Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ri tempo kare’e i Yohanes etu, tempo etu re’e porenta yako resi i Kaisar Agustus, makole nto Roma. Ia manganto’o samparia tau ri lino to re’e ri ara ngkuasanya daratulis sanganya see nansani patanya kaborosinya tau etu.
2 Wali etu semo pangantulis sanga to uyunya kojo. Tempo etu i Kirenius semo gubernur ri propinsi Siria.
3 Wali samparia tau to naporentangika i Agustus, sira mawolili muni njo’u lipu nsira samba’a pei samba’a see daratulis sanganya.
4 Pasi i Yusup, to kasimpande i Maria, ia seja mayoko yako ri kota Nasaret nja’u propinsi Galilea. Ia yau ri kota Betlehem to nja’u propinsi Yudea. Wali naka pei i Yusup yau ri Betlehem apa ia samba’a wiyaa i Makole Daud to maroo nja’u ria tempo owi.
5 Wali ia yau njo’u ria daratulis sanganya. Pasi ia mangkeni seja kasimpadenya, i Maria. I Maria etu baemo komponya ri tempo etu.
6 Wali tempo sira dua nja’uwa nja’u Betlehem ratamo temponya i Maria moana.
7 Sira yau njo’u banua nakayore ntau to rata pei taa soa. Wali sira yau mampago pasuli napampiara ntau binatang. Panewa nja’u ria semo i Maria mampoanaka ananya to tu’anginya, etumo ana langkai. Ojo kare’enya ana kodi etu ijamumukanya kain panewa inulinya ri raya ndula, tampa rapampokoni binatang.
8 Wali wuri etu re’e bara sawei mba’a to pangkampang domba to mangangkampang dombanya nja’u pada to taa longko kojo yako ri kota Betlehem.
9 Tempo sira mangangkampang dombanya etu, kodi majoli re’e samba’a pomakau i mPue yako ri saruga rata resi sira. Pasi reme i mPue to makilo kojo mangansindo sira. Wali meka kojo raya nsira.
10 Pei pomakau i mPue etu manganto’oka sira, “Ne’e meka! Apa aku rata mangangkenika komi kareba matao to damampakandende raya ntau samparia.
11 Apa seo si’i nja’u Betlehem, kota to nakaroo i Makole Daud tempo owi, rapoanakamo to Pansompo ngkomi. Ia i Kerisitu, Makole parajanji i mPue Allah, i Pue semo.
12 Wali intamo pei liwu Ia. Ewa si’i tondong see ane nurata ngkomi danunsanika Ia: Komi damangarata Ana kodi to rajamumuka kain pasi rauli ri raya ndula, tampa rapampokoni binatang.”
13 Wali ojo karoonya pomakau i mPue etu manganto’o gombo etu, kodi majoli rata seja yununya to boros kojo yako ndate saruga. Sira mangabarong i Pue Allah to’onya,
14 “I Pue Allah rabarong ndate saruga, tampa to malangan kojo. Pasi ri lino si’i, tuwu-tuwuja dare’e kasingkatao ri oyo ntau to mangarata kanoto i mPue Allah.”
15 Wali ojo karoonya pomakau i mPue Allah etu mangabarong i Pue Allah sira mampiyaika tau etu pei mawolili muni nto’u saruga. Roo see to pangkampang domba etu magombo samba’a pei samba’a, sira manganto’o, “Anu kita yau njo’u Betlehem, yau damangalo’a palaong to nawali to roomo napaponsanika i mPue kita etu.”
16 Wali sira majoli yau, panewa rata nja’u Betlehem sira mangarata i Maria sira togo i Yusup pasi Ana kodi to rauli ri raya ndula, tampa rapampokoni binatang.
17 Tempo sira mangkita Ana kodi etu, sira mangansaritaka mangkonong gombo to nato’oka mpomakau i mPue sira mangangkonong Ana kodi etu.
18 Pasi samparia tau to mangandonge sarita to nato’oka nto pangkampang domba sira etu, sira paka ipu kojo rayanya.
19 Pei ane i Maria, ia taa mangkalingan palaong to mawali etu. Ia mandudu mampobuubuuka mangkonong samparia to etu.
20 Wali yako etu to pangkampang domba mawolili muni mampago dombanya. Ri raya mpalinja yau muni etu, sira mampakabae pasi mangabarong i Pue Allah apa saba samparia to roomo nadonge nsira pasi to nakita nsira. Apa samparia palaong to etu singkonong kojo pei anu to nato’oka yami mpomakau i mPue sira.
21 Wali ojo kagananya wayu mbengi yako ri kare’e nu Ana kodi etu, ratamo temponya Ia rasui mangalulu ada nto Yahudi. Wali tempo etu semo Ia rasangaka i Yesu, singkonong ewa to roomo nato’oka mpomakau i mPue Allah i Maria tempo i Maria tawa mangkayu’uka.
22 Wali yako etu ratamo temponya i Yusup sira dua i Maria damangika pampue ewa ratulis ri raya mporenta i Musa mangkonong tau to moanamo. Pampue etu naika nsira see tau we’a etu danato’o i mPue Allah mayongo muni. Wali sira yau ndeku Yerusalem damampampueka pampue to singkonong pei porenta i Musa, etu semo dua mba’a tagou bara dua mba’a ana ntonsi merpati. Pasi tempo sira yau etu, sira mangkeni seja Ana kodi see damangkeni ri raya banua i mPue Allah pei mampatimonso Ia i Pue Allah pueNya. Naka pei sira mangika palaong to etu, apa re’e ratulis ri raya mporenta i mPue manganto’o, “Samparia ngana to tu’anginya to langkai darato’oka i Pue puenya.”
23 (2:22)
24 (2:22)
25 Wali tempo etu, ndate Yerusalem re’e samba’a to langkai sanganya i Simeon. I Simeon etu ia tau to lengkonya singkonong pei i Pue Allah, pasi ia madota kojo mampue mampakabae i Pue Allah. Pasi ia mangampeas kojo temponya to Israel darapalaes yako ri bali nsira. Wali i Nosa Mapasing re’e resi i Simeon,
26 pasi i Nosa Mapasing etu roomo mampaponsanika yami i Simeon ia tawa damate ane tawa ikitanya i Kerisitu, Makole parajanji i mPue.
27 Wali i Nosa Mapasing manganto’oka i Simeon yau masua ri raya banua i mPue Allah, see naka ia yau. Tempo ia re’e ri raya banua etu, rata seja i Yusup sira togo sana. I Yusup pasi i Maria mangkeni Ananya ri raya banua i mPue Allah damampatimonso Ia i Pue Allah pueNya singkonong ewa porenta i Musa.
28 Wali tempo sira togo rata etu, i Simeon yau mangoko Ana kodi pei mansokowaka Ia. Ia mangabarong i Pue Allah, manganto’o,
29 “Pue, Komi roomo mangabanang parajanjiMu resi aku, to papolaong ngKomi. Wali biakamo nempo aku mate si’i-si’i, apa rayangku masanang.
30 Apa matangku re’emo mangkita Ia to nupokau ngKomi damampalaes to lino.
31 Ia semo to Pansompo to nuwai ngKomi see samparia to lino damangkita Ia.
32 Wali Ia ewa pansona to mampakaremeka tau to si’a to Yahudi jaya to monso see sira maya mangansani Komi. Pasi apa saba Ia see naka tau ngKomi, to Israel semo, darabarong apa Ia seja samba’a to Israel.” Wali etu semo gombo i nSimeon mangabarong i Pue Allah.
33 Wali pa’a pei indo nu Ana kodi etu ipu kojo raya nsira mangandonge gombo to nato’o i nSimeon mangkonong palaong to danaika nu Ana etu.
34 Roo see i Simeon mampokaika sira mamporapika resi i Pue Allah see Ia mangawaika sira rasi. Panewa ia manganto’oka i Maria, indo nu Ana kodi etu, ia manganto’o, “Lo’aja Ana si’i, Ia napilis i mPue Allah, wali apa saba Ia see naka boros kita to Israel to darapalaes. Pei boros seja to darapakaja’aka yau apa sira bo’onya mampalaika Ia. Wali Ia ewa tondong to mangansuduka tau jaya darata resi i Pue Allah, pei boros tau to bo’onya mangalulu jaya etu, see naka sira damanganto’o maja’a Ia.
35 Wali yako gombo nsira to maja’a etu kita maya manasa ewa wimba kamonsonya pampobuuka ntau boros. Pei ane korom, Maria, korom damangarata kamawo ndaya to maya raporapaka ewa yu’a to mangantuja rayamu.” Wali etu semo gombo to nato’oka i nSimeon i Maria.
36 Wali nja’u ria re’e seja samba’a to pantuntu tuntu i mPue Allah to we’a, sanganya i Hana. Ia ana i mPanuel, yako wiyaa i Asyer. Wali i Hana etu tu’a kojomo. Ia pitu nto’u maroo siwaka pei rongonya yako ri temponya sira rapasiwaka.
37 Roo see mate yau rongonya etu, panewa roo see ia tau balu rataka ri temponya ia wayu mpuyu pei opo nto’u. Wali ia jamo maroo-roo ri raya banua i mPue Allah, tamo mampiyaika banua etu. Pasi wuri-eo ia mampue mampakabae i Pue Allah. Pasi ri rayanya ia mampue mampakabae i Pue Allah etu ia mandudu mangorop pasi makai-kai.
38 Wali tempo i Yusup sira togo sana tiroowa nja’u nja’u banua i mPue Allah, rata i Hana ri awe nsira pei mangkita Ana kodi etu. Tempo ia mangkita Ana kodi etu, ia manganto’oka i Pue Allah tarima matao. Pasi ia magombo mangkonong Ana kodi etu resi samparia tau nja’u ria to masanang mangampeas temponya i Pue Allah damangalapa muni tau Yerusalem yako ri kasusa nsira.
39 Wali ojo karoonya i Yusup pasi i Maria mangika samparia to nato’oka mporenta i mPue sira mangika, sira mawolili muni lo’u lipu nsira, etu semo kota Nasaret ri propinsi Galilea.
40 Wali Ana kodi etu kanjo’u-njo’u tiduga-dugang kabaeNya pasi karoso ndayaNya. Ia bae seja kapandeNya apa Ia sangkani nasawang i mPue Allah.
41 Wali ponto-ponto to’u tau tu’a i Yesu yau ndeku Yerusalem ane temponya roa rapangendo temponya to Israel naliunaka mpomakau to mangkeni kapate tempo ia mangkita raa to rapalasika ri wombo nsira lo’u tana Mesir tempo owi. Roa etu rato’oka Roa Paskah.
42 Pasi tempo i Yesu sampuyumo pei dua nto’u, sira togo yau wo’u mangansabi Roa etu ewa biasa naika nsira.
43 Wali ojo kaliunya Roa Paskah etu, i Yusup sira dua i Maria mayoko damawolili muni ri lipunya. Pei i Yesu anu damangurawa etu, Ia nda’awa nda’a Yerusalem, pei tau tu’aNya taa nansani.
44 Sira dua ojo mampandayaka Ia re’e ri oyo ntau boros to sinjaya pei sira. Wali ojo kagananya seo palinja nsira, sira mangaliwu i Yesu ri oyo nu ja’i nsira pasi tau to napobiasa nsira, pei sira taa mangarata Ia.
45 Wali tempo sira taa mangarata Ia etu, sira mawolili muni ndeku Yerusalem mangaliwuliwu Ia.
46 Wali ojo kagananya togo eo sira mangaliwu i Yesu, panewa sira mangarata Ia ri raya banua i mPue Allah. Ia re’e matunda ri oyo ntau to mampotunde agama nto Yahudi, Ia mangampodongeka gombo nsira pasi masipotanaka resi sira.
47 Wali samparia tau to mangandonge gombo i Yesu etu, paka ipu kojo raya nsira apa pande kojo pasonoNya.
48 Wali tempo tau tu’aNya mangkita Ia etu, sira ipu kojo rayanya, pei indoNya manganto’oka Ia, “Anangku, maka pei Korom mangika palaong si’i resi kami? Mawo kojo raya mami dua pa’amu tempo mangaliwu-liwu Korom.”
49 Pei i Yesu manganto’oka tau tu’aNya, Ia manganto’o, “Maka pei komi dua mangaliwu Aku? Bara taa nunsani ngkomi Aku taa maya taa mangika palaong mPa’angKu ri raya banuaNya?”
50 Ewa wetu nato’o i Yesu pei sira dua taa manasanya ewa wimba kamonsonya batuanginya gombo to Ia manganto’oka sira etu.”
51 Wali yako etu i Yesu mangalulu sira dua yau muni lo’u kota Nasaret, pei sangkani mampalaika songka nsira. Pei indoNya taa mangkalingan palaong to mawali etu. Ia mandudu mampobuu-buuka mangkonong samparia to etu.
52 Wali i Yesu kanjo’u-njo’u tidugadugang kapandeNya pasi kabaeNya. I Pue Allah masanang kojo resi Ia pasi yunuNya to lino masanang seja resi Ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA