Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu, ojo kagananya lima mbengi, kepala nto pampue to bae angganya, i Ananias, pasi sawei mba’a tau tu’a nto Yahudi yau seja lo’u kota Kaisarea sindarandara pei samba’a ketua ada to sanganya i Tertulus. Rata la’u ria sira yau mampotango i Gubernur Peliks. Panewa sira manganto’oka gubernur etu pampobuuka nsira mangkonong sala i mPaulus.
2 Roo see i Paulus rapokio mampotango to pobotus, panewa i Tertulus mula magombo mampakasala ia, to’onya, “Pa’a Gubernur anu ra’angga! Apa saba pomarenta ngkomi see naka kami masanang kojo katuwu mami si’i-si’i, tare masimusu bara anu to yusa to mampakasusa. Pasi yako ri songka ngkomi to pande see naka boros palaong to mawali to mampakatao bansa mami.
3 Wali samparia to naika mpomarenta ngkomi mangansawang kami juku ri tana mami etu kami sangkani masanang mangantima pasi kami taa seja mangkalingan manganto’oka komi tarima matao kojo.
4 Pei kami taa rani mangantalas Pa’a Gubernur masae kojo, see naka aku mamporapika resi komi see komi damampodongeka kojo gombo mami ri kanoto ndayamu pei ojo sangkodija temponya.
5 “Wali ane ewa ri pampobuuka mami tau si’i tau to sangkani mangarotai sa’e. Ia mangika rotai ri oyo nto Yahudi ri sambawo lino. Pasi ia samba’a ketua ntau to mangaluluka aliran to rato’oka aliran nto Nasaret.
6 Pei si’a ojo to etu salanya, ia re’e seja mampeyaa mangkarikasika banua i mPue Allah, wali kami mangansoko ia. Kami re’e songka damangabotus ia singkonong ewa porenta mami,
7 pei kepala ntentara, i Lisias, ia ma’i mampoja’a kojo kami panewa mangoko yau i Paulus.
8 Panewa i Lisias etu manganto’oka tau to rani mampakasala i Paulus ma’i damampotango komi. Wali ane komi mampotanaka resi i Paulus panewa komi damanasa mangkonong samparia palaong to kami room mampakasalaka ia etu.”
9 Wali ojo karoonya i Tertulus magombo etu, panewa to Yahudi to nja’u nja’u ria sira seja mampakasala i Paulus pei manganto’o monso pu’u to nato’o i nTertulus etu.
10 Yako etu i Gubernur mangkawes i Paulus see ia damagombo. Wali i Paulus magombo, ia manganto’o, “Aku masanang kojo manganto’o notongku ri tango komi, Pa’a, apa aku kunsani komi malagi nto’umo mawali to pobotus nu bansa si’i.
11 Wali komi maya mampakanasa wo’u resi tau to yusa, Pa’a, aku tawa masae kojo, owo sampuyu pei dua mbengi liu aku nayau nto’u Yerusalem damampue ri banua i mPue Allah.
12 Tempo etu tau si’i tare kojo mangarata aku masibanta resi sa’e bara mangarotai tau boros. Aku taa kojo re’e mangika palaong to ewa wetu ri raya banua i mPue Allah bara ri raya banua napampotunde nto Yahudi bara ri raya ngkota etu.
13 Pasi tau si’i taa seja nakurang mampakatantuka komi mangkonong palaong to nato’o nsira mampakasala aku etu.
14 Pei re’e sanjaya to aku mampongakung resi komi, Pa’a, etu semo aku mampue mampakabae i Pue Allah anu napakabae nu bue-bue mami. Tempo aku mampue mampakabae i Pue Allah etu, aku mampue singkonong pei Jaya to nato’o i Yesu. Jaya etu nato’oka ntau aliran. Pei aku tiroo seja kuaya samparia to ratulis ri raya mporenta i Musa pasi to natulis nto pantuntu tuntu i mPue Allah tempo owi.
15 Pasi pansarumakangku resi i Pue Allah sewaju pei pansarumaka ntau to mampakasala aku si’i. Apa aku seja mangampeas temponya i Pue Allah damangawangu muni samparia tau to matem, etu semo tau to lengkonya singkonong pei i Pue Allah pasi tau to maja’a seja.
16 Wali see naka aku sangkani mampakadota kojo mangika lengko to singkonong pei i Pue Allah see rayangku tare mangepe sala ri tangoNya pasi ri tango nto lino.
17 “Wali aku bara sawei nto’u taa rata ri Yerusalem, pei roo see aku nayau muni ri Yerusalem mangangkenika yunungku to Yahudi sora to nawaika nsa’e sira pasi aku mangkeni seja pampue dakupampueka resi i Pue Allah.
18 Tongo-tongonya aku mangkeni pampuengku etu, tau si’i mangarata aku ri raya banua i mPue Allah. Tempo sira mangarata aku etu aku room mampakayongongika korongku mangalulu ada mami. Pasi tempo etu tare tau boros sindara pei aku pasi taa seja re’e tau to marotai.
19 Ojo re’e bara sawei mba’a to Yahudi to yako ri propinsi Asia to nja’u nja’u ria tempo etu. Wali to tao-tao sira semo ma’i mampotango komi pei mampakasala aku ane bara re’e salangku to nakitanaka nsira.
20 Pei ane taa ma’i sira, biakamo tau si’i semo manganto’o salangku to narata nsira tempo aku mampotango to pobotus nto Yahudi seore.
21 Kamonsonya tare salangku, ojo gombongku semo to mampakaja’a raya nsira tempo aku makore ri tango nsira seore. Apa tempo etu aku maroso loongku manganto’o, ‘Apa saba aku mangaya tau mate darawangu muni, see naka aku rabotus ri tango ngkomi seo si’i.’”
22 Wali ojo karoonya i Paulus manganto’o notonya etu, i Peliks manganto’oka samparia tau yau muni ruyu, apa ia mangansani kojo mangkonong Jaya to nato’o i Yesu. I Peliks manganto’oka tau etu, “Ane rata kepala ntentara, i Lisias, panewa aku damangabotus palaong si’i.”
23 Roo see ia manganto’oka kepala ntentara to satu, to’onya, “Jagai i Paulus pei ne’e rata’amaka kojo ia. Biaka ia malinja-linja sangkodi pasi biaka yununya mai mayunu resi ia pei mangkenika ia anu to danapake.”
24 Wali yako etu, ojo kagananya sawei mbengi, ma’i wo’u i Gubernur Peliks sindara-ndara pei rongonya, i Drusila. I Drusila etu to Yahudi. Wali ojo karata nsira dua, i Peliks mampokau tau yau damangkeni i Paulus damampotango sira apa ia rani mangandonge gombo i mPaulus mangkonong pangayanya resi i Kerisitu Yesu. Wali ojo karata i mPaulus ri tango nsira dua, ia mampogomboka sira mangkonong palaong etu.
25 Pasi ia magombo seja mangkonong lengko ntau to singkonong pei i Pue Allah, pasi mangkonong ewa wimba raika manta’amaka pamporani ndaya. Pasi tempo etu ia magombo seja mangkonong ewa wimba danaika i mPue Allah mangahuku to lino. Wali tempo i Peliks mangandonge gombonya etu, ia meka rayanya pei manganto’o, “Inta ruyu! Tempo yoa panewa aku damampokio wo’u korom.”
26 Pei tempo i Peliks mampokau yau i Paulus etu ia re’e seja mampobuuka, “Tuwu-tuwuja i Paulus damangawaika aku doi see aku damampasimbalika ia.” Wali see naka ia mandudu ngkani mampokio i Paulus damagombo-gombo.
27 Pei yako etu, ojo kagananya dua nto’u, i Peliks ia rabolosika yau i Perkius Pestus. Wali i Perkius Pestus semo to mawali gubernur. Pei tempo i Peliks tawa rabolos, tempo etu ia rani mampakasanang to Yahudi, wali see naka ia taa mangalapa i Paulus yako ri raya ntarungku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA