Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ 'Esa moi riaka dodoto 'o Efesusoka, gee niodadiokau ma Jo'oungu ma Dutu 'awi 'umati.

² Ngoi ne'ena 'o Paulus, ngoi todadi ma Yesus Kristus 'awi su-suloko sababu ma Jo'oungu ma Dutu woigoraka. Toga-ga'asoko la nanga Dea ma Jo'oungu ma Dutu de ma Yesus Kristus nikula 'o barakati de 'o sanangi.

³ Powisiarene ma Jo'oungu ma Dutu, 'unau ge'ena nanga Jou Yesus Kristus 'awi Dea! 'Una gee 'o sorogaaka wonasibarakati de 'o sagala co-catu ma ngale po'ahu de de 'una, sababu pomarimoi de ma Kristus.

⁴ Ka 'o dunia ma koisidadikuwasi 'ena ma Jo'oungu ma Dutu wonairiokau ma ngekomo ma Kristus, ma dumutu la ngone podadi to 'una 'awi 'umati 'itebi-tebini to 'una wi bionoka de powile-leleani.

⁵ Sababu 'awi dora, so ka ma guruenosi 'ena wositatapuokau 'ato ma ngekomo pomarimoi de ma Yesus Kristus, 'una 'asa wonagoraka podadi to 'una ma sirete wi ngowa-ngowaka. De ge'enau womau wadiai.

⁶ Ge'enau so nou, powisiarene ma Jo'oungu ma Dutu, sababu 'awi dora 'iamoko ma sala ngoneno, ma ngekomo 'awi Ngowaka gee wisiboso-bosono.

⁷ Sababu ma Kristus wito'oma de wosongene ma ngale watuusu nanga so-sowono, so ma rai ma Jo'oungu ma Dutu kowosi-singinawau nanga sowono sababu wonadora.

⁸ De sababu 'awi dora ge'ena so wi singina posironga de 'isureka ngoneno de wobarija ma sala so wasahe 'iodumu ma ngale ngone.

⁹ De 'okia naga gee womau wadiai, gee ma sira koiwaituawasi so 'o nyawa rekeni koyanakowasi, ne'ena wosiwaitokau ngoneno. 'Una wositatapuokau 'okia naga gee womau wadiai ge'ena dua ma Kristus wamanarama.

¹⁰ Gee wi singinaka womau wadiai, ge'ena ma dumutu la 'okia sonaa 'o sorogaaka de 'o duniaka 'iodumu 'imarimoi, de ma Kristus wosibalusu. De ge'ena dua ma Jo'oungu ma Dutu wosikokiduanga de wositotomo gee ma 'orasi ya'adono de!

¹¹ Ma Jo'oungu ma Dutu womanarama moteke to 'una ma sirete 'awi mau de 'awi butusangi. Ka ma guruenosi 'una miirikokau ngomi ngano 'una womau ngomi miodadi to 'una 'awi 'umati sababu miomarimoi de ma Kristus.

¹² La ngomi gee miosira-sira mimasinganono ma Kristusika, 'amia 'ahu ma sigoronaka misiarene ma Jo'oungu ma Dutu sababu wokumati ma sala.

¹³ Ngini mita gee nio'isene ma Jo'oungu ma Dutu 'awi besesongo ge'ena la 'o Habari ma Owa gee nisilaha-laha, de niodadiokau ma Jo'oungu ma Dutu 'awi 'umati. Ngini niongaku ma Yesus Kristusika, ge'enau so ma Jo'oungu ma Dutu winikula 'o no-nako ma ngale ngini ge'ena to 'una 'awi 'umati. Ma no-nako ge'ena la 'o Ngomasa 'Itebi-tebini gee wosijajiokau.

¹⁴ Sababu 'o Ngomasa 'Itebi-tebini wonakulanou, ge'ena ma raiokau ngone 'asa padawongo 'okia naga gee ma Jo'oungu ma Dutu wosijajiokau 'awi 'umatika. Ge'enau so ngone panakokau 'ato ma Jo'oungu ma Dutu 'asa wodiai 'awi 'umati kopoyongosuawau. So nou, powisiarene ma Jo'oungu ma Dutu sababu wokumati ma sala!

¹⁵ Ge'enau so gee to'isenoka 'ato ngini posironga de niongakuoka 'o Yesusika, de niakisibosono ma Jo'oungu ma Dutu 'awi 'umati 'iodumu,

¹⁶ so ngoi kaitaurika to'amalaha ma Jo'oungu ma Dutuka. De tolahidoa ma noimi, ngini mita tinisilahidoa.

¹⁷ Ngoi toga'asoko la ma Jo'oungu ma Dutu ge'ena la nanga Jou Yesus Kristus 'awi Dea gee woku-kumati ma sala, winikula 'o Ngomasa 'Itebi-tebini gee dua nidiai ngini niobarija naga 'o barangi ma owaka. De mita 'asa nisidumutu la wininako 'itiai ma ngale ma Jo'oungu ma Dutu.

¹⁸ Ngoi tolahidoa mita la ma Jo'oungu ma Dutu wapelenga 'ania di-dibangi la 'ania singina ma dodaka niasahe 'iwaiti 'okia naga gee niongano-nganonou ma Jo'oungu ma Dutuoka gee wini'asokokau ma ngekomo ma Kristus. Mita la nianako 'o sagala co-catu posironga ma amoko de ma sure kokiawa positero gee ma Jo'oungu ma Dutu wadua-duangou ma ngale wokula 'awi 'umatika,

¹⁹ de 'awi kuasa posironga ma guatoka wonariwo ngone gee pongaku-ngaku. 'Awi kuasa ge'ena ma batingi koi'iwa

²⁰ gee wapake ma 'orasi wisiwangoli ma Kristus ngaro wosongenukou ma, de wikula 'o pareta ma amoko ma ngale yomasidapareta de de 'una 'o sorogaaka.

²¹ 'O Yesus 'awi pareta 'ifoloi 'iamoko de 'o sagala pamareta, 'o koa-koana, yosibalu-balusu de 'o sagala tuangi, de nago'ona bato gee yakikulakau 'o pareta ma amoko, gee yo'ahu ma 'orasi ne'ena naga bolo ma du'uruoka.

²² Ma Jo'oungu ma Dutu wadiai 'iodumu ge'ena ma Kristus wakuasano. De ma Kristus 'una ge'ena ma Jo'oungu ma Dutu wokulakau 'o jamatika la wodadi 'o jamati ma saeke, ma ngale wapareta 'o sagala moi-moi.

²³ So 'o jamati ge'ena matero ka ma Kristus 'awi roese. 'Una wodiai la 'o jamati ma 'ahu ma gou-goungu 'itiai, sababu 'una wositotomo 'okia sonaa 'iodumu kiaka naga bato.

Efesus

Video Efesus 1

Ikuti Kami:

KONTAK | PARTISIPASI | DONASI