Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kawanuang Duata su Efesus, apan matuhụ su Mawu Yesus Kristus!
2 Iạ e kai i Paulus, darolohang i Kristus Yesus ual᷊ingu kapulun Duata, mělẹ̌harap'u mal᷊owọko Ruata i Amang i kitẹ dingangu Mawung kitẹ i Yesus Kristus měngonggọu al᷊amatẹ̌ dingangu karal᷊unsemahẹ̌ si kitẹ kěbị.
3 Dalo su Ruata, i Amang u Mawung kitẹ i Yesus Kristus! I Sie něngal᷊amatẹ̌ mararohkẹ̌ apạewen piạ su sorga e si kitẹ, ual᷊ingu nasěmbaụ dingang i Kristus.
4 Kal᷊amonan dunia ini niriadi, Mawu Ruata e seng němile si kitẹ bọ'i Kristus ringangu timonane tadeạu i kitẹ makoạ tataghuaneng'E ringangu tawẹ turạe sarung su těngon'E. Ual᷊ingu kakěndagu Ruata,
5 tangu i Sie seng nisahẹ e reng kal᷊amona u wọ'i Yesus Kristus, i Sie sarung měhengkẹ i kitẹ makoạ manga anạ'E sěsane. Ringangu sembeng kerene kapulune kẹ̌koateng'E.
6 Dalo su Ruata karangetange, u wọu Ahus'E ikẹ̌kěndagẹ e i Sie mamben těngadẹ̌ kụkěndag'i kitẹ.
7 Batụu kapapohong i Kristus, i kitẹ e nịlaambang u Ruata, mangal᷊ene i Sie seng nẹ̌gěllịu ampung si kitẹ, bọu kal᷊awọu rosang kitẹ e.
8 I Sie nẹ̌koạ kerene ual᷊ingu i Sie mamben těngadẹ̌ kụkěndag'i kitẹ, dingangu kakěndagẹ̌ ene nipẹ̌dal᷊embone si kitẹ něpakẹeng kapelẹesa ringangu katatahuěnna.
9 Tumuhụ kapulun'E sẹ̌sane, Duata e kai měhabaru ral᷊irung u kapulun'E si kitẹ; batụu i Sie seng němutusẹ̌ u kapulun'E ene sarungbe ipakaghanape si Yesus Kristus.
10 Kapulun'E ene ute tadeạu patikụ sạbarange baẹ su sorga ringangu waẹbe lai su dunia, makoạ sěmbaụ dingang i Kristus tabidạu těmbonange. Kụ hal᷊ẹ̌ ini e tangu sarungbe ipakaghanapu Ruata e kereu semben nịdatingu tempone.
11 Duata e mẹ̌koạ patikụ sạbarang e tumuhụbe sukapulun'E ringangu putusang'E sẹ̌sane. Dokeng bọu tětạe i Sie seng němile si kitẹ, u i Sie mapulu tadeạu i kitẹ mariadiwe umat'E ual᷊ingu nasěmbaụ dingang i Kristus.
12 Mal᷊owọko i kitẹ e makoạ kakal᷊imonaěngu mělěharapẹ̌ su Mawu Yesus Kristus, mědalo Ruata ual᷊ingu kawawantug'E tạ sihinge.
13 I kamene mal᷊aing seng nakoạ umat'u Mawu su tempong kamene nakaringihẹ̌ bawerang katěngadẹ̌ e, kai Injilẹ̌ mapakasal᷊amat'i kamene. I kamene mangimang su Mawu Yesus Kristus, ual᷊ingu ene Ruata e něngonggọu tatialan tataghuanenge si kamene ute kai Rohkẹ̌'E kụ seng nikẹ̌don'E.
14 Rohkẹ̌ ene e kai papaiang tadeạu i kitẹ sarung měnarimạ apan seng kinẹ̌don Duata su manga umat'E. Ini e makatambam pěngangiaking i kitẹ u Ruata e sarung měngambang umat'E. Dalo su Ruata ual᷊ingu kawawantug'E.
15 Ual᷊ingu ene, nạung iạ deng nakaringihẹ̌ u i kamene mạngimang su Mawu Yesus, dingangu i kamene kụkěndagu patikụ umatu Ruata,
16 iạ e tawẹ umpade mapatarimakasẹ su Mawu Ruata mạanung kamene. Iạ e mang hanesẹ̌ měsẹ̌sẹ̌bạ arengu kereu iạ mẹ̌kal᷊iomaneng.
17 Iạ měkẹ̌kal᷊iomaneng tadeạu Ruata Mawung kitẹ i Yesus Kristus, i Amang mawantugẹ̌ e, měngonggọu Rohkẹ̌'E si kamene. Rohkẹ̌ ene e sarung mapakariading kamene pelesa ringangu sarung mapakal᷊ahẹu Ruata si kamene hakịu i kamene makakiral᷊a si Sie.
18 Iạ mẹ̌kal᷊iomaneng tadeạu Ruata e mamuka ral᷊ungu naungu mapakatualagẹ̌; tadeạu i kamene makaěnna u kai apa hinong kapěharapeng i kamene wọu Ruata e kimui si kamene. Tadeạu l᷊ai i kamene masingkạu kereapa kakěpal᷊e al᷊amatẹ̌ mapapia iapẹ̌dẹ̌dal᷊embo seng nisadian Duata e waugu umat'E,
19 dingangu kereapa kasěllahu kuate Ruata němunara mạhěmpal᷊iung kawasane su ral᷊ung i kitẹ taumata apam mạngimang. Kawasan Duata e tabidạeng kawasa tawẹ sihinge,
20 kụ pinẹ̌karadiahang'E supiạ i Kristus niapẹ̌biahẹ̌ kapia wọu kapapohonge ringangu nangonggọu kal᷊aianeng'E karangetange ringangu Ruata e su sorga.
21 Kal᷊aianeng i Kristus e něngalembong karangetange wọu patikụ kal᷊aianeng u těmbonangu kawanua, patikụ měngangawasa, patikụ měnaněllange, patikụ manga mawu ringangu walạewe i saim piạ pangkate mararangẹ; baẹ i sire apan nẹ̌biahẹ̌ su orasẹ̌ ini, baewelai apan nẹ̌biahẹ̌ su tempo ramahi kạděntane.
22 Duata e napakawatạu kěbị sạbarang su al᷊ungu kawasang Kristus, dingangu něngonggọi Kristus su jamaatẹ̌ e niapakakoạ bọu patikụ sạbarang.
23 Jamaatẹ̌ e kai wadang i Kristus, niapakasukụ i Sie kụ něnukụ haghim patikụ su ral᷊ungu kěbị.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA