Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Amaíku mita bo bayongan ginaḷumku! Indongogaipa in singogku tana'a ko'i monimu, simbaí diaí moyotaḷaí ing kita komintan."
2 Naonda in dinongog monia ki Paulus nosingog nomakeí im bahasa Ibrani, lebedon nobioí im mosia. Ki Paulus noguman nana'a,
3 "Aku'oi na'a intaubií in Yahudi, pinononggadií kon Tarsus kom butaí ing Kilikia, ta'e aku'oi no'itoi kong kotaí tana'a, ki Gamaliel ing guru moḷobenku inta ain notunduí ko'i nakoí notompia totok. Sia notunduí kon hukum i Musa inta inogoinya kom mogoguyang naton. Sahingga in aku'oi nobalií mogogaid i Allah inta totok im morajing, naí tana'a makow.
4 Aku'oi ain nomogutuí kon intau mita inta nopirisayadon kon totunduí inta nobagu tua. Mosia komintan, pinomayak ḷoḷaki ande bobay, sinokodomokku bo pinobonu kom ponjara.
5 Onu im pinomiaku tatua kinota'auanbií in Imang Moḷoben bo bayongan kapala in agama. Mota'aubií liboíon monimu ko'i monia tua. Sim mosia tuata inta ain nomais kon surat pongantar ko'inakoí inta inogoi kon intau mita in Yahudi kon Damsyik. Surat tatua in noginsilang kon aku'oi inogoiandon ing kasampatan modomok kon intau mita kon tua inta ain dinumudui mita kon totunduí nobagu tatua, bo poḷat doman modia ko'i monia sin hukumon kon Yerusalem."
6 "Ta'e kon daḷan wakutu in aku'oi nodiugdon kon Damsyik, wakutu intua no'utudon in singgai, indoianmai yo oyuíonbií in sindar inta nobayag totok bo nokotuḷow nonindarbií magií nongkon ḷangit no'ilibu ko'inakoí.
7 Daí no'umpagdon aku'oi kom butaí bo nokodongog kon singog inta noguman ko'inakoí nana'a, 'Saulus, Saulus! Nongonu sin ikow momogutuíbií ko'i-Nakoí?'
8 Da' aku'oi noliboí nana'a, 'Ki ine Ikow Tuang?' Da' tubag in singog doman tatua: 'Aku'oi na'a ing ki Yesus intau in Nasaret inta pinogutuímu nion.'
9 Intau mita inta noyotakinku noko'ontong doman kon sindar tatua, ta'e singog in diaíbií dinongog monia.
10 Bo aku'oi noliboí ko'i Tuhan, 'Daí onu in aidanku, Tuhan?' Ki Tuhan noguman nana'a ko'inakoí, 'Pobangondon bo bayakdon in Damsyik, bain kon tua bo poguman-Ku ko'inimu onu in aidanmu.'
11 Wakutu intua aku'oi diaídon noko'ontong lantaran sindar inta nokotuḷow tatua. Daí dongkadon kinapit in yobayatku mita kon dodai in sinumu'ot kon Damsyik.
12 Kon Damsyik oyuíon intau tangoinya ki Ananias. Sia tua intaubií mopia inta umuran motoindudui kon hukum i Musa. Bayongan intau in Yahudi inta nogutun kon Damsyik totokbií im mo'insim ko'inia.
13 Sia namangoi no'indoi ko'inakoí, bo sinimindog kon diugku poḷat noguman nana'a, 'Saulus utatku, bukaídon in matamu bo indoidon! Daí kon dodaipa doman tatua aku'oi dinumungaí bo noko'ontongdon ko'inia.
14 Onda intua sia noguman ko'inakoí nana'a, 'Ki Allah im mogoguyang naton ain nomilií ko'inimu simbaí ikow monota'audon kon onu ing ko'ibog-Nya, bo moko'ontong ko'i Yesus, simpaḷ i Allah inta ain nogaid kon onu in kino'ibog i Allah, bo ikow ain nokodongog kon singog i Yesus tontanií.
15 Ikow im mopota'au kom bayongan intau kon onu inta ain inontongmu bo inta dinongogmu tua.
16 Bo tana'a dona'aidon mokopo'onggot ikow, pobangondon bo bayakdon pokibaptis. Pokuanidon ko'i Tuhan simbaí ikow pilatandon nongkon bayongan dosamu."
17 "Naonda in aku'oi nobuidon kon Yerusalem bo wakutu in aku'oi yogot nosambayang kom bonu im Baḷoi Tuhan aku'oi kinawasa'andon in Roho i Tuhan.
18 Aku'oi noko'ontong ko'i Tuhan; bo Sia noguman ko'inakoí, 'ḷagidon taḷa'ai in Yerusalem na'a, sin diaíbií indongogan monia onu im pogumanmu soaáḷ Aku'oi.'
19 Daí aku'oi noguman, 'Tuhan, kinota'auan bidon monia totok kon aku'oibií na'a inta tumu'ot magií makow kom baḷoi mita pososambayangan bo modomok poḷat mopobonu kom ponjara kon intau mita inta mopirisaya ko'i-Nimu.
20 Natua doman, naonda ing ki Stepanus inta simpaḷ-Mu ilimod, aku'oi tontanií kon tua bo nopia-pia doman ing ginaku im pinolimodan monia tatua.
21 Ta'e ki Tuhan noguman ko'inakoí, 'Bayakdon sin Aku'oi im mopotabaí ko'nimu mayak in tampat moyayuk kon lipuí in intau mita inta de'eman Yahudi.'"
22 Intau moaíntoí kon tua nongindongog ko'i Paulus nodapot in singognya tatua; bo naonda intua mosia mulaidon nomaḷuí, "limodon in intau naniíon. Diaíbií patus mobiag in sia!"
23 Mosia tantuí nomaḷuí takin mopogambat in ḷambung monia bo mopogonik in ḷobud.
24 Tuamai itoi in tontara mita tatua noguman kon dia ing ki Paulus kon tampat monia baí pakisa'an pirikisa'an kon tua simbaí kota'auandon mongo nongonu sin intau mita in Yahudi mopomaḷuí natua ko'inia.
25 Ta'e wakutu ing ki Paulus aindon sinogot sin sambokondon, ki Paulus noliboí kon itoi in tontara inta sinimindog kon tua, "Degaí mota'au im mosambok kon intau in Rum aka sia diaípa adilon muna?"
26 Nokodongogmai kon tua, tontara tatua minayak ko'i itoinya bo noliboí nana'a, "Onuon i tuang intau tana'a? Sia tua intaubií in Rum!"
27 Daí itoi in tontara tatua minayak ko'i Paulus bo noliboí, "Pogumankah mongo totu'u kon ikow nion intau in Rum!" Ki Paulus notubag, "Totu'u aku'oi na'a intaubií in Rum."
28 Itoi in tontara tatua noguman, "Wakutu in aku'oi sinumu'ot nobalií warga negara in Rum nomahaḷ totok im pinoguboliku!" Ta'e ki Paulus noguman, "Hakku tatua oyuíon sin aku'oi pinononggadií kon tua saḷaku intau in Rum."
29 Daí mosia inta moroncana mosambok ko'inia dalií inumundok naí doman tua itoi in tontara tatua no'ondokdon naonda ing kinota'auannyamai kon ki Paulus tua intaubií in Rum.
30 Itoi in tontara Rum tatua mo'ibog totok monota'au mongo nongonu sin intau mita in Yahudi tua mopotaḷaíbií ko'i Paulus. Tuamai nopo'ikoḷomai kon singgai sia nogoinií kon imang mita itoi bo Mahkamah Agama noyosipun kon tua. Onda intua ki Paulus pinoḷuaidon monia kom ponjara bo dinia kon tayowon monia tua.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA