Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hun bani si Paulus, apostel ni Kristus Jesus, humbani rosuh ni uhur ni Naibata, hubani halak na pansing i Epesus, na porsaya bani Kristus Jesus.
2 Idop ni uhur ma bani nasiam ampa damei humbani Naibata Bapanta pakon Tuhan Jesus Kristus.
3 Napuji ma Naibata, Bapa ni Tuhan Jesus Kristus, na dob mamasu-masuhon banta bagei ni pasu-pasu partonduyon hun nagori atas ibagas Kristus.
4 Ai ipilih do hita ibagas Ia, sanggah lape itombei dunia on, ase pansing hita anjaha lang panurakon i lobei-Ni, ibagas holong ni uhur.
5 Itotapkon hinan do hita Bani, gabe anak niain-Ni marhitei Jesus Kristus, mangihutkon rosuh ni uhur-Ni,
6 gabe puji-pujian bani idop ni uhur ni na marmulia in, na niidopkon-Ni banta ibagas na hinaholongan-Ni in.
7 Ibagas Ia do dapot hita haluahon marhitei daroh-Ni, ai ma hasasapan ni panlanggaron, domu hubani habayakon ni idop uhur-Ni,
8 na unjah binerehon-Ni banta ibagas hapentaron ampa hauhuron.
9 Ipabotohkon do banta rusia ni sura-sura ni uhur-Ni domu hubani haputusan ni uhur-Ni, na dob tinotapkon-Ni hinan ibagas Diri-Ni.
10 Isurahon do bani gok ni panorangni, pasadahon haganup, na adong i nagori atas ampa na i atas tanoh on, i toruh ni sada ulu, ai ma Kristus.
11 Ibagas Ia do ipilih hita, na dob tinontuhon-Ni hinan domu hubani sura-sura-Ni, ai ma Naibata sipasaud haganupan ai, domu hubani rosuh ni uhur-Ni,
12 ase tarpuji hasangapon-Ni marhitei hita, na dob mangarap hinan bani Kristus in.
13 Anjaha ibagas Ia do nasiam dob ibogei nasiam hata hasintongan in, ai ma Ambilan Na Madear pasal haluahon nasiam, anjaha ibagas Ia dob porsaya nasiam Bani, ilak nasiam marhitei Tonduy Na Pansing na pinarbagah-bagah in,
14 ai ma sikoram ni siteanonta in, bahen haluahon ni na hinopkop-Ni, ase tarpuji hasangapon-Ni in.
15 Ase ahu pe, dob hubogei pasal haporsayaon nasiam bani Tuhan Jesus ampa holong ni uhur nasiam bani haganup halak na pansing in,
16 seng maronti ahu mangkatahon tarima kasih halani nasiam, mardingat nasiam, sanggah na martonggo ahu,
17 andohar ibere Naibata ni Tuhanta Jesus Kristus, Bapa ni hasangapon in bani nasiam Tonduy hapentaron ampa pangungkabon, laho mananda-Si.
18 Sai ipalihar Naibata ma mata ni uhur nasiam, ase ibotoh nasiam aha do arta siarapkononkon halani pandiloon-Ni ai, anjaha sonaha surung ni hasangapon, siteanon na hun Bani, bani halak na mapansing in;
19 anjaha sonaha sulur ni habanggalon ni kuasa-Ni in banta na porsaya halani horja hagogohon na surung in,
20 na hinorjahon-Ni bani Kristus, sanggah na pinapuho-Ni ai Ia humbani na matei, anjaha ipahundul hu siamun-Ni i nagori atas,
21 hu atas ni sagala harajaon ampa kuasa ampa hagogohon ampa hamuliaon, ampa haganup goran na targoran, seng pitah i dunia on, tapi dihut do bani na roh magira.
22 Haganup do ipatunduk hu toruh ni nahei-Ni, anjaha ipabangkit do Ia gabe kopala ni haganup, bani kuria in,
23 in ma angkula-Ni, hagogok-Ni, na manggoki haganup ibagas haganup.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA