Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Hamu angka ama maradu angka dongan sudena! Na giot mambela diri do au maradopkon hamu. Marsitangi-tangian ma hita jolo!" ning ia.

² Dung marhata Ibrani si Paulus dibege halahi, mur hohom ma halahi. Dung i dipaudut si Paulus ma hobarnia.

³ "Halak Jahudi do au, di Tarsus na di Luat Kilikia do au sorang, tapi di Jerusalem on do au magodang jana tangkas do diajari guru godang Gamaliel au taringot tu Tona na nilehen tu angka ompungta. Songon dia haburjuonmunu dison sadarion hamu ale angka dongan, laing songon i do au burju mangoloi Debata.

⁴ Huparkanciti do lopus mate angka na mangihutkon Dalan Ni Tuhan. Nada marimbar halaklahi sanga dadaboru, hutangkupi do sude sanga ise halak na mangihutkon poda i jana hupahurungkon.

⁵ Malim Godang i pe dohot sude rapot ugamo, tarlehen halahi do hasaksian paboa na so margabus au. Harana halahi do na mangalehen surat jalan di au sipasahaton tu angka halak Jahudi na di Damaskus. Jadi hara ni surat i gabe tola ma au manangkupi halak na porsaya disi, songon i dohot marobansa tu Jerusalem on anso diuhum," ning ia.

⁶ "Di hatiha na mardalan i au, marayak Damaskus hira-hira tonga ari ma hatiha i, tompu ma ro sada sinondang na lobi torang songon na mamincar sian langit humaliang au.

⁷ Jadi tungkap ma au tu tano, jana hubege ma sada sora na mandok tu au, 'Saulus, Saulus! Biasi diparkanciti ho Au?' ninna.

⁸ Jadi husapai ma, 'Ise dehe Ho, Tuhan?' 'Au ma da Jesus Halak Nasaret na niparkancitanmi,' ninna mangalusi.

⁹ Angka donganku na disi i pe diida halahi do sinondang i, tapi anggo sora na mangkatai i tu au nada dibege halahi.

¹⁰ Dung i marsapa ma au mangulahi, 'Aha do sibaenonku, Tuhan?' ningku. Dialusi Tuhan i ma, 'Jongjong ma ho kehe ma ho tu Damaskus. Disi ma annon paboaon tu ho sanga aha na nipangido ni roha ni Debata sibaenonmu,' ninna.

¹¹ Gabe mapitung ma au hara ni sinondang na silo i. Gabe ditogu-togu angka donganki noma au lopus tu Damaskus.

¹² Adong ma disi sada bayo na margoar si Ananias. Na daulat do bayo i jana na burju do ia mandalankon angka Tona i. Sude do halak Jahudi na di kota Damaskus mamparsangapi ia.

¹³ Ro ma ia mangaligi au, lalu jongjong ma ia di lambungku jana didok ia ma tu au, 'Anggia Saulus, marnida ma ho mangulahi!' ning ia. Laing hupadorgak ma bohingku manigor, jana huida ma ia.

¹⁴ Dung i didok ia ma tu au, 'Madung dipili Debata ni angka ompunta i ho anso diboto ho hagiotNia boti anso diida ho na tigor i huhut manangihon soraNia sandiri.

¹⁵ Gabe saksi ma ho laho patorangkon tu sude halak sanga aha na dung niidamu dohot na nibegemi.

¹⁶ Saonnari pe, ulang be palolot paintehon. Jongjong ma ho anso nipandidihon. Pio-pio ma ho mangido tolong tu Tuhan anso dipalua ho sian angka dosami.'"

¹⁷ "Jadi mulak ma au tu Jerusalem, jana di hatiha martangiang au di Bagas Ni Debata, digohi kuaso ni Debata ma au.

¹⁸ Huida ma Tuhan mandok hata tu au, 'Pasigop ma morot sian Jerusalem on, harana nada jagiton ni halak na dison on hasaksianmu taringot tu Au,' ninna Tuhan i.

¹⁹ Jadi hudok ma, 'Tangkas do diboto halahi Tuhan na dung masuk au tu angka bagas paribadatan laho manangkupi halahi jana mambalbali sanga ise na porsaya tu Ho.

²⁰ Laing songon i do di na mamunu si Stefanus, saksiMi laing disi do au jana jop do rohangku na mate i ia dibaen. Salang manjagoi pakean ni halak na mamatehon ia pe laing au do,' ningku.

²¹ Tapi didok Tuhan i ma muse tu au, 'Kehe ma ho, harana suruonKu ma ho kehe tu na dao tu inganan ni halak sian bangso na asing.'" Ninna Tuhan i tu au.

²² Laing dipatangi-tangi halak na bahat i dope si Paulus na mandok hata i, tapi di ujung ni pandohannia i, marsurak ma halahi sagogo-gogona, "Gumonan ma nimatehon anggo halak sisongon i. Nada tama be mangolu i!" ninna halahi.

²³ Di na marsurak-surak i halahi, dihirpas-hirpaskon halahi ma bajuna be, jabat sarsar abuan i tu ginjang.

²⁴ Jadi gabe disuru komandan i ma si Paulus dioban masuk tu bagasan markas i anso disiksa ia disi laho mamareso sanga hara ni aha umbaen na pola songon i gogona halak Jahudi marsurak hara ni ia.

²⁵ Haru pe na dung dirahut si Paulus laho mangaloncing ia, laing mandok hata dope ia tu perwira na jongjong i disi, "Tola do tehe niloncingan mangihutkon undang-undang sada halak warga negara Rom dompak so nitimbang parkarona?" ning ia.

²⁶ Umbege i, gabe kehe ma perwira i tu komandanna i manyapai, "Ia boti aha dehe na giot baenonmon? Warga negara Rom do bayo on!" ning ia.

²⁷ Jadi didapotkon komandan i ma si Paulus manyapai, "Paboa ma jolo, sanga na tutu do warga negara Rom ho!" ning ia. "Olo, tutu do i. Warga negara Rom do au," ning ia.

²⁸ Dung i didok komandan i ma, "Na argaan do hutabusi hawarganegaraan i." Dialusi si Paulus ma, "Tapi anggo au, adong pe hakku na songon i, hara ni hasosorangku do."

²⁹ Gabe manigor sumurut be ma angka tentara na giot manyiksa si Paulus i, komandan i sandiri pe gabe mabiar ma hara ni na dung sanga i ditambat si Paulus, hara ni na warga negara Rom i ia.

³⁰ Jadi sai giot botoon ni komandan i ma sanga hara ni aha do satutuna umbaen jabat dipasala halak Jahudi si Paulus. Jadi ancogotna i disuru ia ma marlagut angka sintua ni malim dohot anggota ni Mahkamah Ugamo. Jadi dipalua ma si Paulus sian bayangannia i, dioban ma ia tu jolo ni halahi sude.

Kisah Para Rasul

Video Kisah Para Rasul 22

Ikuti Kami:

KONTAK | PARTISIPASI | DONASI