Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lima wari kenca si e reh ku Kesarea Imam si Mbelin, gelarna si Ananias ras piga-piga kalak pertua kalak Jahudi bage pe sekalak juru bicara gelarna Tertulus. Ngadap kalak enda man Gubernur Pelik janah iadukenna Paulus man bana.

² Kenca Paulus ilegi, emaka ibenaken Tertulus ngerana mbelasken pengadunna nina, "O Gubernur Pelik si mehamat! Erdandanken kepeminpinenndu kami tetap aman. Melala pembaharun si penting nggo ibahanndu guna pembangunen man bangsa kami.

³ Ialoken kami enda alu dem pengataken bujur i japa pe dingen katawari pe.

⁴ Tapi gelah ula melala sia-sia waktundu emaka kupindoken alu meteruk ukur gelah ibegikenndu min kentisik pengadun kami si gendek-gendek enda.

⁵ Nggo tangkas man kami maka kalak enda sekalak penggujuh si ncedaken. Iguntarina kerina kalak Jahudi i belang-belang doni enda. Janah ia me sekalak peminpin sekte kalak Nasrani.

⁶ Terlebih pe icubakenna encemarken Rumah Pertoton si Badia. Perbahan si emaka itangkap kami ia. Ate kami ngadili ia rikutken Undang-undang kami.

⁷ Tapi icampuri puanglima Lisias janah ibuatna Paulus i bas kami nari alu paksa. Jenari isuruh puanglima e kami ngadu man bandu.

⁸ Adi isungkunndu pe kalak enda ietehndu nge i bas ia nari maka kai si ikataken kami enda tuhu."

⁹ Kalak Jahudi si ikut i bas pengadun e pe ngataken maka kai si ikataken Tertulus e tuhu.

¹⁰ Kenca bage ibahan Gubernur e tanda man Paulus gelah ia ngerana. Emaka ngerana Paulus nina, "Kueteh nge maka nggo piga-piga tahun dekahna kam jadi hakim i tengah-tengah bangsa enda. Emaka tetap ukurku mbela diringku i lebe-lebendu.

¹¹ Banci ietehndu jine maka la lebih sepulu dua wari si lewat ku Jerusalem aku guna ersembah man Dibata.

¹² Ise pe labo pernah ngidah aku erjengil ntah ngguntari subuk i bas Rumah Pertoton e ntah i bas rumah persembahen ntah i japa pe i bas kuta e.

¹³ Janah kalak enda pe labo ngasup mereken bukti man bandu kerna pengadunna nandangi aku.

¹⁴ Tapi ngaku aku i lebe-lebendu, maka aku ersembah man Dibata si isembah nini kami alu ngikutken Dalan Kegeluhen si ituduhken Tuhan, si ikataken kalak enda 'sekte'. Tapi aku pe tek nge kai si tersurat i bas Undang-undang Musa ras kai si tersurat i bas kitap nabi-nabi.

¹⁵ Pengarapenku man Dibata bali ras pengarapen kalak enda, maka lit nge kekeken i bas si mate nari, subuk kalak si bujur bage pe kalak si la bujur.

¹⁶ Emaka aku pe tetap nge kuusahaken gelah bersih pusuh peratenku i adepen Dibata ras i adepen manusia.

¹⁷ Kenca piga-piga tahun dekahna aku nadingken Jerusalem reh aku mulihken ku kuta e guna nehken pemere man bangsangku bage pe guna nehken persembahen man Dibata.

¹⁸ Asum aku nehken persembahen e, kenca dung upacara pembersihenku, idapeti kalak enda aku i bas Rumah Pertoton. Sanga si ndai labo aku i tengah jelma si nterem janah labo lit keributen.

¹⁹ Tapi tupung si e lit piga-piga kalak Jahudi i Propinsi Asia nari i je. Kalak ah ndai nge aturna reh ngadu man bandu adi lit kin si man adunkenna kerna aku.

²⁰ Amin bage gia pelepaslah kalak si nggo reh enda ngataken kejahaten si nggo kubahan asum aku i lebe-lebe Pengadilen Agama e.

²¹ Banci jadi salah akapna aku asum kukataken i lebe-lebe pengadilen e, 'Aku iadilindu sendah erdandanken tek aku maka kalak si mate nggeluh pagi mulihi.'"

²² Jenari nina Pelik, si nggo melala meteh kerna Dalan Kegeluhen si ituduhken Tuhan nutup sidang e alu ngataken, "Kenca seh i jenda puanglima Lisias maka kuputusken perkarandu enda."

²³ Kenca bage isuruh Pelik perwira namaken Paulus ku bas penjara. Tapi iberekenna nge sitik kebebasen man Paulus; teman-temanna banci reh ndahi ia dingen mereken keperlunna.

²⁴ Kenca piga-piga wari, Pelik ras ndeharana Drusila reh njumpai Paulus. Ndeharana e kalak Jahudi. Isuruhna kalak ngelegi Paulus jenari ibegikenna Paulus ngerana kerna kiniteken man Kristus Jesus.

²⁵ Tapi asum iterusken Paulus ngerana kerna kai si benar ras kai si salah, uga arus engkuasai diri ras kerna warina Dibata ngadili manusia, mbiar Pelik. Emaka nina man Paulus, "Sibar eme sekali enda, banci kam mulih. Ndigan pagi lit kesempatenku kudilo kam mulihi."

²⁶ I bas paksa si e iarapken Pelik gelah Paulus mereken duit man bana. Emaka megati idilona Paulus ercakap-cakap ras ia.

²⁷ Dua tahun kenca si e Gubernur Pelik igantiken Porkius Pestus. Paulus lalap ipelepas Pelik i bas penjara sabap muat ukur kalak Jahudi atena.

Kisah Para Rasul

Video Kisah Para Rasul 24

Ikuti Kami:

KONTAK | PARTISIPASI | DONASI