Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Bapak-bapak sarato jo Sudaro-sudaro kasadonyo! Ambo ka manyampaikan pambelaan ambo kabake angku-angku. Cubolah dangakan!"

² Baru urang-urang tu mandanga si Paulus mangecek jo bahaso Ibrani, mako urang-urang tu batambah anok. Nan si Paulus manaruihkan katarangannyo.

³ "Nan ambo ko adolah urang Yahudi," kecek si Paulus, "ambo layie di Tarsus di nagari Kilikia, tapi ambo digadangkan disiko, di Yerusalem ko, ambo dididik sacaro taliti dek guru gadang angku Gamaliel, manuruik paratuaran nan di ajakan dek Nabi Musa kabake niniak muyang kito. Samo pulo jo kasadonyo angku-angku nan disiko kiniko, ambo pun sabana sungguah bakarajo untuak Allah.

⁴ Ambo pun ma aniayo pangikuik-pangikuik pangajaran baru tu sampai mati. Kasadonyo urang-urang tu, biya laki-laki, biya padusi, ambo tangkok-i, sudah tu ambo puruakkan masuak pinjaro.

⁵ Imam basa, sarato jo kasadonyo anggota Mahkamah Agamo, buliah manjadi sasi, baraso ambo ko indak baduto. Dek karano, baliau-baliau tu lah, nan lah ma agiah ambo surek, nan ditujukan untuak urang-urang Yahudi nan di Damsyik. Jo surek tu, ambo mandapek kuwaso untuak manangkok-i urang-urang nan disinan, nan picayo kabake pangajaran tu, ambo bakuwaso pulo mambawok urang-urang tu ka Yerusalem, untuak ka di ukun."

⁶ "Kutiko ambo sadang dalam pajalanan, lah ampia dakek ka kota Damsyik, kutiko tu tangah ari badantang, indak disangko-sangko ado cahayo nan sangaik tarang mamanca dari langik ka sakuliliang ambo.

⁷ Ambo rabah ka tanah, sudah tu ambo mandanga suwaro nan bakato kabake ambo, 'Oih Saulus, Saulus! Baa mangko angkau ma aniayo Ambo?'

⁸ Sudah tu ambo batanyo, 'Siyapokoh Angkau, oih suwaro nan mangecek tu?' 'Ambolah Isa Almasih urang Nazaret, nan angkau aniayo,' kecek-Nyo.

⁹ Urang-urang nan ado disinan, nan samo-samo jo ambo, manampak pulo cahayo tu, tapi inyo indak mangarati suwaro nan mangecek kabake ambo tu.

¹⁰ Sudah tu ambo batanyo pulo, 'Apo nan musti ambo pabuwek, Tuhan?' Tuhan manjawab, 'Tagaklah, payilah ka Damsyik. Tibo disinan, angkau ka di agiah tawu tantang kasadonyo, apo nan katuju dek Allah, nan musti angkau karajokan.'

¹¹ Mato ambo lah manjadi buto, dek karano cahayo nan manyilaukan tu. Mako kanti-kanti ambolah nan mambimbiang ambo, untuak taruih ka Damsyik.

¹² Disinan ado surang urang nan banamo Ananias. Inyo adolah urang saliah, nan patuah manjalankan paratuaran Nabi Musa. Kasadonyo urang Yahudi nan tingga di Damsyik, sangaik ma aromaik-inyo.

¹³ Kutiko inyo tibo maliyek ambo, inyo tagak di dakek ambo sambia bakato, 'Angku Saulus, andaknyo mato angkau dapek maliyek baliak!' Sakutiko tu juwo, kutiko ambo mancingowak, mato ambo lah bisa maliyek inyo.

¹⁴ Kudian inyo bakato kabake ambo, 'Allah niniak muyang kito, lah mamiliah angkau, supayo angkau mangatawui apo nan katuju dek Baliau, supayo angkau ma arahkan pandang kapado Isa Almasih, dek karano Baliau adolah Pisuruah Allah, nan lah mangarajokan kahandak Allah, mako dangakan pulolah parentah Baliau.

¹⁵ Angkau ka manjadi pisuruah-Nyo, untuak ka mangabakan kabake sadonyo umaik mukaluak, apo nan lah angkau liyek, sarato apo nan lah angkau danga.

¹⁶ Nan kiniko jan lai dinanti ba lamo-lamo. Tagaklah, sarahkanlah diri angkau untuak ka dipamandikan. Basarulah kapado Tuhan supayo angkau dilapehkan dari sagalo doso.'"

¹⁷ "Ambo babaliak ka Yerusalem, di kutiko ambo sadang badowa di Rumah Tuhan, ambo dikuwasoi dek Roh Allah.

¹⁸ Ambo manampak Tuhan; Baliau bakato kabake ambo, 'Capeklah tinggakan Yerusalem ko, dek karano urang-urang nan disiko, indak ka niyo doh manarimo kaba nan ka angkau curitokan tantang diri Ambo.'

¹⁹ Ambo mangatokan, 'Tuhan, urang-urang ko lah bi tawu, baraso ambo lah masuak ka rumah-rumah ibadaik untuak manangkok-inyo, sudah tu ambo tangani urang-urang nan picayo kabake Angkau tu.

²⁰ Baitu pulo kutiko pisuruah Angkau si Stefanus dibunuah, ambo sandiri ado disinan, ambo satuju pulo jikok inyo dibunuah. Malah ambo sandirilah nan manunggui baju urang-urang nan mambunuah inyo.'

²¹ Tapi, Tuhan bakato pulo baliak kabake ambo, 'Payi sajolah, dek karano Ambo ka manyuruah angkau payi ka tampaik nan jauah, kabake urang nan indak urang Yahudi.'"

²² Urang-urang tu taruih juwo mandangakan si Paulus babicaro, tapi, tibo dikalimaik nan pangabisan, urang-urang tu bi ma ariakkan sakuwaik-kuwaiknyo, "Bunuah sajo urang nan bakcando iko. Inyo ko indak patuik doh ko iduik!"

²³ Sambia ma ariak, urang-urang tu bi mangipehkan jubahnyo, sarato ma ambuangkan kasiak ka udaro.

²⁴ Dek karano itu, kumandan pasukan Roma tu manyuruah mambawok si Paulus ka markas, supayo inyo buliah dipareso sacaro kareh, untuak mangatawui apo sababnyo mangko urang-urang Yahudi ma ariakkan kato-kato nan bakcando itu kabake inyo.

²⁵ Tapi, kutiko si Paulus lah dikabek, untuak ka dicambuik, mako bakatolah si Paulus kabake parwira nan tagak disinan, "Apokoh layi dipabuliahkan, mancambuik surang urang warga karajaan Roma, sabalun inyo disidangkan?"

²⁶ Baru mandanga kecek si Paulus tu, parwira tu payi kabake kumandan pasukan, sambia bakato, "Apo ko nan ka apak pabuwek? Urang ko adolah warga nagara Roma!"

²⁷ Mako payilah kumandan tu kabake si Paulus untuak batanyo, "Cubolah agiah tawu ka kami, apokoh iyo angkau warga nagara Roma?" "Iyo," kecek si Paulus, "ambo iyo warga nagara Roma."

²⁸ Kumandan tu bakato pulo, "Aden sangaik sambuahnyo tabayie, untuak ka manjadi warga nagara Roma!" Bakato pulolah si Paulus, "Nan ambo ko, lah sajak dari layie manjadi warga nagara Roma."

²⁹ Disakutiko tu juwo, saradadu-saradadu nan nak ka mamareso si Paulus bi tasuruik, nan kumandannyo lah tabik takuik, dek karano inyo lah tadorong mampilanggu si Paulus, padohal si Paulus adolah warga nagara Roma.

³⁰ Kumandan pasukan Roma tu, niyo sangaik nak mangatawui, apo bana sababnyo mangko urang-urang Yahudi mampasalahkan si Paulus. Dek karano itu, bisuak arinyo, inyo panggie imam-imam kapalo sarato jo Mahkamah Agamo, supayo bakumpua. Sudah tu pilanggu si Paulus dibukak, mako dibawoklah inyo mangadap ka adok-an imam-imam kapalo sarato jo Mahkamah Agamo.

Kisah Para Rasul

Video Kisah Para Rasul 22

Ikuti Kami:

KONTAK | PARTISIPASI | DONASI