Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Me inõtõ da'õ ibe'e wareta Kaisaro Auguso ena'õ lafasura'õ dõira fefu ono mbanua ba Gamatõrõw̃a Roma.
2 Fanura tõi andrõ si fõfõna tefalua me luo gubernur ba danõ Ziria Gerenio.
3 Numalõ fefu niha ba wamanura'õ tõira ba mbanuara zamõsana.
4 Mofanõ gõi Yosefo moroi ba Nazareta ba danõ Galilea, numalõ ia ba Mbetilekhema tanõ Yudea, nahia wa'atumbu Razo Dawido; bõrõ me nga'õtõ Dawido ia.
5 Ifatanõ'õ dõinia Yosefo si fao Maria andrõ sinandrania, sanabina.
6 Me larugi Mbetilekhema, irugi inõtõ khõ Maria wo'ono.
7 Madono ia ono matua, ono sia'a. Ilõlõ nono andrõ faoma nukha, ba ifagaya yaw̃a ba naha gõ gurifõ; me lõ lasõndra nomo nahia wemõrõ.
8 Ba danõ andrõ so ndra kubalo sanaro biribirira ba mbolo mbenua ba zi bongi.
9 Ba i'ondrasi ira mala'ika Zo'aya, ihagaini ira lakhõmi Zo'aya, irege ata'u sibai ira.
10 Ba hiza, imane khõra mala'ika andrõ, "Bõi mi'ata'ufi! Hiza, mõi ndra'o khõmi ba wolohe turia somuso dõdõ -- turia sangomusoi'õ tõdõ niha fefu.
11 Ma'õkhõ andre no tumbu ba mbanua Dawido, Razo Sangorifi, ya'ia Keriso So'aya.
12 Da'e dandrania: Mi'ila dania Nono si no mulõlõ nukha, no tefagaya yaw̃a ba naha gõ gurifõ."
13 I'anema'õ tohare mala'ika sato awõ mala'ika no mege, lasuno Lowalangi. Lamane,
14 "Lakhõmi khõ Lowalangi si yaw̃a ba nahia fondrege zalaw̃a! Ba fa'ohahau dõdõ ba gulidanõ, ba niha sangomusoi'õ tõdõ Zo'aya!"
15 Me no mofanõ mala'ika andrõ ba zorugo, me no larõi ndra kubalo, ba faoma lamane khõ nawõra kubalo andrõ, "Mitabu mõi ita ba Mbetilekhema wamaigi hadia zi no alua andrõ, ni'ombakha'õ Zo'aya khõda!"
16 Mofanõ ira, ba falukha ira Maria ba Yosefo awõ Nono andrõ si no tefagaya ba naha gõ gurifõ.
17 Me la'ila ira kubalo, latutunõ hadia niw̃a'õ mala'ika sanandrõsa ba nono andrõ.
18 Ba oi ahõlihõli dõdõ niha wamondrongo nidunõdunõ ndra kubalo andrõ.
19 Ba itanõ manõ ba dõdõnia fefu da'õ Maria awõ wa ifatoutou tõdõnia.
20 Ba lafuli ira kubalo, lasuno Lowalangi bõrõ me fefu ni'ilara ba nirongora faudu si mane niw̃a'õ mala'ika khõra.
21 Me no irugi w̃alu bongi wa'ebua Nono, ba laboto Ia. Labe'e tõi-Nia Yesu, tõi nibe'e mala'ika khõ-Nia fatua lõ na tabina Ia.
22 Ba me irugi inõtõ khõ Yosefo ba Maria wamalua hada fangamoni'õ molo'õ huku agama nibe'e Moze, ba la'ohe Nono andrõ ba Yeruzalema ba wanou'õ khõ Zo'aya.
23 No musura ba zura Goroisa Zo'aya si mane da'e, "Fefu nono matua sia'a, lõ tola lõ latou'õ khõ Zo'aya."
24 Fe'amõi Yosefo awõ Maria ba Yeruzalema ya'ia ba wame'e sumange, ya'ia da'õ safasa wune ba dombua nono marafadi, si mane nihonogõi bakha ba zura goroisa Zo'aya.
25 Me inõtõ da'õ so ba Yeruzalema zotõi Simeoni. Niha satulõ tõdõ ia, sangata'ufi Lowalangi ba sombalombaloi inõtõ wangorifi Lowalangi niha Gizera'eli. Fao khõnia Geheha Lowalangi,
26 ba no I'ombakha'õ khõnia Eheha Lowalangi wa lõ mate ia fatua lõ ni'ilania Razo Sangorifi nifabu'u Lowalangi.
27 Bõrõ wamarou Geheha Lowalangi, mõi Zimeoni ba Nomo Zo'aya. Me inõtõ da'õ la'ohe ira Yosefo ba Maria Yesu si no ide'ide andrõ nasa ba wamalua khõ-Nia si mane ni'oroi'õ ba wamahaõ agama.
28 Ihalõ Nono andrõ Simeoni ba ihahae, isuno Lowalangi, Imane,
29 "He So'aya, iada'e no Õfatõrõ wawu'usa li-Mõ andrõ. Akha mate zawuyu-Mõ andre ba wa'ahono dõdõ.
30 Bõrõ me no u'ila hõrõgu samõsa Zangorifi andrõ soroi Ndra'ugõ.
31 No Ihenagõ Zangorifi ba niha fefu soi:
32 Hulõ haga sohagaini lala ba soi bõ'õ, ena'õ la'ondrasi Ndra'ugõ; ya'ia haga solohe lakhõmi ba mbanua-U niha Gizera'eli."
33 Ba ahõlihõli dõdõ nama awõ nina Nono andrõ, me larongo niw̃a'õ Zimeoni andrõ sanandrõsa khõ Nonora.
34 Ifahowu'õ ira Simeoni ba imane khõ Maria, ina Nono andrõ, "No Ifili Nono andre Lowalangi ba wamakiko ba ba wangorifi niha Gizera'eli sato. Tobali Ia tandra soroi Lowalangi, nifa'udusi niha sato,
35 ba bõrõ zi manõ tefaehagõ ni'era'era dõdõra. Ifahõ dõdõu fa'abu dõdõ hulõ wõda satarõ."
36 So gõi zama'ele'õ ira alawe si no atua sibai, Ana dõinia, ono Wanueli, moroi ba mado Gaseri. Me no fitu fakhe mangowalu ia,
37 ba tobali lakha mbanua ia, no w̃alu ngafulu a õfa fakhe wa'atuania. Lõ irõi Nomo Zo'aya. Bongi ma'õkhõ ilulu ia khõ Lowalangi ba wangandrõ ba ba wamoni.
38 Faudu ba ginõtõ andrõ tohare ia, isuno Lowalangi ba fahuhuo ia sanandrõsa ba Nono andrõ ba niha fefu sombalombaloi inõtõ wangefa'õ Lowalangi Yeruzalema.
39 Me no aefa lafalua fefu goroisa Lowalangi, ba mangawuli ira ba nomora ba Nazareta ba danõ Galilea.
40 Itugu ebua ba abõlõ Nono andrõ. Fondrege wa'atuatua-Nia ba Ifahowu'õ Ia Lowalangi.
41 Ero rõfi mõi zatua Yesu ba Yeruzalema ba Gowasa Fasa.
42 Me no felendrua fakhe wa'ebua Yesu, mõi ira ba Wasa andrõ, molo'õ si to'õlõ ira.
43 Me no aefa Wasa, mangawuli ira, ba hiza no torõi nasa Yesu ba Yeruzalema, ba zi lõ la'ila ira satua-Nia.
44 Lawalinga no fao Ia ba nawõra fao ba wangawuli ba Yeruzalema. Me no ma'õkhõ fowaõwaõ awena la'alui Ia ba gotalua ndra talifusõ awõ zi fa'ila khõra.
45 Ba hiza lõ lasõndra, andrõ wa mangawuli ira ba Yeruzalema ba lõ labato wangalui.
46 Me no tõlu ngaluo la'alui, lasõndra Ia no mudadao ba Nomo Zo'aya ba wamondrongo awõ wame'e fanofu khõ ndra sangila amakhoita.
47 Dozi samondrondrongo huhuo-Nia ba oi ahõlihõli dõdõra ba wa'atuatua-Nia wanema li.
48 Ba tobali dõdõ ndra satua-Nia ba wangila Ya'ia. Imane khõ-Nia ina-Nia, "He Onogu, hana wa Õlau khõma zi mane? Ya'o ba Ama-U no sabu tõdõ ba wangalui Ya'ugõ!"
49 Itema li Yesu, "Hana wa mi'alui Ndra'o? Hadia lõ aboto ba dõdõmi wa lõ tola lõ'õ so Ndra'o ba nomo nama-Gu?"
50 Ba hiza, lõ aboto ba dõdõ Yosefo ba Maria niw̃a'õ-Nia andrõ.
51 Aefa da'õ fao Yesu wangawuli ba Nazareta, I'o'õ niw̃a'õra. Fefu zalua andrõ itanõ ba dõdõnia ina-Nia.
52 Itugu ara ba itugu ebua Yesu, ba itugu tedoudou wa atuatua-Nia awõ wa I'omasi'õ Ia Lowalangi ba he gõi niha.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA