Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq waktu nike Kaisar Agustus mrẽntahang selapuq warge negare Kerajaan Roma daptarang diriqne jari tesensus.

² Niki sẽnsus saq penembẽq telaksaneang sewaktu Kirenius jari gubernur negeri Siria.

³ Keranaq nike selapuq dengan lumbar daptarang diriqne lẽq kotene mẽsaq.

⁴ Yusup ẽndah berangkat lẽman Nazaret lẽq Galilea, ojok Betlehem lẽq Yudea, taoq Raje Daud tebijeang; sẽngaq Yusup keturunan Daud.

⁵ Yusup daptarang diriqne kance Mariam tunanganne, saq kenyeke betian.

⁶ Waktu ie pade lẽq Betlehem sampun wayene Mariam gen bebije.

⁷ Ie bijeang sopoq kanak mame, bijene saq sengake. Kanak nike bungkusne kadu kain lampin, terus toloqne lẽq dalem palung berisi jami; sẽngaq ie pade ndẽq mauq taoq mererepan.

⁸ Lẽq kelem nike araq pengarat-pengarat saq kenyeke jagaq dombe-dombene lẽq lendang pupaq lẽq daẽrah nike.

⁹ Selung-selung nganjeng malaẽkat Tuhan lẽq dẽkẽt ie pade, dait kemuliean Tuhan besinar menahin ie pade, dait ie pade takut gati.

¹⁰ Laguq malaẽkat nike bebase, "Ndaq takut! Sẽngaq tiang dateng jauq kabar solah tipaq side pade -- berite saq nyenengang gati tipaq selapuq dengan.

¹¹ Jelo niki lẽq kote Daud sampun tebijeang Juruselamet, Almasih, Junjungan Saq Mulie.

¹² Niki tandene: Side pade gen ndait sopoq bebẽaq tebungkus kadu kain lampin, dait tetindoqang lẽq dalem palung."

¹³ Selung-selung malaẽkat nike teiring siq luwẽq malaẽkat lain saq memuji Allah. Ie pade bebase,

¹⁴ "Kemuliean tipaq Allah lẽq taoq saq maheagung! Dait damẽ sejahtere lẽq gumi tipaq manusie saq nyenengang Allah!"

¹⁵ Sesampun malaẽkat-malaẽkat nike bilin ie pade dait tulak ojok sorge, pengarat-pengarat nike bebase sopoq kance saq lainne, "Silaq ite ojok Betlehem dait serioq peristiwe saq telaksane nike, saq temanikang siq Tuhan tipaq ite."

¹⁶ Ie pade becat-becat lumbar, beterus daitne Mariam kance Yusup, dait bebẽaq nike kenyeke tetindoqang lẽq dalem palung.

¹⁷ Waktu pengarat-pengarat serioq bebẽaq nike, ie pade nuturang napi saq tesampẽang siq pare malaẽkat mengenai bebẽaq nike.

¹⁸ Dait selapuq dengan bengaq dengah cerite pengarat-pengarat nike.

¹⁹ Laguq Mariam seboq selapuq hal nike lẽq dalem angenne dait tetep mikirang hal nike.

²⁰ Pengarat-pengarat nike tulak sambil memuji dait mulieang Allah, sẽngaq selapuq saq sampun ie pade dengah dait serioq, pade maraq saq sampun tesampẽang siq malaẽkat tipaq ie pade.

²¹ Sesampun beumur baluq jelo, bebẽaq nike tesunat. Dait ie pade ngaranin Ie Isa, maraq saq tesampẽang siq malaẽkat tipaq ie pade, sendẽqman Ie tepetianang siq mamiq bini-Ne.

²² Tipaq wayene Mariam dait Yusup ngelaksaneang adat penyucian menurut Hukum Taurat Musa. Jari ie pade jauq Kanak nike ojok Yerusalem jari teserahang tipaq Tuhan.

²³ Sẽngaq lẽq dalem Hukum Tuhan tetulis maraq niki, "Sebilang kanak mame saq sengake, harus tesuciang bagi Tuhan."

²⁴ Ie pade ẽndah beniat ngaturang kurban sepacek kedit petuq atao due anak kedit dare, maraq saq tetentuang lẽq dalem Hukum Tuhan.

²⁵ Waktu nike lẽq Yerusalem araq sopoq dengan aranne Simeon. Ie dengan solẽh dait taat lẽq Allah serte kenyeke ngantih penghiburan tipaq Israel. Roh Suci araq bareng kance ie,

²⁶ dait Roh Suci sampun nyampẽang lẽq ie bahwe ie ndẽq gen ninggal sendẽqman serioq Almasih saq tejanjiqang siq Tuhan.

²⁷ Siq bimbingan Roh Suci, Simeon tame ojok Gedẽng Allah. Lẽq waktu nike Yusup dait Mariam jauq tame Deside Isa, saq masih kodẽq nike jari ngelaksaneang upacare saq teprẽntahang siq Hukum Taurat.

²⁸ Make Simeon bait Kanak nike dait umbaq Ie, terus Simeon memuji Allah,

²⁹ "Mangkin Tuhan, menengang hambe Deside niki lumbar lẽq dalem damẽ sejahtere, sesuai manik Deside,

³⁰ sẽngaq siq penenteng tiang mẽsaq sampun tiang serioq keselametan saq lẽman Deside,

³¹ nike keselametan saq sampun Deside siepang umaq selapuq bangse,

³² nike terang saq nyatayang pekayunan Deside umaq bangse-bangse lain, dait jari kemuliean bagi umat Deside, Israel."

³³ Yusup dait Mariam jari bengaq dengah napi saq teucapang siq Simeon mengenai Bije ie pade.

³⁴ Simeon ngucapang berkah lẽq ie pade, dait bebase lẽq Mariam, mamiq bini Kanak nike, "Kanak niki sampun tetentuang siq Allah jari binaseang atao jari nyelametang luwẽq dengan Israel. Ie ẽndah gen jari tande saq nimbulang pertentangan,

³⁵ sehingge pikiran dait angen luwẽq dengan jari nyate. Kesedihan gen nusuk atẽnde maraq klẽwang saq merang."

³⁶ Araq ẽndah sopoq nabi nine saq sampun lingsir gati, aranne Hana, bije Panuel lẽman suku Asyer. Sesampun pituq taun merariq,

³⁷ Hana jari bebalu, dait mangkin umurne baluq pulu empat taun. Sengonẽq nike ie ndẽq uwah bilin Gedẽng Allah. Kenjelo-kekelem ie beribadah tipaq Allah lẽq derike dait bedo'e kance puase.

³⁸ Tepat waktu nike ẽndah ie dateng ojok derike, terus ngucapang syukur tipaq Tuhan dait bebaos mengenai Kanak nike tipaq selapuq dengan saq ngantih waktu pembẽbasan Yerusalem.

³⁹ Sesampun Yusup dait Mariam ngelaksaneang selapuq saq tewajibang Hukum Tuhan, ie pade ulẽq ojok Nazaret lẽq Galilea.

⁴⁰ Kanak nike sayan belẽq dait kuat. Ie bijaksane gati dait rahmat Allah araq lẽq Ie.

⁴¹ Sebilang taun mamiq bini dait mamiq laki Deside Isa lumbar ojok Yerusalem jari ngerayeang Jelo Paskah.

⁴² Dait sewaktu Deside Isa beumur due olas taun, ie pade lumbar ojok perayaan nike maraq biasene.

⁴³ Sesampun perayaan nike inggas ie pade ulẽq, laguq Deside Isa, Bijene nike, masih ndot lẽq Yerusalem, ndẽq tetaoq siq mamiq bini dait mamiq laki-Ne.

⁴⁴ Ie pade paran Deside Isa lumbar turut rombongan. Sesampun lampaq sejeloan, baruq ie pade boyaq Deside Isa lẽq antare selapuq keluarge dait selapuq saq ie pade kenal.

⁴⁵ Laguq ie pade ndẽq ndait Ie, jari ie pade tulak ojok Yerusalem boyaq Deside Isa.

⁴⁶ Sesampun telu jelo boyaq Deside Isa, daitne Deside Isa araq lẽq Gedẽng Allah kenyeke melinggih pirengang guru-guru agame dait metakẽn mengenai luwẽq hal lẽq ie pade.

⁴⁷ Selapuq dengan saq dengahang Ie bengaq lantaran pengertian saq araq lẽq Ie dait jawaban-jawaban saq Ie sampẽang.

⁴⁸ Mamiq bini dait mamiq laki-Ne ẽndah bengaq serioq Ie. Mamiq bini-Ne bebase lẽq Ie, "Nune, kembẽq maraq niki entan-De lẽq tiang pade? Bapaq-De dait tiang kuatir boyaq Side!"

⁴⁹ Jawab Deside Isa, "Kembẽq side pade boyaq Tiang? Napi side pade ndẽq nenaoq Tiang harus araq lẽq dalem gedẽng Bapa Tiang?"

⁵⁰ Laguq ie pade ndẽq ngerti jawaban Deside Isa.

⁵¹ Beterus Deside Isa mantuk bareng ie pade ojok Nazaret, dait Deside Isa taat lẽq ie pade. Selapuq hal nike seboqne lẽq dalem angenne siq Mariam.

⁵² Deside Isa jari sayan belẽq dait sayan bijaksane, serte sayan tekasihin siq Allah dait manusie.

Lukas

Video Lukas 2

Ikuti Kami:

KONTAK | PARTISIPASI | DONASI