Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Banua Niha Keriso ba Nefeso, si lõ farõi ba khõ Yesu Keriso!
2 Ya'o, Faulo, sinenge Yesu Keriso, bõrõ nilau dõdõ Lowalangi, utõtõna wa Lowalangi Amada ba So'aya ya'ita Yesu Keriso zangomasi'õ ya'ami ba same'e fa'ohahau dõdõ khõmi.
3 Nisuno Lowalangi, Ama Zo'aya ya'ita Yesu Keriso! No I'amualagõ khõda ngawalõ howuhowu Geheha soroi zorugo, bõrõ me ha sambua ita khõ Keriso.
4 No Ituyu ita Lowalangi ba khõ Keriso, fõna wanga'asogõ ulidanõ andre, ena'õ tobali ita tana khõ Lowalangi, sohauhau ba si lõ sinegu fõna-Nia. Bõrõ wa'omasi Lowalangi,
5 no Ihõnogõi ita, ena'õ tobali ita ono khõ-Nia, ba khõ Yesu Keriso. No da'õ zomasi Ia Ifalua.
6 Nisuno Lowalangi solakhõmi andrõ me I'omasi'õ sibai ita ba khõ Nono-Nia.
7 Bõrõ wa'amate Keriso, no I'efa'õ ita Lowalangi; eluahania no I'efa'õ horõda fefu Lowalangi.
8 I'falua khõda da'õ, bõrõ me no I'omasi'õ ita, ba fa'omasi da'õ Ihõna khõda safõnu fa'atuatua ba fa'aboto ba dõdõ.
9 Ba zomasi dõdõ-Nia samõsa, no I'ombakha'õ khõda Lowalangi nilau dõdõ-Nia andrõ si tobini; ohitõ dõdõ si tobini andrõ si no Ihonogõi i'otarai mbõrõta, I'asiwalisi dania fefu ba khõ Keriso.
10 Ohitõ dõdõ-Nia andrõ ya'ia ba wamarahugõ fefu hadia ia, he si so ba zorugo ba he si so ba gulidanõ, ha sambua ba khõ Keriso si no hõgõ ba khõra. Na no irugi inõtõnia dania ba I'asiwalisi Lowalangi gohitõ dõdõ-Nia andrõ.
11 I'ohalõw̃õgõigõ hadia ia fefu Lowalangi dali zomasi Ia ba angetula-Nia samõsa. No Ituyu ita i'otarai mbõrõta, bõrõ wa'omasi-Nia ita ba khõ Keriso, tobali banua-Nia;
12 bõrõ da'õ, ena'õ ya'ita si ofõna manõtõna khõ Keriso, tasuno Lowalangi andrõ solakhõmi!
13 Ya'ami gõi ba no tobali banua Lowalangi ami, me mirongo goroisa Lowalangi andrõ, ya'ia Duria Somuso Dõdõ andrõ same'e fangorifi khõmi. No faduhu dõdõmi khõ Yesu Keriso, andrõ wa Ibe'e dandra wa tana khõ-Nia ami Lowalangi, ya'ia Geheha-Nia si no ara Ifabu'u.
14 Eheha andrõ we'ewe'e dõdõda, wa tatema hadia zi no Ifabu'u Lowalangi khõ dana khõ-Nia andrõ. Ba Eheha gõi andrõ zamofanõtõna ya'ita, wa no tobali ita tana khõ Lowalangi, nifo'ahonoa-Nia fangefa'õ dania. Nisuno Lowalangi bõrõ lakhõmi-Nia andrõ!
15 Bõrõ da'õ, i'otarai me no urongo wa mamati ami khõ Zo'aya Yesu, ba fa'omasimi mbanua Lowalangi fefu,
16 ba lõ ubatobato wangandrõ saohagõlõ khõ Lowalangi ba khõmi andrõ. Ero na mangandrõ ndra'o ba itõrõ tõdõgu ami.
17 U'andrõ ena'õ Lowalangi Ama Solakhõmi, ba So'aya ya'ita Yesu Keriso, zame'e Eheha-Nia khõmi. Eheha andrõ dania zangatuatua'õ ya'ami ba sangoroma'õ dania Lowalangi khõmi, irege aboto ba dõdõmi Ia.
18 U'andrõ ena'õ Ibokai wangerangerami Lowalangi, muhaga; ena'õ aboto ba dõdõmi hadia nidõnadõnami khõ Lowalangi, si no mogaoni ya'ami. Ba ena'õ mi'ila gõi ha wa'afahõna howuhowu si sõkhi andrõ, si no Ifabu'u Lowalangi ba mbanua-Nia;
19 ba ha wa'ahõlihõli dõdõda wohalõw̃õ Lowalangi si fao fa'abõlõ-Nia ba khõda, ya'ita samati. Fa'abõlõ da'õ si mane fa'abõlõ
20 ni'oguna'õ-Nia me Isusugi Keriso moroi ba ngai zi mate, ba me Ibe'e khõ Keriso andrõ dadaoma fondrege zalaw̃a si fagõlõgõlõ khõ Lowalangi ba zorugo.
21 Fetaro Keriso andrõ no alaw̃a moroi ba wetaro zamatõrõ fefu, yaw̃a zalaw̃a andrõ, yaw̃a zabõlõ fefu, yaw̃a duha, ba yaw̃a zi so tõi fefu; he sauri ba ginõtõ da'e ba he sauri ba ginõtõ si so fõna.
22 No Ifa'u'u fefu hadia ia barõ wa'abõlõ Keriso, ba no Ibe'e Keriso khõ ndra banua Niha Keriso, ena'õ tobali hõgõ ba ngawalõ hadia ia fefu.
23 Banua Niha Keriso andrõ ya'ia mboto Keriso, nifo'ahonoa-Nia bõrõ me ya'ia samõsa zamo'ahonoa hadia ia fefu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA