Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali rata nja’u bangka kami masimang resi ketua-ketua yako Epesus, panewa kami meyoko yako ri kota Miletus etu. Kami malayag mansaka yau njo’u pulo Kos. Panewa yako nja’u ria eo rao wo’u kami polas wo’u njo’u pulo Rodos panewa yako nja’u ria kami polas njo’u kota Patara.
2 Wali nja’u Patara etu kami re’e mangarata wo’u samba’a bangka to dayau njo’u Penisia. Wali kami mapone ri bangka etu panewa malayag wo’u.
3 Ri raya mpalayag mami etu, kami mangkita pulo Siprus ri tondo ngkii mami pei kami taa mandoo nja’u ria, kami ojo polas mampago nja’u propinsi Siria. Nja’u propinsi Siria etu kami mansomponaka ri palabuan nja’u kota Tirus apa ngaya-ngaya to re’e ri bangka daratauraka ri palabuan etu.
4 Wali tempo kami mandoo nja’u ria, kami yau mangalo’a anaguru i mPue Yesu to maroo nja’u ria, panewa kami maroo-roo resi sira pitu mbengi kasaenya. Tempo kami maroo resi tau etu, i Nosa Mapasing manganto’oka sira mangkonong anu to maja’a to damawali resi i Paulus nda’a Yerusalem. Wali sira mampatiendoka i Paulus, to’onya, “To tao-tao ne’e polas ndeku Yerusalem.”
5 Pei nempo ewa see, ojo kagananya pitu mbengi kami nja’u nja’u ria, kami polas wo’u. Tempo kami polas etu, samparia tau to mangaya pasi indo nu ananya pasi ananya yau mangantambo kami lo’u wii ntasi ri sambali ngkota. Tempo la’u la’u wii ntasi etu kami mambokotu panewa makai-kai sindara-ndara pei sira, panewa roo see kami masimang resi sira.
6 Yako etu kami mapone ri bangka panewa sira mawolili muni nda’a banuanya.
7 Wali yako ri kota Tirus etu kami malayag wo’u sampe rata nja’u kota Ptolemais. Nja’u ria kami mana’u yako ri bangka panewa simparata pei pua’i mami anu to samba’a pangaya. Wali kami mampogomboka sira panewa yore nja’u ria sambengi.
8 Yako etu, eo rao wo’u kami mapone muni ri bangka pei polas wo’u njo’u kota Kaisarea. Rata nja’u ria kami yau ri banua i mPilipus. I Pilipus etu ia tau to mampakarebaka kareba matao pasi ia seja samba’a tau pitu to room rapilis seore nda’a Yerusalem. Wali kami maroo ri banuanya.
9 I Pilipus etu ia opo mba’a ananya to paka ngana we’a. Pasi sira opo paka to pantuntu tuntu i mPue Allah.
10 Wali kami maroo-roo nja’u ria bara sawei mbengi. Ri rayanya kami maroo-roo etu re’e samba’a tau rata yako nda’a propinsi Yudea, tau etu seja to pantuntu tuntu i mPue Allah, sanganya i Agabus.
11 Wali ojo karata i Agabus etu resi kami, ia mangoko so’o ntongo i mPaulus panewa ia mangampunguka pale pasi witi to si ia. Ia manganto’o, “I Nosa Mapasing manganto’o, ‘Ewa si’i danaika ntau resi ngkai pue nso’o ntongo si’i. Ia danapungu nto Yahudi nda’a Yerusalem panewa sira damangawaika yau ia resi tau to si’a to Yahudi.’”
12 Wali ojo pandonge mami pasi yunu mami ri Kaisarea gombo ngkai etu, kami paka tumangi pasi mamporapika kojo resi i Paulus see ia ne’e dayau ndeku Yerusalem.
13 Pei tempo etu i Paulus mangansono, to’onya, “Maka pei komi tumangi mampakamawo rayangku? Apa aku nempo si’a ojo ratarungku, aku nempo rapopate yau nda’a Yerusalem apa saba mangalulu i Pue Yesu, aku buya rayangku.”
14 Wali i Paulus taa mampodongeka gombo mami manganto’oka ia ne’e yau, see naka kami mampondooka yau manganto’oka ia ewa wetu. Kami jamo manganto’o, “Biakamo pamporani i mPue semo damawali.”
15 Wali ojo kagananya sawei mbengi kami maroo nja’u kota Kaisarea, kami mampakaroso panewa meyoko damalinja ndeku Yerusalem.
16 Tempo kami yau etu, re’e seja bara sawei mba’a tau to anaguru i mPue Yesu to yako Kaisarea yau seja mangalulu kami ndeku Yerusalem, panewa rata ndate ria sira mangawawa kami njo’u banua i Manason apa kami damaroo ri banuanya etu. I Manason etu ia yako ri pulo Siprus pasi ia masaemo mawali anaguru i mPue Yesu.
17 Wali ojo karata mami nda’a Yerusalem, pua’i mami to samba’a pangaya sira ndende kojo rayanya simparata pei kami.
18 Wali eo rao wo’u i Paulus yau sindara-ndara pei kami yau mayunu resi i Yakobus. Pasi samparia ketua-ketua ntau to mangaya nda’a Yerusalem siromu seja resi i Yakobus.
19 Wali tempo kami siromu etu i Paulus mangantabea sira, panewa roo see ia mangansaritaka sira mangkonong samparia to naika i mPue Allah resi tau to si’a to Yahudi saba yako palaong to naika i mPaulus seore. Etu semo tempo ia mampotundeka sira tuntu i mPue Allah.
20 Wali ojo pangandonge i Yakobus pasi yununya gombo i mPaulus etu, sira mangabarong i Pue Allah. Pasi sira manganto’oka i Paulus, to’onya, “A’i anu samba’a pangaya pei kami, korom mangansani re’e malagi nsowu to Yahudi to mangaya i Pue Yesu. Tau etu samparia mangalulu kojo porenta i Musa.
21 Pei to Yahudi etu sira re’e mangandonge wiwi mangkonong korom. Apa tau manganto’o korom mampotundeka to Yahudi to maroo ri oyo ntau to si’a to Yahudi see sira tamo mangalulu porenta i Musa. Pasi korom manganto’oka sira, ‘Ne’emo mangansui ana ngkomi pasi ne’emo mangaluluka ada nto tu’angi ngkita.’ Ewa see nato’o ntau mangkonong korom. Pei taa monso gombo etu.
22 Wali wimba dataika si’i-si’i see manasa resi tau boros taa kojo monso wiwi to nadonge nsira etu? Apa matantu kojo sira damangansani korom re’emo rire, pasi ane ewa see bara re’e to danaika nsira damangampoja’a korom.
23 Wali see naka to tao-tao korom damangika ewa wimba kami manganto’o see tau boros etu damangansani korom tiroo mangalulu porenta i Musa. Ewa si’i raika. Apa re’e opo mba’a tau langkai rire to roomo mangika nia resi i Pue Allah.
24 Tau opo etu mosumo gana eonya nia nsira, wali inta wawa sira njo’u banua i mPue Allah pasi pakayongongika seja koromu sindara-ndara pei sira mangalulu ada ngkita. Pasi tempo komi yau etu, bayarika sira opo saro ntau mangangkosi yau wayua nsira singkonong ewa ada ngkita ane tau mangika nia. Ane korom mangika ewa see, tau boros damangkita taa monso gombo to sira mangandonge etu, apa korom tiroo seja mangalulu kojo porenta i Musa.
25 Wali etu semo ane mangkonong to Yahudi, pei ane mangkonong tau to mangayamo to si’a to Yahudi, kami room nampokatuka sira sura manganto’oka sira mangkonong songka mami resi sira. Kami manganto’oka sira ne’e mangkoni pangkoni to room rapampueka resi tau-tau, pasi ne’e mangkoni raa pasi ne’e seja mangkoni binatang to mate taa masuwu raanya. Pasi ne’e seja masala bara magoyal. Etu semo to nato’oka mami tau to mangaya to si’a to Yahudi.”
26 Wali ojo pangandonge i mPaulus songka ngketua-ketua resi ia etu, ia singkonong. See naka ojo kaeonya rao wo’u ia yau mangawawa tau opo to nato’o nsira etu njo’u banua i mPue Allah. Rata nja’u ria ia mampakayongongika koronya sindara-ndara pei sira mangalulu ada nto Yahudi. Roo see ia masua ri raya banua i mPue Allah pei mampaponsanika to pampue to’onya, “Dapitu mbengiwa panewa roo ada to mampakayongongika koro ntau opo etu, pasi ane kagananya pitu mbengi etu sira opo damampampueka pampue nsira samba’a pei samba’a.”
27 Wali yako etu, ojo kamosunya kagananya pitu mbengi etu, re’e bara sawei mba’a to Yahudi to yako propinsi Asia, sira re’e mangkita i Paulus nja’u banua i mPue Allah. Wali sira mangarotai raya ntau boros pei mangansoko i Paulus.
28 Sira sakaboo, manganto’o, “O to Israel, mai sawang kami mangahuku tau si’i! Si’i semo tau to mampotundeka tau ri ponto lipu see sira mangewa kita to Yahudi pasi see sira tamo mangalulu porenta i Musa. Pasi ia mampotundeka tau manganto’o banua i mPue Allah si’i tare batuanginya. Pei si’a ojo to etu inikanya, ia re’e seja mangkeni tau to si’a to Yahudi masua ri raya banua i mPue Allah, mampakarikasika banua to mapasing si’i.”
29 Naka pei sira manganto’o ewa wetu apa sira re’e nangangkita i Tropimus sindara-ndara pei i Paulus ri raya ngkota Yerusalem. I Tropimus etu ia samba’a tau to si’a to Yahudi to yako kota Epesus. Wali to Yahudi etu sira mampondayaka i Paulus re’e mangkeni ia ri raya banua i mPue Allah. Pei kamonsonya ia tare mangika palaong to etu.
30 Wali yako etu juku ri kota etu tau marotai kojo. Tau boros etu kangguyu-ngguyu maripo njo’u banua i mPue Allah pei mangansoko i Paulus. Sira mangaditi yau ia ri sambali banua etu panewa samparia ba’a mbombo nu banua etu mansaka raba’a yau.
31 Wali yako etu sira mangantidas i Paulus damangampopate yau ia. Tempo sira mangika ewa see re’e tau to yau mangkeni kareba etu resi kepala ntentara to sansowu kaborosinya. Tau etu manganto’o, “Salipu Yerusalem marotaimo si’i-si’i.”
32 Wali kepala ntentara etu mangkeni bara sawei mba’a kepala to mangkepalang tentara to satu kaborosinya, pasi kepala-kepala ntentara etu mangkeni joa nsira. Sira samparia maripo mangampago rotai to nawali etu. Wali tempo tau boros to mangantidas i Paulus etu mangkita kepala-kepala ntentara pasi joa nsira maripo mampago sira, sira mandoo yau mangantidas i Paulus.
33 Roo see kepala ntentara to sansowu etu yau mangansoko i Paulus panewa manganto’oka joanya mangampunguka i Paulus rante dua mbiyaa. Panewa roo see ia mampotanaka resi tau boros, to’onya, “I sema tau si’i pasi kesaa salanya?”
34 Wali tempo etu tau boros re’e to sakaboo mangansono, pei gombo nsira taa sewaju. Pasi makanano kojo, wali kepala ntentara taa manasanya mangkonong palaong to nawali etu. Wali ia mampokauka joanya mangkeni i Paulus njo’u banua nsira.
35 Wali tentara etu mangkeni yau i Paulus. Pei tempo sira mangkeni ia etu, ojo karata nsira nja’u eja sira mangokotaka yau i Paulus pei mamposoel ia mangkeni njo’u banua ntentara apa tau boros maja’a kojo rayanya rani mampakaja’a ia.
36 Tau boros etu mangalulu-lulu sira pei sakaboo manganto’o, “Pate yau ia!”
37 Wali yako etu tentara to mangkeni i Paulus mosumo damasua ri raya banua nsira. Tempo etu i Paulus magombo ri raya basa Yunani pei mamporapika resi kepala ntentara etu, to’onya, “Bara maya aku magombo resi komi, Pa’a?” Wali kepala ntentara ipu rayanya manganto’o, “Gete, wimba korom mangansani magombo ri raya basa Yunani?
38 Bara si’anya korom tau Mesir to nangarotai raya ntau boros seore see sira mangewa pomarenta nto Roma? Si’anya korom to mangkeni yau tau to kara-kara to opo nsowu kaborosinya njo’u pada bone?”
39 Sono i mPaulus, “Si’a. Aku si’i to Yahudi to yako ri kota Tarsus, kota to nansani kojo ntau boros nja’u propinsi Kilikia. Wali ane maya, kuporapika resi komi waika aku mampogomboka tau boros si’i.”
40 Wali kepala ntentara mangawaika i Paulus magombo. See naka i Paulus makore ri eja banua ntentara etu panewa ia mangokotaka palenya see tau boros damaroti. Wali tau boros etu mawali maroti kojo, panewa i Paulus mampogomboka sira ri raya basa Ibrani.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA