Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "O taman-taman idi kinanak-kinanak, ninger muyuh!"
2 Kareb ideh neninger neneh pebala bang buri' Iberani, idi ideh pelaba pirud peh. Idi kebala Paulus:
3 "Ui ini lun Yahudi, luk tinganak déi' Tarsus luk bang bawang Kilikia, iamo' ui inasuh tungé' Yerusalim, idi ui anak sekola' Gamalil luk bida'neh maya' Ukum tepun tau dengan matu. Idi ui mepicet manu inan Allah, mepad kudeng muyuh aco sini teh.
4 Ui nengedereh idi nengate lemulun luk maya' Dalan Tuhan ini. Idi ui nengakem deléi idi decur idi nenuet nedeh bang tutup.
5 Imam Rayeh idi lun reyeh-rayeh lun Yahudi pana' miak ngegala' rat nan ui mala luk matu. Ngaceku ui nengalap rat nedeh tuda'-tuda' surat luk inayud kuan kinanak-kinanak lun Yahudi déi' Damsik. Idi ui iné' déi', pad ngakem lemulun ineh, idi pad nguit nedeh kitem kaling amé' Yerusalim pelé ideh miak kumin peh.
6 "Uned ui nalan muneng ku Damsik, kareb muned aco, denak-denak inan acang luk merasat rat bang langit libutku.
7 Ui neluka' luun tana' idi ui neninger aceh arod luk pebala negku, 'Saul, Saul! Ngudehké' iko ngedereh Negku?'
8 Idi keburi'ku, 'Idéké Iko, O Tuhan?' Idi kebalaNeh negku, 'Ui ini Yésus lun Nasarét luk pederenmu.'
9 Lun luk nemaya' negku nenier acang ineh, iamo' na ideh neninger bala luk nepebala negku ineh.
10 Idi keburi'ku, 'O Tuhan, anunké luk miak ruenku?' Idi kebala Tuhan negku, 'Tumui iko idi amé' semuet bang bawang Damsik; idi déi' miak belén namu amung-amung kekamen luk inau' temina' kuanmu.'
11 Ui nebuser ku rasat acang ineh, idi lun denganku nenguyut negku macing déi' Damsik.
12 "Idi inan selemulun, ngadanneh Ananias, luk mepicet maya' Ukum Musa, luk inubur amung lun Yahudi luk tudo déi' Damsik.
13 Ieh iné' negku, keburi'neh, 'O kinanakku Saul do' iko kulat mateh idi nier.' Kareb ineh teh ui pana' nenier neneh.
14 Idi kebalaneh, 'Allah tepun tau pangeh nemili' namu atun, pelé iko kali pianNeh, idi miak nier Luk Matu ineh idi ninger bala rat bang tangNeh.
15 Ngaceku iko mangun ku lun nekali' Neneh kuan amung-amung lemulun ratnan luk sinier idi pindengermu ineh.
16 Idi nekini anunké punneh iko nganét? Tumui iko idi rerebpen idi nawar ngadan Yésus, pad amung-amung sala'mu uen ngiu'.'
17 "Ui nuli' iné' Yerusalim, idi uned ui sembayang bang Ruma' Allah, idi ui nenier aceh luk sinierku.
18 Idi ui nekali' Tuhan ineh nepebala negku, 'Miket remuat rat Yerusalim; ngaceku lemulun bang bawang ini na sikal ninger luk nekali'mu rat Negku'.
19 Idi keburi'ku, 'O Tuhan, lemulun ineh kali' ratnan kudeng apeh ui iné' bang ruma'-ruma' sembayang idi nengakem idi nemebal lemulun luk manu Namu.
20 Kareb Stepanus, lun luk nekali' Namu pinaté, idi ui idi déi' idi neperurum nedeh luk nengaté neneh, idi nengimet ayungdeh.'
21 Idi kebala Tuhan negku, 'Nalan iko, ngaceku Ui sikal ngecuk namu amé' mado kuan lun pupu baken.'"
22 Lun mula' neninger bala Paulus macing ieni mo'; idi ideh nengitang, keburi'deh, "Nala' neneh! Ngaté neneh! Na ieh petulu mulun teh."
23 Idi ideh nengitang idi nengelengu ayungdeh, idi nengisak abuh amé' dita'.
24 Lun rayeh baweh ineh nengecuk nguit ni Paulus semuet bang libung lun pebunu'. Idi ieh nengecuk nedeh mebal neneh, pad ideh kali' anun punneh lun Yahudi ineh nengitang kudeng ineh ratnan lawéneh.
25 Kareb ieh kiling ku nuper kubil, idi Paulus nepebala nelun rayeh lun pebunu' luk tuped muneng neneh, "Miakké muyuh mebal seburur lun Rum kareb nateh ieh tinutun?"
26 Kareb lun rayeh lun pebunu' ini neninger bala ineh, idi ieh iné' nelun rayeh baweh idi nengitun neneh, kebalaneh, "Anunké luk ruenmu? Lemulun ini lun Rum."
27 Idi lun rayeh baweh ineh pana' iné' ni Paulus idi nengitun neneh, kebalaneh, "Mala negku, matuké iko ini lun Rum?" Idi keburi' Paulus, "Matu."
28 Idi kebala lun rayeh baweh ineh, "Ui ini pana' pangeh nengalap ngadan anak Rum dengan raga luk rayeh." Idi kebala Paulus, "Iamo' ui ini titen anak Rum rat punku tinganak."
29 Idi lun luk temina' ngelio ni Paulus ineh petacu buro rat neneh, idi lun rayeh baweh pana' matot teh, ngaceku ieh kali Paulus ineh lun Rum, idi ieh luk pangeh nengaling neneh.
30 Lun rayeh baweh ineh sikal kali' punneh dengan megala' ratnan kudeng apeh Paulus inadu' lun Yahudi ineh, idi kenebpa ieh neneka abetneh, idi nengecuk imam-imam rayeh idi amung-amung tebubpun besara' ineh mepamung, idi ieh nenguit Paulus temurun idi nenaped neneh pa kiung lun mula' ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA