Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lima ngaluo aefa da'õ, numalõ ba Kaizarea Gere Sebua Anania awõ ndra salaw̃a niha Yahudi ba fao zi fahuhuo sotõi Teretulo. Mõi ira khõ Gubernur Feliki, ba la'ombakha'õ wangadura sanandrõsa khõ Waulo.

² Me lakaoni fõna Deretulo, imane wangadugõ Faulo, "Tuha Gubernur nifosumange! Barõ wamatõrõmõ sohahau tõdõ ndra'aga ba nõrima. No oya zi sõkhi nilau ba soima ba wa'asõkhi dõdõu.

³ Lõ mamalõ matema'õ da'õ ba ma'andrõ saohagõlõ awõ wa lõ ma'olifuagõ da'õ gofu heza soga.

⁴ Ba hiza, ena'õ lõ ahori ginõtõu, Tuha, ma'andrõ fondrondrongo wangaduma si no adogodogo andre.

⁵ No masõndra wa samawukaisi niha andre. Gofu heza misa alua waguaguasa ba gotalua niha Yahudi ibe'e ba tobali ia sondrõnia'õ ba niha Nazareta.

⁶ No ita'unõi Nomo Zo'aya, ba hiza no mara'u ia. [Edõna ndra'aga wangetu'õ huku khõnia molo'õ agama khõma.]

⁷ [Ba komandra Lisia zanga'i ya'ia ba dangama,]

⁸ [ba ibe'e wareta ena'õ mõi fõnau Tuha zangadugõ ya'ia.] Na õfareso niha andre õrongo samõsa dania wa sindruhu wangadugõma khõnia."

⁹ Fao gõi wangadugõ Faulo niha Yahudi si so ba da'õ ba lafaduhu'õ niw̃a'õ Deretulo andrõ.

¹⁰ Ba ibe'e dandra faoma tangania gubernur andrõ khõ Waulo ena'õ fahuhuo ia. Imane Faulo, "No aboto ba dõdõgu wa no ara tobali sanguhuku ndra'ugõ ba nõri andre. Da'õ mbõrõ wa omuso dõdõgu ubelegõ ndra'o fõnau, Tuha.

¹¹ Tola õfareso samõsa, Tuha, wa felendrua ngaluo ba zi lalõ mõi ndra'o ba Yeruzalema wangandrõ.

¹² Ba lõ irai la'ila niha Yahudi fa'udu ndra'o ba niha ma zui u'owuloi niha ba wamalua famawukaisi, he ba Nomo Zo'aya, ba nomo wangandrõ ma zui gofu heza ba fasa.

¹³ Tebai gõi la'a'aro'õ wangadugõra ya'o khõu.

¹⁴ U'akui khõu Tuha wa samosumange Lowalangi ndra tuama ndra'o molo'õ famahaõ Yesu nibali'õra sala andrõ. Ba hiza, faduhu dõdõgu nasa fefu ba zi no musura ba Mbuku Moze awõ ba Mbuku ndra Sama'ele'õ.

¹⁵ Si mane ya'ira, so gõi wanõtõnagu khõ Lowalangi wa ifuli auri mangawuli niha moroi ba wa'amate -- niha satulõ tõdõ, ba he gõi niha si lõ sõkhi!

¹⁶ Da'õ mbõrõ wa uforege, ena'õ atulõ dõdõgu khõ Lowalangi ba sõkhi dõdõgu ba nawõgu niha.

¹⁷ Me no ha'uga fakhe lõ torõi ndra'o ba Yeruzalema, mangawuli ndra'o ba da'õ wolohe kefe tolotolo ba soigu awõ wame'e sumange khõ Lowalangi.

¹⁸ Me ufalua da'õ, lasõndra ndra'o ba Nomo Zo'aya, me no aefa halõw̃õ fangehao mboto. Lõ hadõi niha sato si fao khõgu, ba lõ hadõi gõi fawukasa me inõtõ da'õ.

¹⁹ Ba so õsa ndra niha Yahudi ba da'õ moroi ba propinsi Asia. Ya'ira zindruhunia zi so ba da'e wo'angadugõ khõu Tuha na so wangadugõra ya'odo.

²⁰ Akha lahonogõi niha andre wangombakha hadia nisõndrara olalõw̃a si no ufalua me la'ohe ndra'o fõna Zanguhuku ba Agama.

²¹ Nisõndrara khõgu lõ baero wehede me uw̃a'õ fõnara: La'ohedo ba wanguhuku ma'õkhõ andre, bõrõ me faduhu dõdõgu wa ifuli te'orifi niha si no mate dania."

²² I'asiwai wa'owulo andrõ Feliki, si no oya mangila sanandrõsa ba wamahaõ Yesu, imane, "U'etu'õ warakaro andre dania na no tohare komandra Lisia."

²³ Aefa da'õ ibe'e wareta khõ ndra saradadu ena'õ lataha manõ Waulo, ba lahaogõ khõnia awõ wa tetehegõ khõ ndra awõnia wame'e hadia ia zoguna khõnia.

²⁴ Mato ha'uga ngaluo aefa da'õ, tohare Weliki. Fao khõnia wo'omonia sotõi Derusila; niha Yahudi ia. Ifatenge niha Feliki wanga'i Faulo, ba ifondrondrongo huhuo Waulo sanandrõsa ba wamati khõ Keriso Yesu.

²⁵ Ba me itohugõ huhuonia Faulo sanandrõsa ba wa'atulõ dõdõ, fanaha tõdõ awõ wanguhuku ba Luo Safuria, ata'u Weliki ba imane, "Ofanõ iada'e. Ufuli ukaoni zui ndra'ugõ na so ginõtõ."

²⁶ Itõtõna wa isõndra Feliki gefe moroi khõ Waulo. Da'õ mbõrõ wa i'asese'õ wamatenge niha sogaoni Faulo ba wahuhuosa khõnia.

²⁷ Me no irugi dua fakhe, tobali gubernur Werokia Feso fogati Weliki. Ba bõrõ me ihalõ dõdõ ndra niha Yahudi Feliki, andrõ wa itaha manõ Waulo bakha ba gurunga.

Kisah Para Rasul

Video Kisah Para Rasul 24

Ikuti Kami:

KONTAK | PARTISIPASI | DONASI