Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mangona ndra'aga ba zatua ba mbanua Niha Keriso ba Nefeso. Aefa da'õ marõi ira. Moloyo ndra'aga madõlõga ba hulo Gose; ba mahemolu da'õ marugi hulo Rodo. Moroi ba da'õ madõlõ ndra'aga woloyo numalõ ba Watara.
2 Ba Watara masõndra gõfa si numalõ ba Wenisia. Mõiga yaw̃a ba gõfa andrõ ba tebua ndra'aga.
3 Ba no moloyoga irege ma'ila hulo Zifirusi tanõ ba gamberama; ba hiza madõlõ ndra'aga woloyo numalõ ba Ziria. Manao ndra'aga ba Diro, bõrõ me ba da'õ ibe'e tou nõsi gõfa nitõrõma andrõ.
4 Ba nahia andrõ mõi ndra'aga wamalukhaisi niha si faduhu tõdõ khõ Yesu, ba torõi ndra'aga khõra samigu wa'ara. Moroi ba wanuturu Geheha Lowalangi, la'amenesi Waulo ena'õ bõi mõi ia ba Yeruzalema.
5 Ba me ahori ginõtõ we'asoma ba da'õ, marõi ira ba wanohugõ fofanõma. Lafasao ndra'aga banua Niha Keriso ba da'õ, fao wo'omora ba iraonora, irugi baero mbanua. Ba zinga nasi matuhi danõ fefu wangandrõ.
6 Aefa da'õ fara'ura'u tanga ndra'aga. Mõi ndra'aga yaw̃a ba gõfa, ba mangawuli ira ba nomora.
7 Moloyo manõ ndra'aga i'otarai Diro irugi Witolemai'o. Ba mafalukhaisi ba da'õ ndra talifusõ samati wangowai ya'ira, torõi ndra'aga ba da'õ sara ngaluo wa'ara.
8 Mahemolu da'õ, mofanõ zui ndra'aga marugi Kaizarea. Mõiga ba nomo zangombakha sotõi Filifo, ba torõiga ba nomonia. Samõsa ia andrõ ba gotalua nifili ba Yeruzalema.
9 Daõfa nononia alawe no Ibe'e wa'abõlõ Lowalangi wanuriaigõ turia soroi Lowalangi.
10 Me no ara ma'ifu ndra'aga ba da'õ, tohare moroi ba Yudea samõsa zama'ele'õ sotõi Agabo.
11 I'ondrasi ndra'aga ba ihalõ mbõbõ lõwi Waulo. Ibõbõ gahenia awõ dangania faoma bõbõ lõwi andrõ ba imane, "Da'e niw̃a'õ Geheha Lowalangi: Labõbõ si mane da'e zokhõ bõbõ lõwi andre niha Yahudi ba Yeruzalema, ba labe'e ba danga soi bõ'õ si tenga niha Yahudi."
12 Me marongo da'õ, ma'andrõ sibai khõ Waulo, ya'aga ba ira talifusõ si torõi ba Kaizarea, ena'õ bõi mõi ia ba Yeruzalema.
13 Ba hiza imane wanema li, "Hadia guna wa me'e ami si mane da'e irege abu dõdõgu? No aoha gõlõgu tenga ha mõi nira'u, ba wa'amate gõi bõrõ Yesu So'aya."
14 Lõ ifondrondrongo niw̃a'õma Faulo, andrõ mabato wanenaw̃a ya'ia. Mamane, "Ya alua zomasi Zo'aya."
15 Me no ara ma'ifu torõi ndra'aga ba da'õ, mafa'anõ gamagamama ba numalõga ba Yeruzalema.
16 Fao khõma gõi õsa ndra talifusõ moroi ba Kaizarea ba wamasao ya'aga ba nomo Manaso, bõrõ me ba nomonia torõi ndra'aga. (Manaso no niha moroi ba Zifirusi si no ara tobali solo'õ khõ Yesu.)
17 Ba me marugi Yeruzalema, latema'õ ndra'aga faoma fa'omuso dõdõ ira talifusõ ba da'õ.
18 Mahemolu da'õ mõi awõma Waulo wamalukhaisi Yakobo; fefu zatua ba mbanua Niha Keriso so ba da'õ gõi.
19 Me no aefa i'owai ira, itutunõ khõra Faulo fefu zi no Ilau Lowalangi khõnia ba gotalua niha soi bõ'õ si tenga niha Yahudi.
20 Me no larongo nidunõdunõ Waulo andrõ, fefu ira lasuno Lowalangi. Aefa da'õ lamane khõ Waulo, "He talifusõma Faulo! Lõ tola lõ'õ aboto ba dõdõu wa bariburibu niha Yahudi samati khõ Yesu. No si lõ farõi ira fefu wolo'õ Oroisa Lowalangi nifa'ema Moze.
21 Ba no larongo iada'e wa mamahaõ ndra'ugõ ba niha Yahudi si torõi ba gotalua soi bõ'õ, ena'õ laheta ira ba huku Moze andrõ. No õ'amenesi ira ena'õ bõi laboto nonora ma zui ena'õ bõi la'o'õ hada niha Yahudi.
22 No larongo iada'e niha Yahudi samati andrõ wa so ndra'ugõ ba da'e. Tobali, hewisa iada'e?
23 Sõkhi na õ'o'õ niw̃a'õma. So daõfa niha ba da'e zi no fawu'u li khõ Zo'aya.
24 Abõlõ sõkhi na mõi ndra'ugõ fao khõra wamalua halõw̃õ famoni boto, ba bu'a zoguna khõra ena'õ latõwõ mbura. Ba zi manõ oroma dania ba niha fefu wa faya nirongora sanandrõsa khõu, bõrõ me ya'ugõ samõsa õ'o'õ goroisa Lowalangi nifa'ema Moze.
25 Ba sanandrõsa ba soi bõ'õ si faduhu tõdõ khõ Yesu, no mafa'ohe'õ zura khõra sanandrõsa ba gangetulama wa tebai la'a gõ si no labe'e sumange ba nadu, tebai la'a ndro, ma zui urifõ si mane nitõgi bagi; ba tebai lalau wohorõ."
26 Mõi Waulo awõ zi daõfa andrõ lalau halõw̃õ fangamoni'õ boto mahemolu da'õ. Aefa da'õ mõi ira ba Nomo Zo'aya ba wangombakha ha'uga ngaluo tõ awena ahori halõw̃õ fangamoni'õ boto ba ba wame'e sumange khõra dozi ira.
27 Me no arakha awai ginõtõ si fitu ngaluo andrõ, so õsa niha Yahudi moroi ba danõ Asia sangila Faulo ba Nomo Zo'aya. Lafawe'e niha sato ba wondra'u Faulo,
28 mu'ao ira lamane, "Mitolo, ya'ami niha Gizera'eli! Ya'e nihania zanõrõnõrõi misa wamahaõ niha ba wamahaõ si lõ faudu ba soi Gizera'eli, solaw̃a oroisa Lowalangi nifa'ema Moze, ba solaw̃a gõi Omo Zo'aya andre. Ba iada'e i'ohe nasa niha soi bõ'õ si tenga niha Yahudi we'amõi ba Nomo Zo'aya ba ita'unõisi nahia ni'amoni'õ andre!"
29 (Imanõ wanguma'õ bõrõ me no la'ila Derofimo niha Nefeso andrõ ba mbanua, faofao khõ Waulo; lawalinga no i'ohe ia Faulo we'amõi bakha ba Nomo Zo'aya.)
30 Fawuka mbanua ma'afefu, oi zara fagohigohi niha, owulo ira. Lara'u Waulo ba lasõbi baero ia moroi ba Nomo Zo'aya. Ba la'ondruhõ'õ bawa ndruhõ ba Nomo Zo'aya.
31 Gasagasa da'õ edõna labunu Waulo niha samawukaisi andrõ, ba so niha sangombakha khõ gomandra zaradadu Roma wa no fawuka zi sagõrõ Yeruzalema.
32 I'anema'õ ihalõ õsa hõgõ zaradadu awõ fazuri, la'alio'õ we'amõi ba nahia zi fawuka andrõ. Me la'ila gomandra awõ zaradadu andrõ, labato niha sato wamõzi Faulo.
33 Numalõ gomandra khõ Waulo wondra'u ya'ia, ba ifaw̃a'õgõ ena'õ labe'e mbilagu ba dangania. Aefa da'õ isofu komandra haniha Waulo ba hadia zi no ilau.
34 So õsa moroi ba niha sato zanema li wanguma'õ si mane da'e, ba so gõi zanguma'õ si mane da'õ. Alua waguaguasa irege tebai i'ila komandra andrõ hadia zindruhu zalua. Bõrõ da'õ ibe'e wareta ena'õ la'ohe ba gõdo sebua Waulo.
35 Me la'ohe ia ba nora, alua wawukasa sabõlõbõlõ irege la'osa'õ Waulo ira fazuri.
36 La'o'õ ira moroi furi ngawawa niha samawuka andrõ si'ao'ao sanguma'õ, "Mibunu ia!"
37 Me edõna mõi sibai bakha ba gõdo sebua, imane Faulo khõ gomandra andrõ, "Hadia tola fahuhuo ndra'odo khõu sabata, Tuha?" Isofu komandra andrõ, "Hadia õ'ila li Yunani?"
38 "Na si manõ, hadia tenga niha Miserai luo no andrõ ndra'ugõ, samalua folaw̃a ba solohe õfa ribu niha samawukaisi, solohe fangõna we'amõi ba danõ si mate?"
39 Imane Faulo, "Niha Yahudi ndra'odo; banua Daresu, banua sebua ba Gilikia. Tolo, tehegõ khõgu fahuhuo ba niha sato andrõ."
40 Ba me labe'e ginõtõ khõ Waulo, ba muzizio ia ba nora, ibe'e kode faoma tangania, tobali ahono fefu niha. Aefa da'õ fahuhuo Waulo khõra ba li Heberai'o. Imane Faulo,
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA