Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma 'orasi ge'ena 'o Agustus, 'o Romaka manga Koana ma Amoko, 'awi kawasa yoodumu wakisuloko manga ronga yosilefo la wakidoimi kokia manga gudaioka.

² Ma do-doimi ma si-siraka ge'ena wodiai ma 'orasi 'o Kirenius wogubernurosi 'o Siriaka.

³ Ma 'orasi ge'ena 'o nyawa 'iodumu yotagi manga ronga yosilefo moi-moi manga kotaka.

⁴ 'O Yusuf mita womagoraka 'o Nazaret ma soanoka, 'o Galilea ma daeraaka wosikaie 'o Betlehemude 'o Yudea ma tonakie, ma Koana 'o Dautu woda-dalahiroka, sababu 'o Yusuf wi 'asali ma Koana 'o Dautino.

⁵ 'Una de 'awi baingi 'o ngo Maria gee motu-tubusou, yotagi manga ronga yosilefo.

⁶ 'O Betlehemuoka ya'adonie de 'o ngo Maria mi 'orasi ya'adono momaku'arene.

⁷ Muna momaku'arene 'ami ngowaka 'o nauru moi 'o riaoka, 'o mosa ma getongo womisikooromino 'asa de wi'idude 'o haewani ma do-dowoka, sababu 'o ngii de ma dangiri ma koyomadamakewau so ka 'o haewani ma ngiiokau.

⁸ Ma obiri ge'ena 'o haewani yopi-piara manga domba yojagano 'o liunoka, 'o Betlehem ma dateoka.

⁹ De ma Jou 'awi mala'ekati moi yakidoboa de ma Jo'oungu ma Dutu 'awi kuasa ma ginitara yakidisiwaruku 'onaka, so yakimodongo ma sala.

¹⁰ Ma 'o mala'ekati ge'ena 'ingose 'ato, "'Uwa nimodongo! Ngoi toboa 'o habari ma owa tinisitotara, de ma habari ge'ena 'o nyawa 'iodumu 'asa posironga yomorenoka.

¹¹ 'O wange ne'ena to ngini 'ania Koana Winisilaha-laha ma Jo'oungu ma Dutu wi Ngiriki ge'ena la ma Kristus, to ngini 'ania Jou, wosupuokau ma Koana 'o Dautu 'awi soanoka.

¹² Ma no-nako konee: Ma eta 'asa ngini niamake 'o ngowaka ma giau moi, 'o mosa ma getongo wisikooromino de wi'idude 'o haewani ma do-dowoka."

¹³ De yomanako 'ena ma Jo'oungu ma Dutu 'awi mala'ekati 'iku-kudai 'iboa, ka ma moino 'imatoomu. So ge'enaka de ma Jo'oungu ma Dutu wisimorene, 'ingose 'ato,

¹⁴ "Powisiarene ma Jo'oungu ma Dutu daku 'awi ngii 'ikaku-kakurieka! De ngini 'o duniaka ne'ena gee ma Jo'oungu ma Dutu 'awi singina niasa-sanangi, tanu niosanangioka."

¹⁵ Ge'ena 'ipasa de ma mala'ekati yakimadakau 'onaka de 'o sorogaade 'ilio, de 'o domba yopi-piara go'ona yomasikagaro kayongosekau, "Bika, dokaika 'o Betlehemuka potagi la palega 'okia naga gee 'idadiokau 'isoka gee kangano ma Jou wosidemo-demokau."

¹⁶ Ge'enaka de yomatai-taiti yomajobo, yaika de yakimake 'o Yusuf de 'o ngo Maria, de 'o ngowaka ma giau ge'ena 'o do-dowoka wi'idude.

¹⁷ Ge'enaka 'ona 'o ngowaka ma dingoono yamakekau, de yakisidemo 'o nyawa-nyawaka, 'okia naa 'o mala'ekati 'ingosekau ma ngale 'o ngowaka ma giau ge'ena.

¹⁸ 'O nyawa yosigise-gisene 'o haewani yopi-piara manga demo ge'ena yoherangi.

¹⁹ Ma 'o demo 'iodumu ge'ena 'o ngo Maria mosi-singina de mosikaditibangi.

²⁰ Dua 'asa yopi-piara go'ona kadinau yoliosa, de ma Jo'oungu ma Dutu kawisiare-arene, sababu 'okia naga yamakekau ge'ena, moteke ma mala'ekati 'isidemo-demokau.

²¹ Gee 'o Yesus 'awi 'umuru 'o wange tuangerou de wisuna, de wisironga 'o Yesus moteke 'o ronga gee 'o mala'ekati wikulakau ka ngo Maria ma komosi'asakawasi 'ena.

²² Ma 'orasi ya'adono 'o ngeweka gee yomaku'arenoka de yomatebini moteke ma Jo'oungu ma Dutu 'awi besesongo gee ma nabii Musa wositota-totara, de 'o Yusuf de ngo Maria yotagi 'o Yerusalemuka. Ma 'orasi ge'ena 'ona mita 'o Yesus wi'asa la wisisarakani ma Jouka,

²³ moteke ma Jou 'awi besesongoka gee 'o Musa wositota-totara 'ingose konee, "'O ngowaka 'o nauru 'o riaoka 'isinoimi salingou yosisarakani ma Jouka ma ngale duga ka ma Jo'oungu ma Dutu wileleani."

²⁴ Moteke ma Jou 'awi besesongo 'o nge-ngeweka nako yomaku'arenoka ge'ena salingou yomatebini ge'ena la yokula manga su-suba. So 'ona yokula manga su-suba ge'ena la 'o tekukuru 'o sabi moi, bolo 'o pombo ma gooka 'o ngai modidi, 'isoka gee 'isitatapuokau ma Jou 'awi besesongoka.

²⁵ Ma 'orasi ge'ena 'o Yerusalemuoka wimoi wi ronga 'o Simeon. 'Una 'o nyawa ma owa, 'awi singina 'iti-tiai de wosingou-ngounu ma Jo'oungu ma Dutuka. 'O Ngomasa 'Itebi-tebini naga de de 'una de womada-damaau ma 'orasi ya'adono ma Jo'oungu ma Dutu wakisilaha 'o Israeloka.

²⁶ 'O Ngomasa 'Itebi-tebini wisidemokau 'ato 'una dua ma Koana Wiiri-iriki gee ma Jo'oungu ma Dutu wosijajiokau wimakekasi 'asa de wosongene.

²⁷ Gee 'o Yusuf de ngo Maria ma Jo'oungu ma Dutu 'awi Woaka la wisisarakani ma Jo'oungu ma Dutuka ma ngale yamoteke 'o 'agama ma besesongo, ma 'orasi ge'ena 'o Simeon 'o Ngomasa 'Itebi-tebini 'awi singina yaparetano so wowosama mita ma Jou 'awi Woaka.

²⁸ So 'o Simeon 'o Yesus wi'ese so witotirino, de wisiarene ma Jo'oungu ma Dutu wongose 'ato,

²⁹ "Jou, ne'ena madaka la ngoi 'ani ro-riwo ne'ena ngaro tosongenou. Ngoi 'ai singina 'isanangi sababu 'ani jaji 'itiai.

³⁰ Sababu ngoiou ma sirete towimakekau Wosilaha-laha gu'una 'una ge'ena ngonano.

³¹ 'Una wonisulokino ma ngale wariwo wosilaha 'o sagala nyawa.

³² 'Una 'isoka 'o siwara gee yakidiginitara ko 'o Israel ma nyawakawa la yoboa ngonaka, de ma duanguku 'ani kawasa 'o Israeloka yakihoromati."

³³ 'O ngo Maria de 'o Yusuf yoherangi yo'isene 'okia naga 'o Simeon wongose ma ngale 'o Yesus.

³⁴ 'O Simeon wakidaga'asoko 'o barakati de kawongosekau ngo Mariaka 'o ngowaka ma 'esa gumuna, "'O ngowaka nu'una ma Jo'oungu ma Dutu wiirikokau. 'Unau ge'ena so 'o Israeloka manga gudai gee wiito-itomo dua yobinasa de manga gudai wimote-moteke dua yamake 'o laha. 'Una 'asa wodadi 'o no-nako ma Jo'oungu ma Dutuno, gee dua 'o nyawa manga gudai wiitomo,

³⁵ de ge'enau so manga singina ma dodaka 'isupu. De 'o balisa dua 'ani singina yasiri 'isoka 'o dae 'idoto-doto yatopoko."

³⁶ Naga mita 'o nabii mimoi mopereki 'ifoloiokau. Muna mi ronga ngo Hana, 'o Fanuel wi ngowaka 'ami 'asali 'o Asyer ma nyawano. 'O taunu tumudiingi mongaamokino,

³⁷ de mobao, de ne'ena mi'umuru 'o taunu nagi tuangere de soatou. Muna kaitaurika ma Jo'oungu ma Dutu 'awi Woaka ma ngale momagae mosuba ma Jo'oungu ma Dutuka, molahidoa de mopuasa.

³⁸ Gee 'o Simeon 'o Yesus witotirino de ngo Hana mita moboa. Ge'enaka de mobicara ma ngale 'o ngowaka ge'ena 'o nyawa yoodumika gee yoda-damaa ma Jo'oungu ma Dutu wosilaha 'o Yerusalem.

³⁹ 'O Yusuf de ngo Maria gee yadiaioka 'iodumu ma Jou wi besesongoka, de yolio 'o Nazaretika 'o Galileaka.

⁴⁰ 'O ngowaka gu'una kaisiika monga woamoko de wokuata. Wobarija ma sala de ma Jo'oungu ma Dutu wisibosono ma sala.

⁴¹ 'O Yusuf de ngo Maria 'o taunu 'isinoimi ma moi yotagi 'o Yerusalemuka ma ngale yamoteke 'o Israeloka Yakisisupu 'o Mesiroka ma Wange ma Amoko.

⁴² Gee 'o Yesus 'awi taunu mogiooko de modidiou, 'ona yotagi ma rameka ge'ena, 'isoka gee biasau yadi-diai.

⁴³ Manga rame-rame ge'ena 'iduanga de yolio, ma 'o Yesus 'una kage'enakasi 'ena wi balusu koyanakokawa.

⁴⁴ 'Ona yongose 'una naga de to 'ona manga ma-manai. So ma wange 'i'alokou de winonu yokasano to 'ona manga 'esa moika de manga manaika.

⁴⁵ Ma kowimakewa, so yolio 'o Yerusalemuka winonu.

⁴⁶ 'O wange sa'angeno winonu, de wimake 'ena ma Jo'oungu ma Dutu wi Woaka. 'Una wogogerie wosigisene ma de wosano-sano 'o Yahudioka manga 'agamaka yodoto-dotoika.

⁴⁷ 'O nyawa gee yosigise-gisene yoodumu yoherangi ma sala so kayoki-kiliri sababu 'awi sa-sango yadaene ma sala.

⁴⁸ 'Awi balusu mita yoherangi, de ma 'esa muna kamongosekau 'unaka, "Ee, koidadiwa kone'ena nodiai ngomino! 'Ani dea de de ngoi mininonu sababu miododato ma sala!"

⁴⁹ De 'una kawongosekau, "Ee 'Aba de ngo 'Eme, ngoi 'uwa ninonu. Ngini salingou nianako 'ato ngoi ne'ena salingou 'ai Dea wi Woaka."

⁵⁰ Ma 'ona koyasahewa to 'una 'awi dumutu koge'ena wongose.

⁵¹ Ge'enaka de 'una de wi balusu yolio 'o Nazaretika, de wakisingou-ngounu 'awi 'esa de wi deaka. Ge'ena 'iodumu ma 'esa mosiriidino mi singina ma dodaka.

⁵² 'O Yesus kaisiika monga woamoko de kawocawaro monga, de ma Jo'oungu ma Dutu widora de 'o kawasa ma widuaka.

Lukas

Video Lukas 2

Ikuti Kami:

KONTAK | PARTISIPASI | DONASI