Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Dengan-dengan saq tehususang bagi Allah lẽq Epesus, saq setie lẽq Deside Isa Almasih!

² Tiang, Paulus, siq pekayunan Allah jari rasul Deside Isa Almasih, beharep semoge Allah Bapante dait Junjungan Saq Mulie Deside Isa Almasih ngicanin rahmat dait damẽ sejahtere tipaq side pade.

³ Puji syukur tipaq Allah, Bapa Junjungante Saq Mulie Deside Isa Almasih! Ie ngicanin ite berkah siq selapuq berkah rohani lẽq dalem sorge, sẽngaq ite araq lẽq dalem Almasih.

⁴ Sendẽqman dunie niki tecipteang, Allah sampun milẽq ite langan Almasih siq maksut adẽq ite jari dowẽ-Ne saq husus dait ndẽq bedowẽ cacat cele lẽq arepan-Ne. Lantaran kasih Allah,

⁵ make Ie sampun juluan nentuang bahwe langan Deside Isa Almasih, Ie gen ngangkat ite jari bije-bije dowẽ-Ne sesuai pekayunan-Ne,

⁶ adẽqne tepuji rahmat-Ne saq mulie, rahmat saq teicanin tipaq ite langan Bije saq asalne lẽman Ie saq sanget Ie sayang.

⁷ Sẽngaq lẽq dalem Almasih dait siq daraq-Ne ite bau tetebus, nike pengampunan dose sesuai rahmat-Ne saq melimpah.

⁸ Ie ngelaksaneang nike lantaran Ie sanget ngasihin ite, dait kasih nike limpahang-Ne tipaq ite siq kebijaksanean dait pengertian.

⁹ Menurut pekayunan-Ne mẽsaq, Allah nyatayang rahasie rencane-Ne tipaq ite; Ie sampun netepang bahwe rencane-Ne nike gen teselesẽang langan Almasih.

¹⁰ Rencane nike adẽq selapuq saq lẽq sorge dait saq lẽq gumi, tejariang sopoq lẽq dalem Almasih sebagẽ kepale. Dait hal nike gen teselesẽang siq Allah lamun sampun dateng waktune.

¹¹ Tiang nyampẽang "lẽq dalem Almasih", sẽngaq lẽq dalem Ie tiang pade mauq bagian saq tejanjiqang -- tiang pade saq lẽman penembẽq tetentuang jari nerimaq bagian nike sesuai maksut Allah, saq lẽq dalem selapuqne bekarye menurut keputusan pekayunan-Ne.

¹² Siq care nike, tiang pade saq penembẽq beharep lẽq Almasih, bau memuji Allah lantaran kemuliean-Ne!

¹³ Side pade ẽndah sampun jari dengan-dengan saq tehususang bagi Allah sewaktu side pade dengahang manik kebenaran, nike Kabar Solah saq nyelametang side. Lẽq dalem Almasih ẽndah, side pade tesahang siq Roh Suci, saq tejanjiqang nike.

¹⁴ Roh nike jari jaminan bahwe ite gen nerimaq napi saq tejanjiqang siq Allah tipaq umat-Ne. Niki ngebẽng keyakinan lẽq ite bahwe Allah gen bẽbasang umat-Ne. Puji syukur tipaq Allah lantaran keagungan-Ne!

¹⁵ Keranaq nike, mulai lẽman tiang dengah mengenai iman side pade lẽq Junjungan Saq Mulie Deside Isa Almasih, dait mengenai kasihde lẽq selapuq dengan-dengan saq tehususang bagi Allah,

¹⁶ ndẽq tutuq-tutuq tiang besyukur lẽq Allah mengenai side pade. Tetep tiang sebut arande sewaktu tiang bedo'e.

¹⁷ Tiang tunas adẽq Allah Junjungante Saq Mulie Deside Isa Almasih, Bapa Saq Mulie, ngicanin Roh hikmat dait wahyu sehingge side pade kenal kance Ie. Roh nike gen jariang side pade bijaksane, dait gen nyatayang Allah tipaq side pade sehingge side pade kenal kance Ie.

¹⁸ Tiang tunas adẽq Allah jariang atẽ nuraninde becahaye; adẽq side pade ngerti napi saq bau side pade harepang lẽman Allah saq ngemanikang side pade. Adẽq side pade nenaoq ẽndah berembẽ limpahne berkah-berkah saq solah saq tesedieang siq Allah tipaq dengan-dengan saq tehususang umaq Ie;

¹⁹ dait berembẽ hẽbatne Allah bekarye siq penoq kuase lẽq dalem diriqte saq percaye, sesuai kekuatan kuase-Ne,

²⁰ saq Ie laksaneang sewaktu Ie ngidupang Almasih lẽman ninggal dait ngicanin Ie kedudukan saq paling atas ngiring Allah lẽq sorge.

²¹ Kedudukan Almasih nike jaoq atasan tebanding kance kedudukan selapuq pemrẽntah, selapuq penguase, selapuq pemimpin, selapuq tuan-tuan, dait sai juaq saq sampun teicanin kedudukan saq atas; saq idup lẽq jaman niki dait saq gen idup lẽq jaman saq gen dateng.

²² Selapuqne tetaklukang siq Allah lẽq bawaq kekuasean Almasih, dait Almasih sampun teicanin tipaq jemaah sebagẽ kepale lẽman selapuq saq araq.

²³ Jemaah nike rage Almasih, tesempurneang siq Ie saq nyempurneang selapuq-lapuqne.

Efesus

Video Efesus 1

Ikuti Kami:

KONTAK | PARTISIPASI | DONASI