Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nai nggo megati Dibata ngerana man nini-nininta arah nabi-nabi alu erbage-bage cara.
2 Tapi i bas paksa-paksa si arah pudi enda ngerana Ia man banta arah AnakNa. Arah AnakNa e me Dibata njadiken kerina si nasa lit; AnakNa e ItetapkenNa jadi si mada kerina si nasa lit.
3 Arah Ia ersinalsal terang kemulian Dibata, janah Ia tuhu-tuhu gambar Dibata. Ia me si natang kerina si nasa lit alu KataNa si erkuasa. Kenca IbersihkenNa manusia i bas dosa-dosa nari, kundul Ia i surga arah kemuhen Dibata si Mada Kuasa si meganjangna.
4 Anak e nggo jadi ndauh ganjangen asangken malekat-malekat, bagi GelarNa pe nggo ibereken Dibata ganjangen asangken gelar malekat-malekat.
5 Sabap man malekat-malekat labo pernah ikataken Dibata, "Kam me anakKu; sendah Aku jadi Bapandu." Man malekat si apai pe labo pernah ikataken Dibata, "Aku me jadi BapaNa, janah Ia me jadi AnakKu."
6 Tapi asum isuruh Dibata AteNa AnakNa sintua ku doni enda, IkatakenNa, "Kerina malekat Dibata arus nembah man Anak e."
7 Kerna malekat-malekat ikataken Dibata, "Ibahan Dibata malekat-MalekatNa angin, janah suruh-SuruhenNa dilah api."
8 Tapi kerna Anak e ikataken Dibata, "Kursi PemerentahenNdu o Dibata, rasa lalap me! PemerentahenNdu e me pemerentahen si adil.
9 Ngena atendu si bujur, janah nembeh atendu nandangi si jahat; erdandanken si e me maka Dibata, e me Dibatandu, nggo ngangkat Kam, jenari IpehagaNa Kam lebih asa TemanNdu, si erbahanca meriah UkurNdu."
10 IkatakenNa pe tole, "Kam o Tuhan, mula-mulana nggo njadiken doni enda, janah alu TanNdu jine nggo IjadikenNdu langit.
11 Masap me pagi si enda kerina, tapi Kam tetap nge rasa lalap; reh mawesna me pagi kerina bagi uis.
12 IlipatNdu me pagi kerina si nasa lit bagi uis, jenari isambari pagi alu si deban. Tapi Kam tetap nge rasa lalap, UmurNdu la erkeri-kerin."
13 Man malekat-malekat si apai pe labo pernah ikataken Dibata, "Kundullah i jenda arah kemuhenKu, seh kutamaken imbang-ImbangNdu jadi dedeh-dedehen NaheNdu."
14 Adi bage kai dage malekat-malekat e? Malekat-malekat e, e me kesah penampat persuruhen Dibata guna nampati kalak si ngaloken keselamaten pagi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA