Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq sopoq jelo, Deside Isa ngemanikang kedue olas pengiring-Ne bekumpul. Beterus Deside Isa ngicanin kuase tipaq ie pade jari sediq roh-roh jahat dait nyelahang segale macem penyakit dait segale macem awak saq cacat.

² Aran kedue olas rasul nike: Penembẽq Simon (saq tesebut Petrus) dait Andreas semetonne, terus Yakub dait Yahya semetonne, ie pade bije-bije Zebedeus.

³ Beterus Pilipus dait Bartolomeus, Tomas dait Matius penagih pajek nike, Yakub bije Alpeus, dait Tadeus;

⁴ dait saq penutuq Simon dengan Zelot dait Yudas Iskariot saq behianat lẽq Deside Isa.

⁵ Kedue olas rasul nike teutus siq Deside Isa, dait ie pade tepesen: "Ndaq lumbar ojok daẽrah dengan bangse-bangse lain atao ojok kote-kote dengan Samaria.

⁶ Laguq lumbar ojok dengan-dengan Israel, terutame tipaq dengan-dengan saq sesat.

⁷ Sampẽang lẽq ie pade bahwe Kerajaan Sorge sampun rapet.

⁸ Selahang dengan-dengan saq sakit; idupang dengan-dengan saq ninggal; selahang dengan-dengan saq sakit kuste, sediq sẽtan-sẽtan. Side pade sampun nerimaq selapuqne nike secare cume-cume. Jari, bẽng ẽndah secare cume-cume.

⁹ Ndaq jauq kẽpẽng emas, kẽpẽng perak atao kẽpẽng tembage.

¹⁰ Ndaq ẽndah jauq takaq sangu atao due lembar kelambi lẽq kelampande, atao sepatu atao jauq tunjang. Sẽngaq dengan saq begawẽan berhak nerimaq upaqne.

¹¹ Lamun side pade tame ojok kote atao kampung, boyaq dengan saq mẽlẽ nerimaq side. Ndot kance ie jangke side pade berangkat malik.

¹² Sewaktu side pade tame ojok sopoq balẽ, ucapang salam tipaq ie pade.

¹³ Lamun dengan-dengan lẽq balẽ nike nerimaq side pade, alurang salam side nike tetep lẽq ie pade. Laguq lamun ie pade ndẽq mẽlẽ nerimaq side pade, bait malik salamde nike.

¹⁴ Lamun araq balẽ atao kote saq ndẽq mẽlẽ nerimaq side pade atao ndẽq mẽlẽ dengah side pade, bilin taoq nike, dait kerapang kerepuk lẽman naẽnde.

¹⁵ Tiang badaq side: Lẽq jelo Penghakiman dengan-dengan kote Sodom dait Gomora gen molahan teampunin siq Allah ketimbang dengan-dengan lẽq kote nike!"

¹⁶ "Perhatiang niki: Tiang ngutus side pade maraq dombe ojok tengaq-tengaq serigale, keranaq nike side pade harus ceket maraq ulah dait tulus maraq kedit dare.

¹⁷ Laguq tetep waspade lẽq selapuq dengan, sẽngaq araq saq gen nyerahang side pade ojok mahkamah agame, dait side pade gen tepecut lẽq balẽ-balẽ ibadah.

¹⁸ Side pade gen tejauq ojok arepan penguase-penguase dait raje-raje sẽngaq side pade jari pengiring Tiang. Nike jari kesempatan side pade ngebẽng kesaksian mengenai Tiang lẽq ie pade dait dengan-dengan saq ndẽq kenal Allah.

¹⁹ Laguq lamun side pade tejauq jari teadilin, ndaq kuatir mengenai napi saq harus side pade ucapang, atao berembẽ entane side pade harus ngeraos. Sẽngaq lẽq waktu nike ẽndah side pade gen tebadaq napi saq harus side pade ucapang.

²⁰ Sẽngaq saq bebaos lẽq waktu nike ndẽqne side pade laguq Roh Bapa side saq araq lẽq dalem diriqde.

²¹ Gen araq dengan saq nyerahang semetonne mẽsaq jari tematẽq. Dait hal nike gen telaksane ẽndah antare bapaq kance bijene. Kanak-kanak gen ngelawan dengan toaqne dait nyerahang ie pade jari tematẽq.

²² Side pade gen temeriq siq selapuq dengan lantaran side pade jari pengiring Tiang. Laguq dengan saq setie jangke penutuqne, gen teselametang.

²³ Lamun side pade teaniaye lẽq sopoq kote, pelai ojok kote saq lain. Tiang badaq side pade: Sendẽqman side pade tutuq datengin selapuq kote-kote Israel, Bije Manusie sampun rauh.

²⁴ Sopoq murit ndẽqne belẽqan lẽman gurune, atao sopoq hambe ndẽqne belẽqan lẽman majikanne.

²⁵ Lamun murit sampun jari maraq gurune, nike sampun cukup, dait sopoq hambe sampun pade maraq majikanne. Lamun kepale keluarge sampun tesebut Beelzebul, lebihan malik selapuq dengan saq araq lẽq balẽne. Ie pade gen tesebut saq lengẽan malik!"

²⁶ "Ndaq takut lẽq manusie. Ndẽq araq saq teseboq, saq ndẽq gen penggitan, dait ndẽq araq saq terahasieang saq ndẽq gen tebungkar.

²⁷ Napi saq Tiang sampẽang tipaq side lẽq taoq saq peteng, harus side pade sampẽang malik lẽq taoq saq menah. Dait napi saq tepẽsẽqang lẽq kentokde, umumang hal nike belẽq-belẽq!

²⁸ Ndaq takut lẽq ie pade saq bau nyematẽq awak, laguq ndẽq bekuase nyematẽq jiwe. Takut tipaq Allah saq bekuase binaseang awak dait jiwe lẽq dalem api nerake.

²⁹ Due kedit perit tejual ajine sopoq kẽpẽng saq paling kodẽq. Timaqne maraq nike ndẽq araq sopoq juaq saq geriq ojok tanaq lamun ndẽq tekayunang siq Bapa lẽq sorge.

³⁰ Luwẽqne bulu lẽq ulunde ẽndah sampun terẽkẽng selapuqne siq Allah.

³¹ Keranaq nike, ndaq takut! Side pade jaoq belẽqan ajine tebanding kedit-kedit perit nike!"

³² "Sai-sai saq ngakuq lẽq julun dengan luwẽq bahwe ie pengiring Tiang, Tiang ẽndah gen ngakuq ie lẽq arepan Bapa Tiang lẽq sorge.

³³ Laguq sai-sai saq nilas lẽq julun dengan luwẽq bahwe ie pengiring Tiang, Tiang ẽndah gen tilas ie lẽq arepan Bapa Tiang lẽq sorge."

³⁴ "Ndaq paran bahwe Tiang jauq perdamẽan ojok dunie niki. Tiang ndẽq jauq perdamẽan laguq perlawanan.

³⁵ Tiang dateng jari penyebap kanak mame ngelawan bapaqne, kanak nine ngelawan inaqne, dait menantu saq nine ngelawan mentoaqne saq nine.

³⁶ Anggote keluarge mẽsaq gen jari musuhne.

³⁷ Dengan saq belẽqan kasihne tipaq amaqne atao inaqne ketimbang tipaq Tiang, ndẽqne patut jari pengiring Tiang. Maraq nike ẽndah dengan saq ngasihin bijene saq nine atao bijene saq mame lebihan lẽman Tiang.

³⁸ Dengan saq ndẽq mẽlẽ ngelẽmbah salibne dait ngiring Tiang ndẽq patut jari pengiring Tiang.

³⁹ Dengan saq pertahenang nyawene, ie gen kẽlangan nyawene, laguq dengan saq kẽlangan nyawene lantaran setie lẽq Tiang, gen mauq idupne."

⁴⁰ "Dengan saq nerimaq side pade, nerimaq Tiang ẽndah. Dait dengan saq nerimaq Tiang, nerimaq Ie saq ngutus Tiang.

⁴¹ Dengan saq nerimaq nabi lantaran ie nabi, gen nerimaq upaq nabi. Dait sai saq nerimaq sopoq dengan saq solah lantaran ie solah gen nerimaq upaq saq solah.

⁴² Sai-sai saq ngebẽng nginem, timaq cume aiq nyet doang tipaq salaq sopoq lẽman dengan-dengan hine niki, lantaran ie pengiring Tiang, percaye bahwe ie pasti gen nerimaq upaqne!"

Matius

Video Matius 10

Ikuti Kami:

KONTAK | PARTISIPASI | DONASI