Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Limang bongi mangkanna joo, ratumi to Imang Lompo Ananias lako Kaisarea sola ba'tu pira-pira pekaamberan to-Yahudi na sala mesa'na to la mpangkadananni disanga Tertulus. Malei mangngolo lako Gubernur Feliks mparapa'i to Paulus.

² Ia tonna disuamo Paulus lako olo, napamulami Tertulus mparapa'i nakua, "Tabe' kupajolo lako olona Gubernur mala'bih Feliks! Ia tee tondokki' rapa' to padamo masainna taparenta. Na buda toomo to apa pura dipugauk napumelo bangsaki', sanga kamaccanta'.

³ Kikurru sumanga' ngasan tee, na moi piran na la kiingaran tarruh bang.

⁴ Apa dikua danggi' nabuda wattunta' masala, kipeta'da kamalogaran penawanta', ke wa'dingngi, tasa'dingpi cingga'tu' tee pangparapa'ki'.

⁵ Kikanassaimo tee tau mbawa abala' la'da'! Iamo puanggawana tonturu' pangngajaran-Na Puang Isa, to-Nazaret. Umbo-umbo nanii tuli mpaden kamaricuan lan tangnga-tangngana to-Yahudi lan lili'na lino.

⁶ Mangka toomo la ncarepai Bola Puang Allataala, apa ta'pa kijokkoi. [La kibicara kami' situru' atoran agamangki',

⁷ apa ta'pa narampai bangkan Pangbarani Lisias,

⁸ nasuakan to tomparapa'i mangngolo lako kaleta'.] La tasa'ding kita' jio mai Paulus, ke taparessai, kumua tongan ngasan to kiparapasanni."

⁹ Padami to to-Yahudi ratu jio mpasala ngasanni to Paulus na tongananni to kadanna Tertulus.

¹⁰ Nako'bi'mi gubernur to Paulus nakua namangkada. Mangkadami Paulus nakua, "Tabe' kita', kuissen kumua mangtaun-taunmiki' masainna nnoloii tee bangsa sola rra'tahhi to kara-karana. Jaji masannangna' tee jio olota' mpauanki' katonganan.

¹¹ Kusanga wa'ding kita' takanassai tee kumua sangpulo duami bonginna too tongkumale massambajang jao kota Yerusalem.

¹² Te'da bangpara naden to-Yahudi nnampa'na' massisakka moi pissen, ba'tu nna'pan tau la mpaden rongka la lan Bola Puang Allataala, la lan bola passambajangan ba'tu umbo bang nanii lan tee kota.

¹³ Na te'da too nakullei la mpangbuttii tee too, to apa naparapasanna' lako kaleta'.

¹⁴ Apa la kuakui jio olota' kumua nang ssompana' Puang Allataala, situru' pangngajaran-Na Puang Isa, to napasala tuu mati'. Ia to Puang Allataala kusompa, nasompa too tojoloki'. Na kukatappa'i unapa to sininna pura diuki' lan sura'na Nabi Musa na sura'na nabi laen.

¹⁵ Sitonganna susi bang unana' tuu mati', pada kirannuan lako Puang Allataala kumua sininna tomate la napatuo pole' jio mai kamatean, la tomelo, na la togaja'.

¹⁶ Iamo joo kutuli mpengkulle-kullei tonganni manggauk melo la lako padangku' rupa tau, la lako Puang Allataala. Susiri joo to tonganna.

¹⁷ Ba'tu pirang taunmo masainna, te'da naden kumale de' kota Yerusalem, apa mane' iari tee kumale de' mbawan doi' pangtulungan bangsaku', kumangkaroba too lako Puang Allataala.

¹⁸ Jiomo ntuu joo nanii ngkitana' ba'tu pira-pira to-Yahudi jio mai propinsi Asia, tongkumangka mpemaceroi kale lan Bola Puang Allataala. Te'dara tobuda kusolan, na te'da toora tau marongka joo wattu.

¹⁹ Sitonganna iara sipato' la ratu inde' mangngolo lako kita' mparapa'na', kenna la den to apa la naparapasanna', apa te'da naratu.

²⁰ Iarika ia bangmo tee tau inde' mpaui denraka salaku' naampa' tongkudipangngolo lako Pangbicara Agama.

²¹ Ba'tu iaraka nasanga salaku' to kada sangbuku kupau lako sola ngasanni, kukua, 'Iamo kudiparessa ntee tee allo, nasaba' kukatappa'i kumua la dipatuo pole' to tomate.'"

²² Natampakkii Gubernur Feliks joo kasirempunan mbicara kara-kara, sanga budamo naissen to pangngajaran-Na Puang Isa. Nakua, "La kura'tah tee kara-kara, ke ratumi Pangbarani Lisias."

²³ Nasuami to kamandang mpatorro tarruhpi to Paulus, apa la napemaringngannimo ci'di', nawa'ding toomo nabawan solana to apa naparallui.

²⁴ Ba'tu pirang bongi mangkanna joo, ratumi Gubernur Feliks sola bainena disanga Drusila, mesa' to-Yahudi. Napangpesuanni Gubernur Feliks to Paulus naratu ncuritanni to kamatapparanna lako Puang Isa Almaseh.

²⁵ Apa mpatarruhhi kadanna Paulus nakua, "Nang la mpugaukki' kameloan, ntaloi penawa katolinoanta', nasaba' ia ke Kiama'mi lino, la dira'tah kara-karana tolino." Ia tonna sa'dingmi joo malaja'mi Gubernur Feliks nakua, "Aa, polemoko too! Ianna den wattungku', iapa kutambai pole'ko."

²⁶ Naangah penawa Gubernur Feliks kumua la nabenni doi' Paulus. Iamo joo natuli mpangpetambanni la ssipangkadanni.

²⁷ Napallan bangngi pangtarungkuan to Paulus, nasaba' madoangngi Gubernur Feliks nnala penawanna to-Yahudi. Ia tonna duang taunmo, endekmi Perkius Festus menjaji gubernur ssulle Feliks.

Kisah Para Rasul

Video Kisah Para Rasul 24

Ikuti Kami:

KONTAK | PARTISIPASI | DONASI