Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi roh ma ijia parentah humbani Kesar Augustus, ase isuratkon sagala jolma na ibagas gomgomanni.
2 Panuratan na parlobei ma ai, sanggah si Kerenius manggomgomi tanoh Siria.
3 Jadi misir ma haganup, ase isuratkon, ganup hu huta hasusuranni bei.
4 Misir ma homa si Josep hun Galilea, hun huta Nasaret, laho hu Judea, hu huta ni si Daud, na margoran Betlehem, halani hun marga ampa humbani ginompar ni raja Daud ia.
5 Laho ma ia pasuratkon dirini rap pakon si Maria, tunanganni ai, na dob boratan rumah ai.
6 Anjaha sanggah na ijai sidea, jumpah ma panorangni tubuhan tuah ia.
7 Jadi itubuhkon ma anak bunga tubuhni, ibaluti ma bani ampan, anjaha ipatibal bani panggagatan, halani seng dong ianan bani sidea i rumah parbornginan.
8 Jadi adong ma parmahan marborngin i sampalan na bani ianan ai, manjagai pinahan ni sidea.
9 Jadi roh ma sada malekat marayak sidea, anjaha marsinalsal ma sangap ni Tuhan inggot sidea, gabe mabiar tumang ma sidea.
10 Tapi nini malekat ai ma hubani sidea, “Ulang mabiar hanima! Tonggor ma, ai ambilan malas ni uhur banggal do huboan bannima, parulihan ni ganup bangsa.
11 Ai domma tubuh bannima saborngin on, i huta ni si Daud, Sipaluah in, in ma Kristus Tuhan in!
12 On ma partinandaan bannima: Jumpahonnima do sada na etek-etek, ibaluti bani ampan, tibal bani panggagatan.”
13 Jadi sompong adong ma hasoman ni malekat ai, buei bala parnagori atas, ipuji sidea ma Naibata, nini ma,
14 “Hasangapon ma bani Naibata na i babou, damei ma i tanoh on bani jolma hinarosuhkon-Ni in.”
15 Dob laho malekat ai humbani sidea dompak nagori atas, nini parmahan ai ma samah sidea, “Laho ma hita hu Betlehem mengidah na masa ai, na pinabotohkon ni Tuhan in banta.”
16 Jadi podas ma sidea laho hujai, anjaha jumpah sidea ma tongon si Maria ampa si Josep ampa Dakdanak ai ibagas panggagatan.
17 Ase dob ididah sidea Ia, ipatugah sidea ma sahap na dob ihatahon bani sidea pasal Dakdanak ai.
18 Anjaha haganup na manangar ai, longang bei do pasal na hinatahon ni parmahan ai bani sidea.
19 Ia si Maria iparimbagaskon do haganup hata ai, anjaha ipingkir-pingkiri ibagas uhurni.
20 Mulak ma parmahan ondi, ipasangap anjaha ipuji sidea do Naibata halani haganup na tinangar ampa na nididah ni sidea, songon na dob hinatahon hinan bani sidea.
21 Dob jumpah ari paualuhkon ai ma panorang parsunatonkon Bani, jadi ibahen ma goran-Ni: Jesus, songon panggoran ni malekat ai paima solat Ia.
22 Ase dob gok panorang pangurasion Bani magihutkon aturan ni si Musa, iboan sidea ma Ia hu huta Jerusalem, laho mangondoskon-Si bani Tuhan in,
23 songon na tarsurat ibagas titah ni Tuhan in, “Sagala dalahi bunga tubuh ni inangni, maningon pansing do goranon bani Tuhan in,”
24 lanjar mamboan galangan, songon na niaturhon ibagas titah ni Tuhan in, ai ma dua kuhuy atap dua anak ni asas.
25 Jadi adong ma sada halak i Jerusalem, na margoran si Simeon, halak na bonar anjaha na daulat, na paima-imahon Sipangapoh na bani Israel; marianan do Tonduy Na Pansing bani.
26 Anjaha domma ipabotohkon Tonduy Na Pansing bani, na so idahonni hamatean, anggo seng palobei ididah Kristus ni Tuhan in.
27 Jadi roh ma ia hu rumah panumbahan ijuljul Tonduy ai. Anjaha sanggah na iboan namatoras ni Jesus Dakdanak ai hubagas laho mambahen hu Bani mangihutkon adat na niaturhon ni titah ai,
28 jadi iabing si Simeon ma Dakdanak ai, ipuji ma Naibata, nini ma,
29 “Lopas Ham ma sonari Tuhan jabolon-Mu misir ibagas damei, songon na hinatahon-Mu in,
30 ai domma ididah matangku haluahon na hun Bamu,
31 na pinasirsir-Mu i lobei ni sagala bangsa,
32 sada Panondang, na laho manondangi sipajuh begu-begu, anjaha hasangapon bani bangsa-Mu halak Israel.”
33 Jadi longang ma uhur ni bapa-Ni pakon inang-Ni mambogei hatani ai, ai ma pasal Na Etek-etek ai.
34 Anjaha ipasu-pasu si Simeon ma sidea, nini ma bani si Maria, inang-Ni ai, “Tonggor ma, na tinaktakkon do on gabe pardabuhan ampa parjongjongan bani buei Israel, anjaha gabe tanda silawanon.
35 Anjaha ho pe tolpusan ni podang do tonduymu; masa pe ganupan ai, ase talar pingkiran ni buei uhur.”
36 Anjaha adong do homa sada nabi naboru, na margoran si Hanna, boru ni si Penuel, humbani marga Aser. Domma matua ia, anjaha pitu tahun do ia marparamangon, dob laho.
37 Domma mabalu ia, anjaha ualuh puluh ompat tahun ma umurni. Seng meret ia hun rumah panumbahan ai, sai marpuasa anjaha martonggo do ia mangidangi Naibata arian pakon borngin.
38 Roh do ia homa bani panorang ai, ipuji ma Naibata anjaha isahap-sahapkon do pasal-Si bani haganup na mangkasiholhon haluahon ni Jerusalem.
39 Ase dob idobkon sidea haganupan ai mangihutkon titah ni Tuhan in, mulak ma sidea hu Galilea, hu Nasaret, huta ni sidea ai.
40 Ia Dakdanak ai lambin banggalni do, lambin margogoh anjaha maruhur tumang, anjaha ihasomani idop ni uhur ni Naibata do Ia.
41 Anjaha siap tahun do laho namatoras-Ni hu Jerusalem marpesta Paskah.
42 Jadi dob marumur Ia sapuluh dua tahun, rap tangkog ma sidea songon na somal hu pesta ai.
43 Dob salosei sidea na marpesta ai sanggah na mulak ai sidea, tading do Jesus, Dakdanak ai, i Jerusalem, seng pamotohan ni namatoras-Ni.
44 Iagan sidea, na dob rap Ia pakon odoran ni sidea, jadi idalani sidea ma parsadarian, laho mangindahi-Si i tongah-tongah ni sindohor ampa na tinanda.
45 Jadi halani lang jumpah, mulak ma sidea hu Jerusalem, laho mangindahi-Si.
46 Dob salpu tolu ari, jumpah sidea ma Ia i rumah panumbahan, hundul i tongah-tongah ni guru-guru, manangihon hata ni sidea lanjar manungkun-nungkun.
47 Longang do haganup na mambogei-Si, halani torus ni uhur-Ni ampa balos-Ni.
48 Jadi dob ididah sidea Ia, tarsonggot ma sidea. Nini inang-Ni ma hu Bani, “Mase ma sonin pambahen-Mu, Anaha? Tonggor ma, rusak do uhurhu pakon bapa-Mu mangindahi Ho!”
49 Jadi nini ma hubani sidea, “Mase ma pala pindahan nasiam Ahu? Ai lang ibotoh nasiam, na patut do Ahu ibagas rumah ni Bapang-Ku?”
50 Tapi seng iarusi sidea hata na hinatahon-Ni ai bani sidea.
51 Jadi mulak ma Ia rap pakon sidea hu Nasaret, anjaha pambalosi do Ia bani sidea. Iparimbagaskon inang-Ni do ganup na masa ai ibagas uhurni.
52 Anjaha lambin tambah do hapentaran ni Jesus sonai angkula-Ni, anjaha iharosuhkon Naibata ampa jolma do Ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA