Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lime jelo sesampun nike, Imam Agung Ananias dait pemimpin-pemimpin Yahudi lumbar ojok Kaisarea bareng sopoq pengacare aranne Tertulus. Ie pade ngadep Gubernur Peliks dait nyampẽang tuduhan ie pade tipaq Paulus.

² Sewaktu Tertulus tempoh ojok julu, ie tuduh Paulus maraq niki, "Bapaq Gubernur Saq Mulie! Siq pimpinan pelungguh negeri tiang pade tentrem. Dait lantaran kebijaksanean pelungguh sampun luwẽq saq tepesolah umaq bangse tiang pade.

³ Tiang pade tetep sambut hal nike lẽq mbẽ juaq siq rase syukur.

⁴ Laguq adẽqne sampunang tetẽh luwẽq waktu pelungguh, tiang tunas adẽq pelungguh pirengang pengaduan tiang pade saq singket niki.

⁵ Tiang pade ndait dengan niki jari pengaco saq bahaye gati. Lẽq mbẽ-mbẽ ie nimbulang keributan lẽq antare dengan-dengan Yahudi, dait ie jari pemimpin golongan dengan-dengan Nasrani.

⁶ Malahan ie sampun nyobaq najisang Gedẽng Allah, laguq tiang pade bau ie. [Maksut tiang pade ngadilin ie menurut Hukum Taurat tiang mẽsaq.

⁷ Laguq kepale pasukan Lisias ngerebut ie lẽman tiang pade,

⁸ dait mrẽntahang adẽq penuntut-penuntutne ngadep pelungguh.] Lamun pelungguh meriksaq dengan niki, pelungguh mẽsaq gen pireng lẽman ie kebenaran selapuqne saq tiang pade tuduhang tipaq ie."

⁹ Dengan-dengan Yahudi saq lẽq derike ẽndah milu nuduh Paulus dait setuju lẽq selapuq saq tesampẽang siq Tertulus.

¹⁰ Terus Gubernur nike ngebẽng tande lẽq Paulus bahwe ie kanggo ngeraos. Beterus Paulus ngeraos, "Tiang nenaoq bahwe pelungguh sampun jari hakim negeri niki betaun-taun ngonẽqne. Keranaq nike tiang seneng ngajuang pembẽlean tiang niki lẽq arepan pelungguh.

¹¹ Pelungguh bau selidik mẽsaq bahwe ndẽq lebih lẽman due olas jelo saq liwat tiang lalo ojok Yerusalem jari sembahyang.

¹² Dait ndẽq uwah dengan-dengan Yahudi nike ndait tiang betungkasan kance sopoq dengan juaq atao ngumpulang dengan jari miaq keributan lẽq Gedẽng Allah atao lẽq balẽ-balẽ ibadah atao lẽq mbẽ doang lẽq dalem kote.

¹³ Ie pade ẽndah ndẽq bau buktiang tuduhan-tuduhan saq ie pade ajuang tipaq pelungguh mengenai tiang.

¹⁴ Mule tiang harus ngaku lẽq arepan pelungguh bahwe tiang nyembah Allah leluhur tiang pade menurut pengajahan saq teajahang siq Deside Isa nike saq ie pade anggep sopoq kepercayean. Laguq tiang masih percaye lẽq selapuqne saq tetulis lẽq Kitab Suci Taurat dait Kitab Nabi-nabi.

¹⁵ Pade maraq ie pade, tiang ẽndah bedowẽ harepan tipaq Allah bahwe selapuq dengan gen idup malik sesampun ninggal -- dengan-dengan saq solẽh dait maraq nike ẽndah dengan-dengan jahat!

¹⁶ Keranaq nike tiang tetep berusahe sebagus-bagusne, adẽq atẽ nurani tiang bersi tipaq Allah dait tipaq manusie.

¹⁷ Sesampun pire taun ndẽq ndot lẽq Yerusalem, tiang tulak ojok derike jari jauq bantuan kẽpẽng tipaq bangse tiang dait jari ngaturang persembahan tipaq Allah.

¹⁸ Sewaktu tiang kenyeke ngelaksaneang nike, ie pade ndait tiang lẽq Gedẽng Allah, sesampun tiang nutuqang upacare penyucian diriq. Tiang ndẽq kance dengan luwẽq, dait waktu nike ndẽq araq ẽndah keributan lẽq derike.

¹⁹ Cume araq pire dengan Yahudi lẽq derike lẽman Propinsi Asia. Ie pade saq seharusne araq lẽq deriki jari nyampẽang pengaduan ie pade lẽq pelungguh, lamun ie pade araq bedowẽ tuduhan tipaq tiang.

²⁰ Atao alurang dengan-dengan niki mẽsaq jelasang kejahatan napi saq ie pade ndait lẽq tiang sewaktu tiang tejauq ojok arepan Mahkamah Agame.

²¹ Ie pade cume ndait kalimat saq sopoq niki doang saq tiang ucapang lẽq julun ie pade: Tiang teadilin jelo niki sẽngaq tiang percaye bahwe dengan-dengan ninggal gen teidupang malik."

²² Terus Peliks saq sampun luwẽq wikan mengenai pengajahan Deside Isa, nutuqang sidang pelekare nike, basene, "Tiang gen mutusang pelekare niki, lamun kepale pasukan Lisias sampun dateng."

²³ Terus ie mrẽntahang prewire saq betanggung jawab lẽq Paulus nike adẽqne tetep nahen Paulus, laguq ngebẽng sekediq kebẽbasan lẽq ie dait ngijinang batur-baturne ngebẽng napi saq ie perluang.

²⁴ Pire jelo sesampun nike Peliks dateng kance seninene aranne Drusila; ie dengan Yahudi. Terus Peliks suruq dengan bait Paulus, dait Peliks pirengang Paulus ngeraos mengenai iman tipaq Deside Isa Almasih.

²⁵ Laguq sewaktu Paulus ngeraos mengenai kebenaran, penguasean diriq dait penghakiman saq gen dateng, Peliks jari takut. Terus ie bebase, "Side kanggo lumbar mangkin. Tiang gen ngempoh side malik lamun araq kesempatan."

²⁶ Lẽq waktu nike Peliks beharep gen mauq kẽpẽng lẽman Paulus. Keranaq nike ie rimpes suruq dengan ngempoh Paulus jari ngeraos kance ie.

²⁷ Sesampun due taun, Perkius Pestus gentiq Peliks jari gubernur. Dait lantaran Peliks kayun nyenengang angen dengan-dengan Yahudi, ie ngalurang Paulus tetep lẽq dalem bui.

Kisah Para Rasul

Video Kisah Para Rasul 24

Ikuti Kami:

KONTAK | PARTISIPASI | DONASI