Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lẽq jaman laẽq, Allah kereng bemanik lẽq leluhurte langan nabi-nabi kadu macem-macem care.

² Laguq lẽq jaman ahir niki, Allah bemanik lẽq ite langan perantarean Bije-Ne, saq sampun tetentuang jari ahli waris selapuq saq araq. Langan Ie Allah sampun cipteang alam semeste.

³ Ie saq nyugulang cahaye kemuliean Allah saq menah tandur; Ie wujut nyate Allah. Ie ẽndah saq meliharaq keselametan alam semeste niki siq manik-Ne saq bekuase. Sesampun Ie ngapus dose, Ie melinggih lẽq sedi kanan Saq Maheagung lẽq taoq saq paling atas.

⁴ Bije saq asalne lẽman Allah nike mauq kedudukan jaoq atasan lẽman malaẽkat, dait pesẽngan saq teicanin siq Allah lẽq Ie ẽndah jaoq muliean lẽman pesẽngan saq teicanin tipaq malaẽkat.

⁵ Allah nẽnten uwah bemanik maraq niki lẽq sopoq malaẽkat, "Deside Bije saq asalne lẽman Tiang, lẽq jelo niki Tiang sampun jariang Deside Bije Tiang." Dait, "Tiang gen jari Bapa-Ne, dait Ie gen jari Bije Tiang."

⁶ Laguq sewaktu Allah ngutus Bije-Ne saq sengake ojok dunie niki, Allah bemanik maraq niki, "Selapuq malaẽkat Allah wajib nyembah Ie."

⁷ Mengenai malaẽkat-malaẽkat, Allah bemanik maraq niki, "Allah miaq malaẽkat-malaẽkat-Ne jari angin, dait pelayan-pelayan-Ne jari nyale api."

⁸ Laguq mengenai Bije-Ne, Allah bemanik, "Tahte Deside, ya Allah, gen kekel selaẽq-laẽqne! Pemrẽntahan Deside nike pemrẽntahan saq adil.

⁹ Deside suke lẽq keadilan, dait meriq lẽq hal saq jahat, keranaq nike Allah, Allah Deside, milẽq Deside dait ngicanin Deside kehormatan saq datengang sukecite, lebihan lẽman batur-batur Deside."

¹⁰ Allah bemanik ẽndah, "Deside, Tuhan, lẽq penembẽqne cipteang gumi, dait Deside mẽsaq cipteang langit.

¹¹ Selapuqne nike gen musnah, dait jari lotoh maraq kelambi; laguq Deside gen tetep araq.

¹² Gumi langit niki gen Deside lepit maraq kelambi, dait gen Deside gentiq siq saq lain. Laguq Deside nẽnten gen berobah, dait idup Deside nẽnten gen tutuq."

¹³ Ndẽqne araq sopoq juaq malaẽkat saq sampun nerimaq Manik Allah saq maraq niki, "Melinggih lẽq sedi kanan Tiang, jangke Tiang miaq musuh-musuh Deside takluk lẽq Deside."

¹⁴ Malaẽkat-malaẽkat nike cume roh-roh saq ngelayanin Allah, dait saq teprẽntah siq Allah jari ngelayanin dengan-dengan saq gen nerimaq keselametan.

Ibrani

Video Ibrani 1

Ikuti Kami:

KONTAK | PARTISIPASI | DONASI