Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Gi’ dhimen li-baliyan Allah abu-dhabu ka bangatowana sampeyan sareng kaula sadaja kalaban parantara’anna bi-nabbi ngangguy cara se acem-macem.

² Nangeng e jaman samangken paneka Allah abu-dhabu ka sampeyan sareng kaula sadaja kalaban parantara’anna Pottrana. Kalaban parantara’anna Pottrana ganeka Allah nyepta’agi alam dunnya paneka. Ban Allah ampon nantowagi ja’ Pottrana ganeka se kaagungan ha’ ka sadajana se badha paneka.

³ Salerana ganeka se nyonarragi kamolja’anna Allah se talebat rajana; Salerana ganeka gambarra Allah se nyata. Salerana se kalaban dhabuna se talebat kobasana meyara alam dunnya paneka kantos ta’ lowang. Saamponna Salerana marenge jalan ka manossa kaangguy epabebas dhari sa-dusana, Salerana ngalenggi’i korse pamarenta’anna e sowarga asareng Allah, Pangobasa se paleng tenggi.

⁴ Pottra ganeka narema kadhudhugan se atenggiyan dhari malaekat, ban asma se eparengngagi Allah ka Salerana jugan lebbi kahormat katembang asma se eparengngagi ka malaekat.

⁵ Allah ta’ oneng adhabu sapaneka ka settonga malaekat, "Ba’na Tang ana’; e are teya Sengko’ daddi Ramana ba’na." Ta’ oneng jugan Allah adhabu sapaneka parkara malaekat se ka’dhimma’a jugan, "Sengko’ daddiya Ramana, ban aba’na daddiya Tang ana’."

⁶ Nangeng e bakto Allah ngotos Pottrana se sareyang ka dunnya paneka, Allah adhabu sapaneka, "Sakabbiyanna malaekadda Allah wajib nyemba ka Pottra jareya."

⁷ Parkara kat-malaekadda Allah adhabu sapaneka, "Bi’ Allah kat-malaekadda epadaddi angen, dineng din-pangladinna epadaddi apoy."

⁸ Tape ka Pottra ka’issa’, Allah adhabu, "Tahtaepon Junandalem, Guste Allah, bakal langgengnga salanjangnga! Pamarenta’annepon Junandalem pamarenta’an se adil.

⁹ Junandalem lebur ka kaadilan, sareng baji’ ka karoceyan; lantaran gapaneka, Allah, Allahepon Junandalem mele Junandalem ban marenge Junandalem kahormadan se madhateng kagumbira’an, ngalebbi’i ca-kancaepon Junandalem."

¹⁰ Allah jugan adhabu, "Junandalem, Pangeran, dha’-adha’na nyepta’agi bume, ban Junandalem dibi’ se abadhi langnge’.

¹¹ Sadajana bakal mosna’a, daddiya laju akadi rasogan; nangeng Junandalem paggun ta’ kera aoba.

¹² Alam dunnya ka’dhinto’ sareng Junandalem bakal epelko’a epakadi rasogan, ban badhi eganteyana se laen. Nangeng Junandalem tadha’ obana, ban odhi’epon Junandalem tadha’ aherra."

¹³ Allah ta’ oneng adhabu sapaneka ka malaekat sanare settonga, "Mara toju’ e kanganna Sengko’ reya, sampe’ so-mosona ba’na bi’ Sengko’ epanyemba ka ba’na."

¹⁴ Manabi sapaneka, kat-malaekat gapaneka ponapa sabendherra? Kat-malaekat ganeka roh-erroh se aladine Allah, ban se epakon Allah nolonge reng-oreng se narema’a kasalameddan.

Ibrani

Video Ibrani 1

Ikuti Kami:

KONTAK | PARTISIPASI | DONASI