Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Tomala'bihku' sola ngasan! Tabe' tapesa'dingngii kupaui to sitonganna anna kita'mora ntimbangngi to melona na gaja'na."

² Ia tonna sa'dingngi to Paulus mangbasa to-Yahudi, ta'pa sikammatan ngasan, napatarruhhi to kadanna nakua,

³ "Ia tee aku', to-Yahudina'. Jaji jiona' kota Tarsus tana Kilikia, apa matonggo inde'na' kota Yerusalem. Mangguru lakona' Gamaliel to nnajahhi tonganna' atoran tojolota' to nabenni Nabi Musa. Pada bang una tee kita' to mala'bihku' sola ngasan, moi aku' nturu' tongan todana' Puang Allataala.

⁴ Kupakario-rio samatena to tonturu' pangngajaran-Na Puang Isa. Kujokko ngasanni la muane la baine, angkupangpetarungkuanni.

⁵ Imang Lompo sola padanna Pangbicara Agama to wa'ding mpaissenniki' kumua te'da kumangnguraga. Ia bang unamo mangka mbenna' sura' kubawan to-Yahudi jio kota Damsyik, dikua angkuwa'ding njokkoi to tomatappa' lako Puang Isa, angkubawai lako kota Yerusalem nadipakario-rio."

⁶ Mpatarruhmi kadanna Paulus nakua, "Ia tongkumandoppi'mo lako kota Damsyik, tangnga allo, tangdikalannai naden arrang pasillo pole jao mai langi' nnarrang mengguririkna'.

⁷ Ta'pa tipessambakna' do' padang na den gamara kusa'ding mpangkadaina' nakua, 'Ee, Saulus! Ee, Saulus! Matumbai musessa tarruh bangna'?'

⁸ Mekutanamo', 'Ie', indariki' kita' Puang?' Napebalina' nakua, 'Aku'mo Puang Isa to-Nazaret to musessa.'

⁹ Ia to tau jio kusolan nakita toda joo arrang, apa te'da nasa'dingngi to gamara kusa'ding.

¹⁰ Kukutanai pole'mi kukua, 'Ie', apa kita' to sipato'na la kupugauk?' Napebalina' nakua, 'Ke'dehko mumale re' kota Damsyik. Jiopi mumane' dipauan ngasan apa to nakabudai Puang Allataala la mupugauk.'

¹¹ Natoe bangri solaku' to limangku' tongkimale re' kota Damsyik, nasaba' butana', napubua' joo arrang pasillo.

¹² Den mesa' tau jio disanga Ananias. Tomatappa' tongan joo tau na tatta' mpugauk atoranna Nabi Musa. Sininna to-Yahudi to torro jio kota Damsyik ngkasiri'i.

¹³ Ratui ngkitana', najenjen jio sa'deku', nakuanna', 'Ee, Saulus todipusile'to, pakita pole'moko!' Mentingngarana', kuta'pa ngkitai.

¹⁴ Mangkai joo too nakuanna', 'Mangkamoko napilei Puang Allataala to nasompa tojolota', dikua ammuissenni to pakkaeloran-Na, ammukitai to Puang Isa ammussa'dingngi to gamaran-Na.

¹⁵ Ia to apa mangka mukita sola musa'ding la mupangpeissenan lako sininna tau.

¹⁶ Jaji danggi'mo mubata. Ke'dehmoko, mupangpejioran kalemu. Meta'da tulungko lako Puang anna dampanganko.'"

¹⁷ Mpatarruhmi kadanna Paulus nakua, "Ia tongkupolemo lako kota Yerusalem, kumassambajang lan Bola Puang Allataala, ta'pa nakuasaina' Roh Allataala,

¹⁸ angkukita Puang nakuanna', 'Madoi'ko ssalai kota Yerusalem, nasaba' ia to tau inde' cia'i ntarimai ke mupangpeissenanna'.'

¹⁹ Mangkadana' kukua, 'Oo Puang, naissen melona' tuu mati' tau kumua aku'mo to mangka male llelei bola passambajangan kujokkoi to tongkatappa'iki', kupekajui, kumane' mpangpetarungkuanni.

²⁰ Susi toomi tonna dibuno to sa'bin-Ta' Stefanus, jio toona', na kukabudai joo kadibunoanna. Na aku'mo to nnampaii pakeanna to tombunoi.'

²¹ Apa nakuanna' Puang, 'Male bangmoko, nasaba' la kusuako male mambela lako bangsa tangngia to-Yahudi.'"

²² Napatarruh bang unapa tobuda mpesa'dingngi Paulus mangkada, apa ia tonna la tampakkanamo joo kada metamba-tambami tobuda nakua, "Bunoi bangmi, te'da ia nasipato' tuo to tau susi tuu!"

²³ Da'tanni metamba, naperrimbakan tooi to baju landona, nasumarambu de' langi' to sara'buk.

²⁴ Massuami to pangbarani to-Roma mbawai to Paulus lako tangsi, nasuai mpekajui na diparessa la dinii nnissenni matumbai napetambanni to-Yahudi.

²⁵ Apa ia tonna mangkamo dipumpung la dipekaju, mekutanami Paulus lako joo kamandang ke'deh jio nakua, "Wa'dingriki'ka mpekaju mesa' to-Roma, ke te'dapi nadira'tah kara-karana?"

²⁶ Ia tonna sa'dingngi joo kamandang, malei mekutana lako joo pangbarani nakua, "Apamora la tagaukanni tee tau? Nasaba' to-Roma pale' ia."

²⁷ Malei joo pangbarani ngkutanai Paulus nakua, "Pauanna', to-Roma tonganrokoka?" Napebalii Paulus nakua, "Ie', to-Romana' kita'."

²⁸ Nakua pole'pa joo pangbarani, "Gaja buda aku' kubajah kumane' direken to-Roma." Napebalii Paulus nakua, "Apa ia tee aku', mellao jio mai dijajianku' to-Romana' aku'."

²⁹ Ia joo wattu sorong boko'i to surudadu la mparessai, namemmalaja' toomi joo pangbarani, sanga naissenni kumua to-Roma pale' ia, na iamo mangka mpangpepumpunganni.

³⁰ Gaja doangngi joo pangbarani to-Roma nnissenni apa sitonganna naparapasanni to-Yahudi joo Paulus. Iamo joo ia tonna masawanna nasuai sirempun to kapala imang na padanna Pangbicara Agama, napangpebukanni to pepumpungna nadipangngolo lako tosirempun jio.

Kisah Para Rasul

Video Kisah Para Rasul 22

Ikuti Kami:

KONTAK | PARTISIPASI | DONASI