang idi bang ruma' iapeh-iapeh pana', do' muyuh nakap lemulun luk do' niat; idi mudeng dengandeh pad muyuh nalan.
12 Kareb muyuh umak ruma', idi do' maré tabi' kuandeh.
13 Idi kudeng lun luk bang ruma' ineh do' niat, do' maré peruan muyuh kuandeh, iamo' kudeng ideh na do' niat, nima' peruan muyuh ineh muli' amé' nemuyuh.
14 Idi idé-idé luk ara' nganak nemuyuh, idi luk ara' ninger bala muyuh, kareb muyuh remuat rat bang ruma'deh idi bawangdeh, do' muyuh ngegkar abuh ratnan kukud muyuh.
15 gerawé do'-do'! Meluun meran ukum bawang Sodom idi Gemora, kareb Aco Ngukum, ratnan bawang ineh.
16 "Ngerawé do'-do'! Ui ngecuk nemuyuh kudeng dumba arang uned bungalé. Do' muyuh mileh mepad kudeng menipeh, idi do' niat mepad kudeng suit sukur.
17 Matar do'-do'! Ngaceku muyuh miak barén lemulun bang besara', idi ideh sikal mebal nemuyuh bang ruma' sembayangdeh.
18 Idi teh muyuh miak itendeh amé' besara' pa kiung lun luk ngimet idi raca'-raca' ngaceku Ui, pad muyuh mada' Bala luk Do' pa kiungdeh idi pa kiung lun pupu baken teh.
19 Kareb muyuh itendeh amé' besara', aleg megagau ratnan kudeng apeh idi anun luk miak belén muyuh; ngaceku kareb ineh miak barén nemuyuh bala luk belén muyuh.
20 Ngaceku baken muyuh luk pebala, iamo' Roh Taman muyuh luk pebala lemaba bibir tang muyuh.
21 "Kinanak miak maré kinanakneh pitayen, idi taman miak maré anakneh; anak-anak sikal metueh ratnan taman-tinandeh, pad ideh maré nedeh pitayen.
22 Muyuh miak inan amung-amung lemulun megateh ngaceku ngadanKu; iamo' lemulun luk tuman pad macing kekipedneh uen ngulun.
23 Kareb ideh ngedereh nemuyuh, bang aceh bawang, do' muyuh buro amé' inan bawang luk baken. Ui pebala nemuyuh, kareb nateh muyuh nesemuet bang amung-amung bawang libut-libut tana' Israil, Anak-Lemulun macing.
24 "Seburur anak sekola' na meluun rayeh ratnan guruneh, idi seburur demulun na meluun rayeh ratnan tuanneh.
25 Idi miak mo' kudeng anak sekola' ineh mepad dengan guruneh, idi kudeng demulun mepad dengan tuanneh. Kudeng ideh pangeh neneten tuan ruma' Balsebul, meluun teh ideh sikal ngedat anak itinneh.
26 "Aleg muyuh matot nan lemulun. Sebuleng pana' na luk idi luk melinged luk na miak uen ngegala', idi luk inapung luk na miak kali' lemulun.
27 Anun-anun luk Ui mala nemuyuh bang dacem, do' muyuh mala bang acang; idi luk pindenger muyuh ayek-ayek, do' muyuh mada' rat luun buduk ruma'.
28 Idi aleg matot nedeh luk ngaté burur mo', idi na melalud ngaté niat; iamo' do' muyuh matot nan Allah luk melalud ngaté niat idi burur pana' bang apui.
29 Suit pirit luk dueh pisuen lemulun aceh sin mo'. Iamo' sebuleng pana' na miak mebpeh luun tana', kudeng na pian Taman muyuh.
30 Iamo' abpuk luk luun uluh muyuh pangeh iniap.
31 Ngaceku ineh, aleg muyuh matot, ngaceku muyuh meluun raga ratnan suit pirit luk mula'.
32 "Anid-anid lemulun luk ngamo Negku pa kiung lemulun. Ui pana' ngamo neneh pa kiung TamanKu luk bang surga.
33 Iamo' anid-anid lemulun luk ngalum Negku pa kiung lemulun, ieh pana' luminKu pa kiung TamanKu luk bang surga.
34 "Aleg ngerawé Ui pangeh nacing pad maré pedo' luun tana'; baken Ui nacing pad nguit pedo', iamo' aceh pelapet.
35 Ui nacing matad deléi ratnan tamanneh, idi decur ratnan tinanneh, idi iban ratnan ibanneh.
36 Idi lun bang ruma'neh mangun ku bunu'neh.
37 "Lemulun luk mawa inan taman idi tinanneh meluun ratnan Ui, na ieh mayu kuanKu; idi lemulun luk mawa inan anakneh luk deléi idi anakneh luk decur meluun ratnan Ui, na ieh mayu kuanKu.
38 Idi lemulun luk na maan salibneh idi maya' Negku, na ieh mayu kuanKu.
39 Lemulun luk ngerawé ulunneh sebuleng, na miak ngalap ulun luk matu; iamo' lemulun luk na ngerawé ulunneh sebuleng ngaceku Ui, ieh luk miak ngalap ulun luk matu.
40 "Lemulun luk nganak nemuyuh, ieh teh luk nganak Negku, idi lemulun luk nganak Negku, ieh teh luk nganak Neneh luk nengecuk Negku.
41 Lemulun luk nganak seburur nabi ngaceku ieh nabi, ieh teh luk miak ngalap tabpar mepad kudeng nabi; idi lemulun luk nganak selemulun luk matu ngaceku ieh lemulun luk matu, ieh teh luk miak ngalap tabpar mepad kudeng selemulun luk matu.
42 Ngerawé do'-do'! Idé-idé luk maré aceh sangkir abpa' talang rupen seburur ratnan luk isuut ini, ngaceku ieh anak sekola'Ku, tabparneh na metutu'."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA