Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lima alona roo indo, Tadulako Menomba Mahile Ananias hai bahangkia tadulakonda to Yahudi lao i Kaisarea hihimbela hai hadua tauna au mapande mololita, hangana Tertulus. Kahawenda inditi, laomohe i lindona Gubernur Feliks mopahawe pesalainda.

² Gubernur Feliks motudumi tauna moanti Paulu i lindona, hai Tertulus rawei tempo mololita. Tertulus mepongka mopahawe pesalainda i Paulu, nauli: "Umangki Gubernur Feliks au kibila! Ikami, taunamu au bosa, tuwongkai hangko i kamaroana poparentamu Gubernur. Anti kamapandemu moparenta, maroa katuwongki i humalele tampoki ide.

³ Ope-ope ide kiwoli mpuu i tanoanangki, hai barangkai oha-oha mouli ngkaya kamaroana i Tua Gubernur.

⁴ Agayana, bona datingkai ngkaya motende mbero tempomu, kiperapi ahi hangko i Tua bona nupehadingi wongkoya lolitangku au sosoe ide.

⁵ Paulu ide mampopeahi-ahi ope-ope boea. Iumba pea, ia mohuweki lalunda to Yahudi moewa topoparenta. Hai ia idemi hadua tadulakonda tauna au mampeulai paturona Yesu to Nasare.

⁶ Apa mani, ia mampeinao mopakedai Souna Pue Ala. Ido hai kihakami. (Ara tunggaiaki hangkoya mampohuda-hudaa kara-karana moula atura agamangki.

⁷ Agayana tadulako surodado Lisias moala hoholiga hangko i tayengki.

⁸ Hai ia motudu bona hema au mampeinao mosalai hangangaa mai i Uma Gubernur.) Mewali, ane nuparesa deade, ina nuhadi mpuu hangko i humena katouna ope-ope lolitangki ide."

⁹ Ope-ope to Yahudi au ara inditi, meula worihe mosalai Paulu hai mampokana lolitana Tertulus iti.

¹⁰ Roo indo, Gubernur moonami tayena bona Paulu mololita. Mololitami Paulu, nauli: "Matana mpuuna, lawi raweina tempo mopahawe notongku i lindona Tua Gubernur. Lawi kuisa, i parenami kamahaena Gubernur mewali topobotusi i tampoki.

¹¹ Agina nuparesa lolitangku ide: hampulo pea hai rongalo au liu, laona i Yerusale menomba i Souna Pue Ala.

¹² Barana hambela ralambi mombehanai ba mohuweki lalunda tauna bosa i Souna Pue Ala ba i sou penombaa, ba iumba pea i lalu kota.

¹³ Bara wori ara hadua tauna au peisa mopatongawa katouna popahawenda inona au rasalaiana.

¹⁴ Agayana idemi au kupangaku i Tua: mampeulaina Paturona Pue Yesu au rasapuaka iwalingku. Moula paturo iti, menombana i Pue Ala au rapenombai toiyorungki hangkoya, hai batena kupoinalai ope-ope au teuki i lalu Aturana Musa hai Sura Nabi-Nabi.

¹⁵ Peharungangku i Pue Ala batena himbela hai peharunganda iwalingku ide: kupoinalai kaina arana tempo au napakanoto Pue Ala mopatuwo hule ope-ope tomate, maroa au manoto babehianda, maroa au kadake babehianda.

¹⁶ Ido hai mobabehi liliuna apa au maroa, bona kuisa i lalungku kadana ara apa-apa au peisa raraiana, maroa i peitana Pue Ala, maroa i peitana manusia.

¹⁷ Bahangkia parena, barana lao i Yerusale. Roo indo, lao hulena bona moantina doi petulungi i halalungku to Yahudi hai moantina popenombaku i Pue Ala.

¹⁸ Tangangku moanti popenombaku iti, bahangkia to Yahudi molambina i Souna Pue Ala. I tempo iti, roomona mobabehi ada pampobahoi wata moula ada agamangki. Bara bosa tauna au hihimbela hai iko, hai bara wori ara au mogewo-gewo.

¹⁹ Agayana arahe inditi bahangkia to Yahudi hangko i propinsi Asia. Katouana, keihira au hangangaa mai mosalaina i Tua Gubernur, ane ara mpuu salangku irihira.

²⁰ Agayana ihira bara ara inde. Mewali, agina iwalingku au ara inde mouli ide-ide apa kakadakengku au ralambi i karaparesangku hangkoya i lindona tadulako agama i Yerusale.

²¹ Batena pea lolitangku ide au rasalaiana hangkoya, kuuli masisimbuku i lindonda: 'Iko ide raparesa, lawi kupoinalai tauna au mate batena tuwo hule.'"

²² Gubernur Feliks moisa mpuu apa au rapoinalai to Sarani kana i Yesu. Ido hai nauli: "Hampai indemi hampai pohuda-hudaanta. Kubotusi rai kara-kara ide, ane hawe tadulako surodado Lisias."

²³ Roo indo, napohawaami tadulakonda surodado mokampai Paulu. Agayana nauri rakampai, bara nodo tauna au ratarunggu. Lawi ia peisa molulumao, hai rangana rapaliu mowei apa au naparaluu.

²⁴ Bahangkia alona hangko inditi, hawe worimi Gubernur Feliks hai towawinena, hangana Drusila. Drusila iti to Yahudi. Feliks motudumi surodadona moanti Paulu i lindonda, bona mampehadingihe Paulu mopahawe kana i pepoinalaina i Kerisitu Yesu.

²⁵ Paulu mololita i Feliks node: ikita hangangaa manoto babehianta, hai hangangaa tabuku mokuasai peundeana lalunta, lawi ina hawe Alo Pehukuna Pue Ala. Kanahadina Feliks lolita iti, langami, pane nauli: "Nodomi hampai! Laomoko! Kukakio peako deade, ane ara katepakangku."

²⁶ Katouana, naharunga Feliks kaina naweina Paulu doi bona rakabaha. Ido hai Paulu doko rakakio mololita hai ia.

²⁷ Anti kanapeinaona Feliks mangala lalunda to Yahudi, ido hai Paulu napogiangaa ratarunggu liliu. Liumi rompare, Feliks napahurumi Perkius Festus mewali gubernur.

Kisah Para Rasul

Video Kisah Para Rasul 24

Ikuti Kami:

KONTAK | PARTISIPASI | DONASI