Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ineh teh Raca' Augustus nemaré ukum kuan amung anak itinneh, pad ideh amé' uen ngiap.
2 Kareb iap luk pun-pun ini inau' idi Krinius ineh Lun luk Ngimet Bawang Siria.
3 Idi amungdeh iné' pad uen ngiap bang bawangdeh sebuleng.
4 Yusup nenalan rat bawang Nasarét bang babpat Galilia iné' Baitlahim bang bawang Yudia, ngaceku ieh inul Daud.
5 Yusup iné' uen ngiap pad- pad dengan Mariam, tudukneh luk mali'.
6 Idi kareb didueh déi' Baitlahim, Mariam pana' mabud bulanneh miak nenganak.
7 Ieh nenganak aceh anak deléi, ieh ineh anak luk atun, idi ieh nengelabin Neneh ku kibung luk do' laya', idi nengerareng Neneh bang bau' sapi', ngaceku na luk idi luk inan kuan lemulun ineh bang ruma' sakai'.
8 Idi bang bawang ineh pana' inan tuda'-tuda' lun matar luk tudo déi' natad matar aya'deh kareb malem aco.
9 Idi denak-denak sebuleng melaikat Tuhan netuped iringdeh, idi rayeh Tuhan pana' merasat libut-libutdeh, idi ideh pelaba tot.
10 Iamo' kebala melaikat ineh nedeh, "Aleg matot, ngaceku ui ngacing kuan muyuh aceh bala luk do' ratnan awang luk rayeh luk miak macing kuan amung-amung pupu.
11 Aco sini aceh Lun Ngulun pangeh tinganak kuan muyuh bang bawang Daud, ieh ineh Keristus Tuhan ineh.
12 Idi ini tanu'Neh kuan muyuh; muyuh miak papu' aceh anak luk libin ku kibung luk do' laya' idi luk rireng bang bau' sapi'."
13 Denak-denak aceh baweh luk rayeh rat surga netuped dengan melaikat ineh, idi nengubur Allah, kebaladeh:
14 "Amung rayeh kuan Allah bang langit luk meluun dita', idi awang luun tana' rat arang lemulun luk inanNeh mawa!"
15 Idi kareb amung melaikat ineh nelemubed rat nedeh iné' surga, idi lun matar ineh nepebala seburur dengan seburur, "Amé' tau déi' Baitlahim idi nier luk pangeh nangun ineh, luk pangeh bida' Tuhan netau."
16 Idi ideh pana' nenalan dengan mesaget, idi nepapu' ni Mariam idi Yusup, idi ideh nekali' anak ineh rireng bang bau' sapi'.
17 Kareb lun matar nenier Neneh, idi ideh nemada' bala luk pangeh bila nedeh ratnan anak ineh.
18 Idi amung lemulun luk neninger ineh pana' mawa ratnan luk bila lun luk matar ineh nedeh.
19 Iamo' Mariam nengerawé amung bala ini bang niatneh.
20 Idi lun matar ineh pana' nelemubed dengan ngerayeh idi ngubur Allah, ngaceku ratnan amung-amung luk pindengerdeh idi sinierdeh, mepad kudeng luk bila kuandeh atun.
21 Pangeh ualuh aco kareb anak ineh miak uen nunat, idi ideh nemaré ngadan Yésus Neneh, maya' kudeng luk bila melaikat, kareb nateh Ieh nangun bang nakan.
22 Kareb mabud aco luk inan sibaru' maya' Ukum Musa, Yusup idi Mariam nenguit anak ineh iné' Yerusalim pad maré Neneh kuan Tuhan,
23 maya' kudeng luk inayud bang ukum Tuhan: "Idi anid-anid anak deléi luk pun-pun ngukab nakan tinanneh miak tetanen meligan kuan Tuhan."
24 Didueh sikal maré luk barén bang Ruma' Allah, maya' kudeng luk titen bang ukum Tuhan, ieh ineh, "Dueh suit sukur, idi dueh suit limun."
25 Idi déi' Yerusalim inan seburur lemulun, ngadanneh Simion. Ieh ineh lemulun luk matu idi luk matot inan Allah, idi ieh nganét aco luk inan Israil uen ngulun. Idi Roh Meligan idi denganneh.
26 Idi Roh Meligan pangeh nengelio kuanneh, ratnan ieh na miak maté kareb nateh ieh nenier Keristus Tuhan ineh.
27 Idi dengan lalud Roh ineh Simion nesemuet bang Ruma' Allah. Kareb taman-tinan Yésus nenguit Yésus anak ineh semuet pad lemulun miak nganau' kuanNeh maya' kudeng Ukum Musa,
28 idi Simion nengalap Neneh, idi nengubur Allah, kebalaneh:
29 "O Tuhan, Iko pangeh nemaya' jani'Mu, pad Iko miak nima' negku maté dengan awang.
30 Matehku pangeh nenier ulun luk rat Namu,
31 luk tinina'Mu pa kiung amung pupu:
32 Ieh ineh aceh acang luk ngelio dalanMu kuan lun pupu baken, idi ngacing rayeh kuan pupuMu Israil."
33 Idi taman-tinan Anak ineh mawa ratnan luk bila Simion ratnan Ieh.
34 Simion nengeperuan nedidueh, idi nepebala ni Mariam, tinanNeh ineh, "Anak ini pinili' Allah pad ngaté idi nui mula' lun Israil. Ieh miak mangun ku aceh tanu' ratnan Allah luk uen lun mula' ngilang,
35 pelé ngegala' terawédeh luk inalum. Idi susa' miak ngeruruk niatmu mepad kudeng pelapet luk metadem."
36 Idi inan teh seburur nabi luk decur, ngadanneh Anna Panuil, ratnan inul Asir. Idi ieh mengered. Pangeh ieh nengaweh tudu' lak idi awanneh naté,
37 idi ieh tinula' ualuh ngepulu' apat lak kinioneh. Idi na ieh nenecan Ruma' Allah, iamo' tebaco kedangan ieh sembayang nan Allah dengan mawa' idi mutuh ratnan Allah.
38 Kareb ineh teh ieh nacing maré ubur inan Allah, idi nepebala ratnan anak ineh kuan amung lemulun luk nganét Allah nguli' Yerusalim.
39 Kareb ideh pangeh nenganau' amung-amung luk petulu maya' ukum Tuhan, idi ideh nuli' iné' Nasarét luk bang bawang Galilia.
40 Idi anak ineh netemubu' idi amé' metueh, idi Ieh mepanu' ku ileh, idi katu Allah pana' idi denganNeh.
41 Idi anid-anid lak taman-tinan Yésus amé' Yerusalim ku Irau Paska.
42 Kareb ulunNeh pulu' dueh lak, idi ideh iné' ku irau mepad kudeng luk pekalai.
43 Kareb mabud aco irau ineh, didueh nuli', iamo' Yésus anak ineh neketecan déi' Yerusalim dengan na nekali' taman-tinanNeh.
44 Iamo' terawé didueh Ieh idi arang lemulun luk nalan maya' dalan ineh, pad macing seaco kiadoneh dinalandeh, idi didueh nenakap Neneh arang pupu idi lun dengandeh;
45 iamo' didueh na nepapu' Neneh, idi didueh nelemubed iné' Yerusalim nakap Neneh.
46 Kareb mabud teluh aco didueh nepapu' Neneh bang Ruma' Allah uned tudo arang lun guru-guru. Idi Ieh neninger baladeh idi nengitun-ngitun nedeh.
47 Idi amung lemulun luk neninger Neneh ineh pana' mawa ratnan ileh idi orNeh.
48 Idi taman-tinanNeh mawa nenier Neneh, idi keburi' tinanNeh kuanNeh, "O Anakku, anunké punneh Iko nganau' kudeng ini kuan kai? Kai dueh dengan mesusa' nakap Namu."
49 Idi kebalaNeh nedidueh, "Anunké punneh medueh nakap Negku? Naké medueh kali' idi Ui kali' rungen bang ruma' TamanKu?"
50 Iamo' taman-tinanNeh na kali' ilung ratnan bala luk bilaNeh ineh.
51 Idi Yésus nemaya' nedidueh nuli' iné' Nasarét. Idi Ieh nemaya' bala didueh. Idi tinanNeh nenganug amung ineh bang niatneh.
52 Idi Yésus iuk-iuk amé' rayeh idi mileh, idi ngalap katu Allah idi lemulun pana'.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA