Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb kai nepatad rat nedeh, idi kai nenalan maya' kapal idi nacing déi' Kus. Idi kenebpa kai nacing déi' Rodus idi rat déi' iné' déi' Patara.
2 Déi' Patara inan kapal luk amé' déi' Punika, idi kai numak kapal ineh idi nenalan.
3 Kareb kai nenier bawang Siprus idi kai nenecan bawang ineh pa kabing, idi petacu nenalan iné' bawang Siria idi netemurun déi' bawang Sur; ngaceku déi', kapal ineh nengeruat uangneh.
4 Idi kai nepapu' dengan tuda'-tuda' lun manu, idi netudo déi' seminggu. Idi ideh tigio Roh pad ideh nengecuk ni Paulus aleg amé' déi' Yerusalim.
5 Kareb pangeh mabud tuda'-tuda' aco kai netudo déi', idi kai nenalan. Idi amung-amungdeh dengan awan idi anak-anakdeh, nenated nekai remuat rat bang bawang ineh, idi kai netekeradung idi nesembayang tangeb abpa' rayeh.
6 Kareb kai pangeh nepetabi' seburur dengan seburur, idi kai numak bang kapal, idi ideh nuli'.
7 Kai petacu nalan rat Sur macing déi' Tolemais, idi kai nemaré tabi' kuan kinanak-kinanak ineh idi netudo dengandeh seaco kinioneh.
8 Kenebpa kai nenalan idi nacing déi' Kaisaria. Kai tudo bang ruma' Pilipus, lun luk nated Bala luk Do' ineh, ieh ineh selemulun ratnan tudu' burur luk pinili' déi' Yerusalim.
9 Idi lun ini inan apat burur anak decur luk pun mebaruh luk nemada' bala luk biré Allah.
10 Laba' kai tudo tuda'-tuda'a aco déi', inan seburur nabi ngadanneh Agabus, netemurun rat bawang Yudia.
11 Ieh iné' matun nekai; idi ieh nengalap abet awa' Paulus, idi nengabet kukud idi ticu'neh sebuleng, keburi'neh, "Kudeng ini bala Roh Meligan, 'Lun luk kuan abet awa' ini miak betin lun Yahudi déi' Yerusalim, idi ieh baréndeh bang palad lun pupu baken.'"
12 Kareb kai neninger bala ineh, idi kai dengan kinanak-kinanak bang bawang ineh nemutuh neneh aleg amé' déi' Yerusalim.
13 Iamo' kebala Paulus, "Anunké ulekneh muyuh nangi' idi ngelaso niatku? Ngaceku ui temina' baken betin mo', iamo' pitayen déi' Yerusalim ngaceku ngadan Tuhan Yésus."
14 Kareb ieh na sikal mubuk, idi kai pana' nucu' idi nepebala, "Nima' pian Tuhan mangun."
15 Pangeh ineh kai netemina' idi iné' Yerusalim.
16 Idi sebuang kinanak rat Kaisaria nemaya' nekai, idi nenated nekai amé' matun Menason, lun Siprus luk pangeh mio mangun ku anak sekola' Yésus. Idi kai sikal rudap bang ruma'neh.
17 Kareb kai nacing déi' Yerusalim idi kinanak-kinanak ineh pana' nenganak nekai dengan mawang niat.
18 Kenebpa Paulus nemaya' nekai amé' papu' Yakub; Idi amung-amung lun rayeh sidang pana' inan teh déi'.
19 Paulus nepetabi' nedeh, idi ieh nemada' nedeh ratnan amung-amung luk inau' Allah arang lun pupu baken dengan kekamenneh.
20 Kareb ideh pangeh neninger bala Paulus, ideh nengerayeh Allah idi nepebala neneh, "O kinanak, siruh! Inan tuda'-tuda' ngeribu lun Yahudi luk pangeh manu, iamo' amung-amungdeh ineh mepicet ngimet Ukum Musa.
21 Iamo' ideh pangeh neninger ratnan iko mada' amung-amung lun Yahudi luk tudo arang lun pupu baken ineh, aleg maya' Ukum Musa, idi aleg nunat anak-anakdeh idi aleg maya' adat lun Yahudi.
22 Kali' rungen ideh miak ninger ratnan acingmu. Anunké luk miak ruen tau?
23 Ngaceku ineh, nganau' luk badén kai namu. Kai inan apat burur tungé' luk pangeh pejani'.
24 Do' iko maya' nedeh idi ngeligan bururmu sebuleng dengandeh teh, idi ngedengan nedeh ku usin, pad ideh miak ngiki uluhdeh, idi amung-amung lemulun miak kali' idi bala luk bila lemulun kuandeh ratnan iko na matu, iamo' iko sebuleng pana' maya' Ukum Musa teh.
25 Iamo' kuan lun pupu baken luk pangeh manu ineh, pangeh kai nemaré surat, mada' luk pinutut kai pad ideh na kuman luk biré kuan akang, idi dara', idi pung luk naté nekaling, idi pad ideh na pasét."
26 Paulus nenguit lemulun ineh maya' neneh, idi kenebpa ieh nengeligan bururneh sebuleng dengandeh. Ieh nesemuet bang Ruma' Allah idi nemada' ratnan tuda' aco luk inandeh uen ngeligan ineh, pad ideh miak maré luk baréndeh ineh.
27 Kareb malé mabud tudu' aco kinioneh, idi lun Yahudi rat Asia ineh pana' luk nenier Paulus bang Ruma' Allah ineh, nengagau lun mula' idi nengakem ni Paulus,
28 Idi nengitang, keburi'deh, "O lun Israil, miket! Ini ieh luk mada' iapeh-iapeh idi ngedat nelun Israil, Ukum Musa, idi Ruma' Allah ini. Meluun teh ieh nenguit tuda'-tuda' lun pupu baken semuet bang Ruma' Allah, pad nengelutak su luk meligan ini."
29 Ideh nepebala kudeng ineh ngaceku atun ideh pangeh nenier Tropimus lun Epesus ineh nepamung dengan Paulus déi' Yerusalim, idi ideh nengerawé Paulus pangeh nenguit neneh amé' bang Ruma' Allah.
30 Idi amung-amung lun bang bawang ineh meria', idi pupu ineh pana' nupun idi nepamung. Ideh nengakem ni Paulus idi ideh nengeruid neneh remuat rat bang Ruma' Allah ineh. Idi petacu ideh nengitek tanga'-tanga' Ruma' Allah.
31 Kareb lun mula' sikal ngaté neneh, idi bala nacing kuan lun rayeh baweh Rum ratnan amung-amung lun bang bawang Yerusalim meria' peh.
32 Idi ieh petacu nenguit tuda'-tuda' lun pebunu' idi lun rayehdeh, idi ideh netemurun nupun iné' Yerusalim. Kareb lun mula' nenier neneh dengan lun pebunu' ineh, idi ideh nugka' mebal ni Paulus.
33 Idi lun rayeh baweh ineh iné' ngakem ni Paulus idi nengecuk nedeh ngabet neneh ku dueh kaling. Idi kebalaneh, "Idéké lemulun ini, idi anun luk inau'neh."
34 Idi sebuang rat arang lun mula' ineh nengitang kudeng ini, idi sebuang kudeng ineh. Ideh pelaba ria' pad lun rayeh baweh na miak kali' dengan megala' anun luk pangeh nangun. Idi ieh nengecuk nedeh nguit ni Paulus semuet bang libung lun pebunu' luk meraben.
35 Idi kareb ieh nacing inan ican, idi ieh binirir tuda'-tuda' lun pebunu', ngaceku lun mula' pelaba ria';
36 ngaceku lun mula' ineh maya' puet idi ngitang-ngitang, "Ngaté neneh!"
37 Kareb ideh nenguit Paulus lélé semuet bang libung lun pebunu', idi ieh nepebala kuan lun rayeh baweh, kebalaneh, "Miak ui pegayam namu?" Idi keburi' lun rayeh baweh ineh, "Kali'mu buri' Grika?
38 Kudeng pieh kudeng ineh iko baken lun Masir luk nengegio kedaluh atun, idi luk nenguyut apat ngeribu lun pebunu' amé' su luk ali-ali?"
39 Iamo' kebala Paulus, "Ui ini lun Yahudi rat Tarsus, luk tinganak bang aceh bawang luk mebala bang tana' Kilikia, idi ui mutuh namu nima' negku pebala nelun mula' ini."
40 Lun rayeh baweh ineh nenima' neneh, idi Paulus netuped luun ican, idi nengayep nelun mula' ineh. Ideh nepirud, idi ieh nepebala dengan buri' lun Iberani, kebalaneh:
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA