Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tongkisisarakmo joo pekaamberan jamaa jio mai kota Efesus, malemokan mangkappala' tarruh lako pulau Kos. Na masawanna jiokan pulau Rodos, kimane' male lako kota Patara nanii kenden kappala'.

² Jiomo kinii nnampa' kappala' mangnguju lako tana Fenisia. Mende'mokan,

³ kimale arannai kikita to pulau Siprus jio kairingki', apa tarruh lakokan tana Siria. Mellao jiokan kota Tirus, nasaba' jio dinii mpupellaoi to luranna joo kappala' kinii.

⁴ Sangminggukan torro jio kimale sitammu to tomatappa' lako Puang Isa. Pangpatujun-Na Roh Allataala, anna anggaii to Paulus male lako kota Yerusalem.

⁵ Apa ia tonna anggemo wattungki' torro jio kota Tirus, sisarakmokan kipatarruh kalingkanki'. Male ngasanni sintong repokkona ssolankan ratu lako salean kota. Ia tongkijiomo randan tasik, mengguntu' ngasankan kimassambajang.

⁶ Mangkai joo sisalama'mokan, kimende' kappala', na pada pole todamo ia lako bolana.

⁷ Mangkappala' tarruhkan jio mai kota Tirus ratu lako kota Ptolemais, cappa'na kinii mangkappala'. Malekan ssitammuan tomatappa' jio, na sangngallokan torro jio.

⁸ Masawanna male omokan, kiratu lako kota Kaisarea. Malekan lako bolana Filipus to mpangpeissenan Kareba Kasalamatan, kitorro jio. Sala mesa'nai jio mai to pitu tau dipilei jio kota Yerusalem.

⁹ Den a'pa' anakkana, anakdara ngasan, nabarakka'i Puang anna wa'ding mpangpeissenan kareba jio mai Puang Allataala.

¹⁰ Ba'tu pira-piramokan masainna jio, denmi mesa' nabi ratu jio mai tana Yudea disanga Agabus.

¹¹ Ratui lako to kinii, naalai to saripinna Paulus, napumpungngi to ajena sola limanna nakua, "Susi tee to napau Roh Allataala, 'Ia to puangna tee saripi la napumpung to-Yahudi susi tee jio kota Yerusalem, anna benni lako bangsa tangngia to-Yahudi.'"

¹² Ia tongkisa'dingngi, kipeta'dai sola to tomatappa' jio kota Kaisarea, anna danggi'mo namale Paulus de' kota Yerusalem.

¹³ Apa nakua mpebalii, "Oo, danggi'mo dikka' mikillakkina', nasaba' samasse-massena penawangku'. Sitonganna macanning sininna bulu-bulungku', tangngia la dipumpung manda jio, apa dibuno toona', nasaba' Puang Isa."

¹⁴ Kamma' bangmokan, nasaba' te'da napesa'dingngikan. Kikua mandamo mangkada, "Ma'namo na pakkaeloran-Na Puang jaji."

¹⁵ Ia tongkiba'tu pira-piramo allona torro jio kota Kaisarea, ssari'mokan ropo'-ropo'ki' kimale de' kota Yerusalem.

¹⁶ Ba'tu pira-pira to tomatappa' jao ssolankan male lako bolana Manason jao kota Yerusalem, nasaba' jao la kinii mangbongi. (Ia joo Manason to-Siprus masaimo menturu' lako Puang Isa.)

¹⁷ Masannang to tomatappa' jao kota Yerusalem ntammuikan.

¹⁸ Masawanna malekan sola Paulus sikita Yakub, na jio ngasan todai to sininna pekaamberan jamaa.

¹⁹ Mangkanna Paulus mangsalama' lako, nacuritan ngasanni to pangtulung-Na Puang Allataala lan jamanna lan tangnga-tangngana bangsa tangngia to-Yahudi.

²⁰ Mpakala'bihhi Puang Allataala sola ngasan tonna mangka ssa'dingngi joo. Namane' ngkuanni to Paulus, "Ee, todipusile'to! La muissen kumua massa'bu-sa'bumo to-Yahudi memmatappa' lako Puang Isa, nallundukki atoranna Nabi Musa.

²¹ Apa den tau mpauko kumua muajahhi ngasanni to to-Yahudi torro jio tondok laen mpatorro atoranna Nabi Musa, danggi' napangpesunnatan anakkana ba'tu nturu' ada' laenna.

²² Na tantu la nasa'ding kumua inde'moko. Jaji, apa la dipugauk?

²³ Melo ke mupesa'dingngikan. Den a'pa' tau inde' la ganna'mi wattunna menjaji nazir.

²⁴ Iamo joo malemoko sola lako Bola Puang Allataala, musolanni mpemaceroi kalemu. Mubajaran tooi ongkoso' karobanna situru' atoran anna wa'ding mangpecakkuru', battuananna mangkami wattunna menjaji nazir. Ianna susi joo, la naissen ngasan tau kumua te'da pale' natongan to kada nasa'ding mpauko, nasaba' iko una, na mupugauk too to atoranna Nabi Musa.

²⁵ Apa ia to tomatappa' lako Puang Isa to bangsa tangngia to-Yahudi, mangkamo kikiringan sura' mpauanni to kara'tasanki' kumua, te'da nawa'ding ngkandei to kande dipangngolo lako dewata, te'da nawa'ding ngkande rara, ba'tu ngkande moda' na te'da too nawa'ding manggauk sala."

²⁶ Ia tonna masawanna nasolanmi Paulus joo tau a'pa', male sola mpamulai nceroi kalena. Mangkai joo mentamami Bola Puang Allataala mpaui pirang allopa namane' mangka, na ia to karoba la napangkaroban sola a'pa'i.

²⁷ Ia tonna la katampakanna joo pitung allo, ba'tu pira-pira to-Yahudi jio mai propinsi Asia ngkitai to Paulus lan Bola Puang Allataala, anna rasii to tobuda najokkoi.

²⁸ Metamba nakua, "Ee, tulungkan kamu' to-Israel! Iamo tee tau to male bang nnajahhi sininna tau umbo-umbo nanii, mpake pangngajaran nnewa to-Israel, atoranna Nabi Musa na ia tee Bola Puang Allataala. Na ia too ssolan omi tau tangngia to-Yahudi tama Bola Puang Allataala ncarepai tee bola macero!"

²⁹ Ia namangkada susi joo, nasaba' denmo nakitai to Trofimus to-Efesus sola Paulus lan kota. Na nasanga denmo nasolanni Paulus mentama Bola Puang Allataala.

³⁰ Marongka ngasanmi to tau lan kota, na siratuan kinjara' ngkitai. Najokkoi to Paulus nagararakki lako salean Bola Puang Allataala, nata'pa ditutu' to babanganna.

³¹ Ia tonna la mbunoi tomaricu, napauanni tau to pangbarani surudadu Roma, kumua marongka ngasan to tau lan kota Yerusalem.

³² Ta'pa nasua pangbarani to ba'tu pira-pira kamandangna na surudadunna anna sikinjarasan lako to nanii tau marongka. Ia tonna kitai tobuda joo pangbarani sola surudadunna, te'damo natundunni to Paulus.

³³ Nakandoppi'i pangbarani to Paulus najokkoi, napangpepumpunganni mpake dua rante bassi. Namane' mpekutananni indara joo Paulus na apara napugauk.

³⁴ Sesena to tobuda mebali nakua susi tee, na sesena pole'pa kumua susi tuu. Te'da naissenni joo pangbarani apa sitonganna to jaji, nasaba' gaja rongkai to tau. Iamo joo napangpeparentanni anna dibawa lako tangsi to Paulus.

³⁵ Ia tonna ratumo lako to' pelalan, nabullei surudadu, nasaba' marontami to tomaricu.

³⁶ Buda tomaricu undi nturu'i jio boko' metamba-tamba nakua, "Bunoii!"

³⁷ Ia tonna la mentamamo tangsi, nakuamo Paulus lako joo pangbarani, "Wa'dingriki'ka sipangkada cingga'tu'?" Napebalii nakua, "Oo macca todako mangbasa Yunani?

³⁸ Ia nasusi tuu, tangngiako pale' to-Mesir, to mane' mangka mpaden ricu nnewa tomangparenta, namale mbawa patang sa'bu to pangbuno lako padang pallawangan?"

³⁹ Napebalii Paulus nakua, "Ia tee aku' to-Yahudina', dijajian jiona' kota Tarsus, kota kaminang kaissenan jio tana Kilikia. Tatulungna' dikka' ke wa'dingngi, kumangkada lako tuu mati' tau."

⁴⁰ Ia tonna dieloranmo mangkada, ke'dehmi jio pelalan, nampupangngimba-imba limanna nta'tan tau. Ia tonna kamma'mo tuu lako tau, mangkadami Paulus mangbasa to-Yahudi nakua,

Kisah Para Rasul

Video Kisah Para Rasul 21

Ikuti Kami:

KONTAK | PARTISIPASI | DONASI