Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'O wange motoa 'ipasa de ma 'Imam ma Amoko 'o Ananias de 'o Yahudioka ma balu-balusu de ma jaksa wimoi 'o Romaka manga hukumu woba-barija wi ronga 'o Tertulus, yaika ma gubernur Feliksika 'o Paulus wikalaki.

² 'O Tertulus gee wi'asoko ma bionisa, de wikalaki 'o Paulus konee, "'Aba ma gubernur, 'o nyawa ma amoko! To ngona ni pareta ma sigoronaka, 'amia daeraa koiruahewa. De to ngona mita 'ani barija, so 'o gudaiou 'isikadiaiokau to ngomi mia daeraaka.

³ 'Etei, minihoromati 'Aba! De mio'amalaha sababu kiaka naga bato ngomi 'o Yahudioka miomanoa, ma ge'ena 'iodumu miamao.

⁴ Ma 'uwa sigado 'Aba ni 'orasi kaiamoko pa'umo. So toga'asoko 'Aba, tanu de 'ani singina ma sure gee mianakokau ge'ena, nosigisene mia galaki miositipokono ne'ena.

⁵ Ngomi mimake 'o nyawa nu'una woruahe kaitorou. Kiaka naga bato waika ge'ena 'o Yahudi ma nyawaka 'o gangamo wodiai. De 'una wosibalusu 'o bolu moi gee manga guru 'o Nazaretino.

⁶ 'Ifoloiosi ge'ena wositailokau wamediri ma Jou wi Woa, ma kamitagokoka. [Ngomi miomau mi'urusu moteke to ngomi ma sirete mia 'agama ma besesongo.

⁷ Ma 'o Lisias ma tentara ma balusu wi'eseka ngomioka,

⁸ de wosuloko la mioka-kalaki gee miotaari ngonaka.] Nako 'Aba wonipirikisaa 'o nyawa nu'una, ngona ma sirete 'asa no'isene 'okia naga miokalakika ge'ena ma goungu."

⁹ Ma Yahudioka ge'enaka gee mita yomasimoteke 'o Paulus wikalaki, de yosimoteke 'okia naga 'o Tertulus wongose.

¹⁰ Ge'enaka de ma gubernur 'o no-nako wikula 'o Paulusika 'ato kaidadi wobicara. So ma rai 'o Paulus kawongosekau, "Ngoi tanako, 'Aba, ngona de ma taunuou nodadi hakimi ne'ena ma daeraaka. Ge'enau so ngoi tamao tosanangi tomariwo 'ani bionoka 'Aba.

¹¹ 'Aba, ngona ma sirete nalega ma diai, 'o wange mogiooko de modidi koipailuawasi ngoi totagi 'o Yerusalemuka ma ngale towisuba ma Jo'oungu ma Dutu.

¹² De koma'iwa 'o Yahudioka 'isidamake mimakangamo de moikani, bolo takitoomu 'o nyawa ma ngale mioruahe ma Jou wi Woaka bolo 'o lo-lomu ma woaka bolo kiaka naga bato ma kotaka ne'ena.

¹³ 'Ona mita ne'ena koya'akunuwa yosidumutu ngonaka, 'Aba, 'ai sala gee moteke manga galaki.

¹⁴ Ma goungu ngoi tomangaku ngonaka, 'Aba, 'ato ngoi towisuba ma Jo'oungu ma Dutu gee mia edete de mia dotumu wisuba-suba moteke 'o Yesus wi do-dotoko gee 'ona yamaoku koyadaenuwa. Ma ngoi katangaku ma Jo'oungu ma Dutu 'awi demo gee 'o Musa de 'o Nabii 'iregu manga bukuoka.

¹⁵ To ngoi 'ai ngo-ngaku ma Jo'oungu ma Dutuka 'isoka to 'onali, ge'ena la 'o nyawa yosonge-songenukou gee dua yomomikoli. 'O nyawa ma owa bolo ma dorou dua yokokimomikoli!

¹⁶ Ge'enau so tomariwo ka koge'enakau la 'ai singina 'itebini ma Jo'oungu ma Dutuka de 'o nyawaka.

¹⁷ 'O taunu muruo naga tamadaka 'o Yerusalem, de tolioli takidagasa 'o pipi ma ngale takiriwo 'ai nyawa de 'ai su-suba tokula ma Jo'oungu ma Dutuka.

¹⁸ Gee ma gu-gudaioka tosiduanga 'ai singina tatebini de 'o su-suba ge'ena, de 'ona 'imake ma Jou wi Woaka. Ma 'orasi ge'ena komiokudaiokawa ge'enaka, de mita koiruahewa.

¹⁹ Ge'enaka duga ka 'o Yahudi ma nyawa yamuruo naga 'o Asiano. So tanu salingou 'ona yoboano 'ikalaki ngonaka, nako naga de ma 'ena yomau 'ikalaki.

²⁰ Bolo ngaro no'onau yosidemo 'ai di-diai 'ito-torou ka'ena yamake gee 'isitaari 'o 'Agama ma Hakimika.

²¹ Yodamakeno duga ka 'ai demo 'o ngai moi koneda tongose manga bionoka: 'Ngoi 'i'urusu ne'ena ma wange, sababu ngoi tongaku 'o nyawa yosonge-songenokau gee dua yakisimomikoli.'"

²² Ge'enaka de ma Feliks 'una 'o gudaiou wanako 'o do-dotoko ma ngale 'o Yesus, wosido-dogumokau ya'urusu ma hali ge'ena. 'Una wongose 'ato, "Ngoi 'asa taputusu ma hali ne'ena, gee dua 'o Lisias 'o tentara ma balusu gu'una woboano."

²³ Ge'enaka de wakisidemo 'o tentaraka gee 'o Paulus wijaga-jagano la 'o Paulus witahanukosi, ma ma eta wipidilika de kaidadi 'awi ma-manai wilega de 'okia naga woparaluu gee kaidadi wido'otaka.

²⁴ Ma wange muruo naga 'ipasano, de 'o Feliks woboa womasimanai 'awi wekata mi ronga ngo Drusila; muna 'o Yahudi ma nyawa. Ge'enaka de 'o Feliks 'o nyawa wakisuloko 'o Paulus wi'ese, de wosigisene 'o Paulus wobi-bicara ma ngale 'o ngo-ngaku ma Yesus Kristusika.

²⁵ Ma gee 'o Paulus wosidowanga 'awi bicara de wobicara ma ngale 'o loa, de pomatahani nanga nyafisuu, de 'o hukumani 'o dunia ma do-dogumoka, de ma Feliks wimodongo so kawongosekau, "Kane'enakasi yaika. 'Asa toni'asokoli nako 'ai 'orasi de ma 'ena."

²⁶ Ma 'o Feliks 'una womangano-nganono gee dua 'o Paulus 'o pipi wokulanikia 'unaka so kawogi-giliou wosuloko wi'asoko la yomabi-bicarasi de de 'una.

²⁷ 'O taunu modidi 'ipasa, de 'o Perkius Festus wodadi gubernur 'o Feliks witagali. De ma Feliks 'o singina wo'ese 'o Yahudi ma nyawaka, so kowisisupuwa 'o Paulus 'o buioka.

Kisah Para Rasul

Video Kisah Para Rasul 24

Ikuti Kami:

KONTAK | PARTISIPASI | DONASI