Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Umat i Allah kon Epesus inta motoindudui ko'i Kristus Yesus!
2 Aku'oi ki Paulus, inta nobalií rasul i Kristus Yesus sim pinodoyon kon ibog i Allah tontanií, aku'oi umuran mopo'igum makow in doaí simbaí ki Allah, ki Amaí naton bo ki Tuhan Yesus Kristus mobogoi im barakat bo kobiagan motompia ko'i monimu.
3 Dinayo-dayowdon ki Allah, ki Amaí i Tuhan naton ki Yesus Kristus! Sia ain nobogoi im barakat ko'i naton, barakat rohani kom bonu in soroga, sing kita ain notobatuí i Kristus.
4 Ko wakutu in dunia na'a diaípa pinomia kita ing koyongandon pinilií i Allah pinongin i Kristus takin makusud baí kita mobalií kapunya'an-Nya inta tongaí mosumbah ko'i-Nia bo mogaid kon onu inta pinarentah-Nya. Lantaran ki Allah motabi,
5 daí sinantuí-Nyadon muna, kom pongin i Yesus Kristus, baliíon-Nyadon ki adií-Nya tontanií ing kita. Bo tuabií ing kino ibog-Nya aidan.
6 Dinayo-dayowdon ing ki Allah inta mokawasa, sin tabi-Nya inta totok moḷoben ko'i naton pinonyata-Nyadon pinongin i Adií-Nya.
7 Ki Kristus minatoidon sim mopobebas ko'i naton bo mongampung kom bayongan dosa.
8 Pinomia-Nya intua sim motabi totok ko'i naton bo tabi-Nya tatua inogoi-Nyadon ko'i naton takin bayongan hikmat bo pongortian.
9 Ibog-Nyabií tontanií im nopota'au ko'i naton in roncana-Nya inta no'ibunipa tatua. Sinantuí-Nyadon kon roncana-Nya tatua iḷapatan-Nyadon pongin i Yesus Kristus.
10 Makusud in roncana-Nya tatua im baí bayongan yagi-yagi inta kon soroga ande inta kon dunia na'a, in notobatuídon i Kristus saḷaku tongguḷu. Bo soaáḷ tatua iḷapatandon i Allah aka aindon wakutunya.
11 Bayongan yagi-yagi pinomia i Allah pinoduduibií in ibog-Nya bo kaputusan-Nya tontanií. Nongkon pinomangkoianpamai Sia ain nomilií ko'i naton sin ibogon-Nya kita mobaliídon umat-Nya sim motobatuí i Kristus.
12 Koligai ing kita inta muna-munamai moharap ko'i Kristus, modayow ko'i Allah sin oaíidan-Nya inta totok moḷoben!
13 Mo'ikow nion aindon nobalií umat i Allah wakutu im mo'ikow nokodongog kong koyow i Allah. Koyow tatua in Habarbií Mopia inta mobogoi ing kasaḷamatan ko'i monimu. Mo'ikow in nopirisaya ko'i Yesus Kristus, tuamai sinontandaían-Nyadon im mo'ikow saḷaku kapunya'an-Nya. Tandaí-Nya tatua in Rohobií mokudus inta pinodandi-Nya.
14 Roho tatua in nobalií jaminan kong kita im motarimabií kon onu inta aim pinodandi i Allah kon umat-Nya. Tana'a mobogoi ing koyakinan ko'i naton kom pobebasonbií i Allah in umat-Nya. Dinayo-dayowdon ing ki Allah sin oaíidan-Nya inta totok moḷoben tua!
15 Manangka intua naonda ing kinodongoganku kom mo'ikow in nopirisayadon ko'i Tuhan Yesus, bo motabi doman kom bayongan umat i Allah,
16 daí aku'oi tantuí mopoyaput in sukur ko'i Allah sin lantaran mo'ikow. Pomuḷoi in aku'oi mosambayang umuranku doman kotangoian i mo'ikow.
17 Aku'oi mopo'igum ko'i Allah, inta ki Tuhan naton ki Yesus Kristus, ki Amaí inta momulia totok, simbaí ogoian in Roho-Nya im mo'ikow. Roho tatua im mopobalií ko'i monimu mobijaksana bo po'ontong-Nya ing ki Allah ko'i monimu, sahingga ing kota'auandon monimu in Sia.
18 Po'igumonku doman ko'i Allah, simbaí bukaían-Nya in raian monimu sahingga im mobayagdon bo komangaleandon monimu onu inta mota'au harapon monimu nongkon i Allah inta nogoinií ko'i monimu. Bo baí kota'auandon doman monimu kom mobayongbií totok im barakat mopia inta sinadia i Allah kon umat-Nya;
19 bo moḷoben totok ing kawasa-Nya ko'i naton inta mopirisaya, notongkai ing kakuatan kawasa-Nya inta moḷoben,
20 inta pinakeí-Nya wakutu in nomiag bui ko'i Kristus nongkon kinopatoian-Nya bo nobogoi ko'i-Nia in ḷolituían inta totok moḷantud, moyotakin i Allah kon soroga.
21 ḷolituían pomarenta'an i Kristus tua moḷantu-ḷantudbií nongkon ḷolituían pomomarenta'an im bayongan pomarentah, bayongan ponguasa, bayongan itoi bo bayongan tuang bo bayongan intau inta inogoian in ḷolituían moḷantud; mosia inta nobiag masa in tana'a ande mosia inta nobiag mo'iduduimai.
22 Pinotungkud i Allah im bayongan yagi-yagi kolimonag ing kawasa i Kristus, bo ki Kristus inogoi kon jama'at saḷaku tongguḷu im bayongan yagi-yagi.
23 Jama'at tua awakbií i Kristus, pinosempurna i Allah inta noposempurna im bayongan yagi-yagi kon ondaka.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA