Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ri sia kami nopalakana nte pakeni ntopomparasaya lako ri ngata Efesus, bo nipalaisi kamimo ira. Kami nesavi kapala bo kaliu-liu hau ri levuto Kos, bo kamailena nakavamo kami ri levuto Rodos. Lako ri sia kami napola hau ri pesampo kapala ri ngata Patara.

² Ri Patara kami nolinja ri kapala hau ri bagia Fenisia.

³ Kapala haitu nolipa sampe nikita kami levuto Siprus ri sabingga njidi kami. Tapi kapala nolipa njuu sampe ri propinsi Siria. Kami nesampo ri ngata Tirus sabana ri sia rapotauraka pangulaya kapala nipesavi kami.

⁴ Ri ngata Tirus haitu, kami hau nanggita topangoseaka i Yesus bo nonturo nte ira saminggu kasaena. Ante pekeniaka Nosa Gasa ira nompainga i Paulus, nee mantende hau ri ngata Yerusalem.

⁵ Tapi nagana saminggu kami nonturo ri sia, nipalaisi kamimo ira, bo nipapola kamimo polipa kami. Ira pura-pura nosanggani-nggani ante anara bo bereira nanggeni kami hau ri savaliku ngata. Nakava ri talinti, nantaputu puramo kami bo nosambaya.

⁶ Naupu nopalakana, nesavi kapala kami. Bo ira topekeni pangane nanjili hau ri banuara.

⁷ Lako ri ngata Tirus haitu, kami nokapala sampe nakava ri ngata Ptolemais. Ri sia kami hau mosisani nte topangoseaka i Yesus bo mompapola tabe. Bo kami naturu nte ira sambongi.

⁸ Naeo mpadondo napolamo kami sampe nakava ri ngata Kaisarea. Ri sia, kami hau nonturo ri banua i Filipus, saito topompatolele Kareba Belo. Ia muni saito lako ri ira papitu anu nipelisi ri ngata Yerusalem bara ipia mantulungi suro-suro.

⁹ Naria ana i Filipus ampa randaa. Ira ampa mai nidekeika nu Alatala pompakule mompasimbayu tesa nitarimara lako nte Alatala.

¹⁰ Naliu bara sako-mbongi kami nonturo ri sia, nakavamo saito langgai nosanga i Agabus, lako ri bagia Yudea. Ia muni nidekeika nu Alatala pompakule nompasimbayu tesa nitarimana lako nte Alatala.

¹¹ I Agabus nakava nte kami ri banua i Filipus. Nialana sulepe i Paulus, bo nipouna ka kadana bo palena mboto pade niulina, "Iveimo anu niuli Nosa Gasa: ToYahudi ri ngata Yerusalem mombasaka tupu nu sulepe hitu, bo rapoura ivehitu, bo radekeira ka tona ledo toYahudi mombatangarana."

¹² Nangepe haitu, kami bo pura-pura topomparasaya nonturo ri ngata Kaisarea, nerapi nte i Paulus, "Nee mpuu mapola hau ri ngata Yerusalem!"

¹³ Tapi nesana i Paulus, "Nakuya komiu notumangi nompakabuku raraku? Yaku hii nasadiamo hau ri ngata Yerusalem nau yaku rasaka, nau sampe rapatesi sabana pangoseakaku i Pue Yesus!"

¹⁴ Ledo nadota i Paulus nangepe tesa kami. Jadi nenontomo kami nombatagi ia. Niuli kami, "Damo dota nTupu majadi."

¹⁵ Naliu bara sako-mbongi kasaena kami nonturo ri sia, nanggalivomo kami bo nantende hau ri ngata Yerusalem.

¹⁶ Naria muni bara sako-ndua topomparasaya lako ri ngata Kaisarea nomporoa kami. Ira nanggeni kami hau ri banua i Manason ri Yerusalem, apa ri banuana haitu rapesai bo rapaturu kami. I Manason haitu tona lako ri levuto Siprus, bo ia nasaemo najadi topangoseaka i Yesus.

¹⁷ Nakava kami ri ngata Yerusalem, topomparasaya ri sia nantarima kami ante damba rara.

¹⁸ Kamailena, i Paulus nosanggani-nggani ante kami hau mosinggava nte i Yakobus. Pura-pura pakeni ntopomparasaya ntanina naria ri sia muni.

¹⁹ Naupu i Paulus netabe, nitesana ka iramo pura-pura anu nipovia nu Alatala ri tatanga ntona ledo toYahudi tempo ia nompatolele Kareba Belo.

²⁰ Naupu nangepe tesa i Paulus, i Yakobus ante pakeni-pakeni ntanina, nantoiya Alatala. Niulira ka i Paulus, "Sampesuvu, kana rasanimiu nonjobu-njobumo toYahudi nomparasaya i Yesus, tapi ira pura-pura da batena nangoseaka Atura-atura agama anu nipapola Nabi Musa.

²¹ Niepera kareba anu nompakasala komiu. Niepera komiu nompatuduki pura-pura toYahudi anu nonturo ri ngata ntona ledo toYahudi, ala rakabasakara Atura-atura agama haitu. Niepera muni komiu nompatuduki domo paraluu ira *mombasuna anara bo domo paraluu mantuntuni ada ntoYahudi.

²² Sii-sii kana raepe ntoYahudi anu nomparasaya i Yesus, komiu nakava ri sii. Jadi, berimbamo?

²³ Aginamo raoseakamiu tesa kami hitu: Naria ampa tona nte kami ri sii novia pojanji nte Tupu bo domo masae rapoviara *ada pompakagasa karo nangoseaka adata.

²⁴ Agina komiu hau movia ada pompakagasa karo mosanggani-nggani nte ira, bo komiu mombabayari pura-pura anu rapesombara. Naupu sia, ira mamala ragau, tandana nipakaduparamo pojanjira. Ivesiamo, rasani ntodea ledo nakana kareba niepera nombatesa komiu, apa komiu mboto nantuntuni Atura-atura agama anu nipapola Nabi Musa.

²⁵ Tapi tona ledo toYahudi anu nomparasaya i Yesus, nipakatu kamimo sura ka ira nompakatantu atura-atura anu paraluu raoseakara. Haitumo, ira ledo mamala mangande kandea nipesomba ka tupu-tupu ntanina, ledo mamala mangande raa bara mangande bau nu binata nikoje, bo ledo mamala mosampaturu ante tona ledo bereira mboto."

²⁶ Nangepe haitu, nasitujumo i Paulus ante tesa i Yakobus bo pakeni ntanina haitu. Jadi naeo mpadondona hau mpuu ia nosanggani-nggani ante tona ampa bo nipoviara ada pompakagasa karora. Naupu haitu, nesuamo ira riara Banua nu Alatala bo nanguli ka *topanggeni pesomba ri sia sako-mbongipa pade ada pompakagasa karora maupu bo pesombara rakeni rapesomba ka Alatala.

²⁷ Napara pompakaupu pitu-eo nipakatantu ka ada pompakagasa karo, bara sako-ndua toYahudi lako ri propinsi Asia nanggita i Paulus riara Banua nu Alatala. Nipakagadora todea ri sia bo nisakara i Paulus,

²⁸ bo nongare-ngare, "ToYahudi! Tulungimo kami! Hitumo tona hau ri umba-umba nompatuduki todea mangeva kita toYahudi. Nipatudukina tona mombabaliki Atura-atura agama anu nipapola Nabi Musa, bo nisalaina Banua nu Alatala hitu! Sii-sii nikenina tona ledo toYahudi nesua riara Banua nu Alatala nompakaruto ponturo nagasa hitu!"

²⁹ (Niulira ivesia, sabana nikitaramo i Trofimus, tona ledo toYahudi lako ri ngata Efesus. I Trofimus nomporoa i Paulus riara ngata. Nisarumakara i Paulus nanggeni ia nesua ri Banua nu Alatala, tano ledo.)

³⁰ Nangepe haitu, pura-pura tona ri ngata Yerusalem nagado mpuumo, bo ira mpasanggani-nggani nangova hau ri Banua nu Alatala nombasaka i Paulus. Niumbunjaira i Paulus hau ri savalikuna bo niupira vamba Banua nu Alatala ala ledo magado riarana.

³¹ Tempo topegado haitu nompasimbuku mompatesi i Paulus, naria tona hau nopakiluka tadulako Magau Mbaso ivei: "Nagadomo njumangu ngata Yerusalem!"

³² Nangepe pakilu haitu, tadulako haitu kaliu-liu nangala tantara-tantarana bo hau nasalisa ri kagado haitu. Nanggitapa tantara-tantara nakava, nenontomo todea nombaboba i Paulus.

³³ Jadi tadulako haitu nombasaka i Paulus, bo nituduna tona nombarante ia ante rompenga rante. Naupu sia nipekutanana ka todea, "Isema tona hitu? Nuapa nipoviana?"

³⁴ Naria sanu nongare ivei, bo naria muni sanu nongare iveitu. Ivesia kagadona sampe ledo nisani nu tadulako nuapa kakanana najadi. Haitumo sabana niparentana ala i Paulus rakeni ri asrama nu tantara.

³⁵ Tempo tantara nanggeni i Paulus nakava ri tangga asrama haitu, topegado-topegado narau mpuu sampe i Paulus damo nikova ntantara nesua hau riara asrama.

³⁶ Topegado haitu netuntuni ri puri bo nongare-ngare, "Patesimo ia!"

³⁷ Ira da mesua riara asrama nu tantara, i Paulus nanguli ka tadulako, "Mamala yaku motesa sampalai nte komiu, tua?" Balengga nu tantara nesana, "Nisanimu tano nobasa Yunani!

³⁸ Ane ivesia, ledo iko tano *toMesir nangeva pomarenta bo nanggeni pata-njobu topepatesi nalai hau ri karava bai bara ipia?"

³⁹ Nesanamo i Paulus, "Ledo. Yaku hii toYahudi, lako ri Tarsus ngata mbaso ri propinsi Kilikia. Kuperapi, dekei kaku loga motesa ka todea hitu."

⁴⁰ Tadulako haitu nompaloga i Paulus motesa. Jadi i Paulus neangga ri tangga nu asrama bo nombalaeraka palena, ala ira malino mangepe tesana. Nalinomo ira sakide, bo nompamulamo i Paulus notesa ka ira ante basa Ibrani, basa ntoYahudi.

Kisah Para Rasul

Video Kisah Para Rasul 21

Ikuti Kami:

KONTAK | PARTISIPASI | DONASI