Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tempo nggaulu, nadea ngganimo Alatala nompasimbayu tesaNa ante mpengaya-ngaya cara ka *nabi-nabi anu nompapola tesaNa haitu ka totuata nggaulu.
2 Tapi ri tempo nggapuri hitu AnaNa mbotomo nompasimbayu tesaNa ka kita. AnaNa haitu nipopale nu Alatala nompajadi dunia, bo Alatala nompakatantu AnaNa haitumo masipato majadi tupuna pura-pura anu naria.
3 AnaNa haitu nompopakita kuasa bo kaoge nu Alatala, bo Ia nasimbayu ntoto nte Alatala. Iamo nombakuasai bo nompiara mpengaya-ngaya ri dunia ante tesaNa nakuasa. Naupu Ia nombakabasaka manusia lako ri dosa, Ia nonturo ri ponturo magau ri suruga ri panggana nu Alatala toNeliu KaogeNa.
4 Jadi Ia nipakalangapa ntoto pade *malaeka-malaeka nu Alatala, bo nturo nidekei nu Alatala ka Ia naogepa pade nturo nu malaeka-malaeka.
5 Nalantomo kaoge i Yesus apa ledo ria sanggania Alatala notesa ka malaekaNa ivei: "Ikomo AnaKu, eo hitu Yaku najadi TuamaMu!"
6 Bo tempo Alatala nombatudu Ana lumbuaNa makava ri dunia hitu, niuliNa muni ivei: "Pura-pura malaeka kana mombasomba AnaKu."
7 Alatala nombatesa malaeka-malaekaNa ivei: "Yaku nompajadi malaeka-malaekaKu nasimbayu mpo poiri. Ira nasimbayu mpo apu narega."
8 Tapi niuliNa ka AnaNa ivei: "Ikomo Alatala, bo poparentaMu maroo sampe ri kasae-saena, Iko moparenta todeaMu ante rara nanoa.
9 Iko nompotove pokainggu nanoa bo navuu mataMu nanggita pokainggu natenggo. Jadi haitu sampe Yaku, TupuMu Alatala nompelisi Iko, bo nibilaKu Iko bo nipakadambaKu raraMu nelabipa pade roa-roaMu."
10 Bo Alatala muni nanguli ka AnaNa ivei: "Pue, Iko nompajadi dunia ri ulu jadina, Bo langi muni asele mpaleMu.
11 Langi bo tana kana malipo, bo magero mpo baju naranta, Tapi Iko bate-batena maria.
12 Langi bo tana ratikaMu nasimbayu mpo buya. Bo rasambei ante baruna nasimbayu eva baju narantamo nisambei ante baruna. Tapi Iko ledo ntoto mabali, KatuvuMu ledo ria kaupu-upuna."
13 Bo ledo ria sanggania Alatala nanguli ka malaekaNa mpo niuliNa ka AnaNa ivei: "Ponturomo ri sabingga ngganaKu sampe Kupopekou pura-pura baliMu nte Iko."
14 Jadi, isema kakanana malaeka-malaeka nTupu? Ira pura-pura topotulungi Alatala anu nisuroNa mantulungi bo manggeniaka tona rapakasalamaNa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA