Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Lima-mbongi kaliuna, Pakeni *nTopanggeni Pesomba nosanga i Ananias ante bara sako-ndua pakeni-pakeni ntoYahudi, notua hau ri ngata Kaisarea. Nikenira muni saito tona napande notesa nosanga i Tertulus. Ira nantingayo Gubernur Feliks, bo nipangaduaramo sala i Paulus.

² I Paulus nipokio mantingayo Gubernur Feliks, bo i Tertulus nompangadu i Paulus ivei: "Gubernur nibilaku. Kami todea riara pomparentamiu natuvu nasana. Lako ri kanotomiu nomparenta, nadeamo nipakabelo ri ngata kami.

³ Pura-pura panggaviamiu anu nompakabelo ngata kami hitu, nitarima kami nte damba rara. Ledo nabasa-basa kami nanguli tarima kasi.

⁴ Kami ledo madota masae gaga, Tua. Tapi nisani ntonamo kabelo raramiu, sampe kami merapi nte komiu ala raepemiu sampalai pangadua kami hitu.

⁵ Nikita kami i Paulus tuu topegado nadaa ntoto. Nipakagadona *toYahudi ri umba-umba ngata. Ia muni pakeni ntona nangoseaka pepatuduki i Yesus toNazaret.

⁶ Ledo aga haitu, tapi ia madota mompakaruto Banua nu Alatala. Haitumo sampe nisaka kamimo. [Patuju kami mombatangara ia mantuntuni atura-atura agama kami mboto.

⁷ Tapi tadulako, i Lisias nangago ia lako nte kami,

⁸ bo niparentana ala pura-pura topangadu kana mantingayo komiu.] Jadi, Gubernur nibilaku, ane raparesamiu tona tutu, tantu rasanimiu lako ri tesana mbotomo, pangadua kami hitu nakana."

⁹ ToYahudi ntanina ri sia nompangadu i Paulus muni, bo niulira tesa i Tertulus nakana mpuu.

¹⁰ Naupu haitu, gubernur haitu nombalaeraka palena ka i Paulus ala ia mesana. Jadi i Paulus nanguli, "Gubernur nibilaku. Nadamba raraku mombasaliku karoku ri sii ri ngayomiu, Tua, apa nisaniku komiu nompae-mpaemo najadi topotangara ri ngata hitu.

¹¹ Mamala rapekutanamiu mboto nte tona, aga sapulu rombongi kaliuna yaku nantende hau ri ngata Yerusalem hau metupu ri Banua nu Alatala.

¹² Ledo sanggania toYahudi haitu nanggava yaku nosinjanai, bara nompakagado todea ri Banua nu Alatala, bara ri banua-banua petupu, bara ri ngata.

¹³ Ledo muni namala ira mompopakita ka komiu pangaduara haitu nakana.

¹⁴ Tapi yaku kana mompangaku ri ngayomiu, yaku netupu nte Alatala nantuntuni pepatuduki i Yesus. Panguli ntoYahudi gahitu, pepatuduki haitu nasala. Tapi yaku bate-batena netupu nte Alatala anu nisomba ntotua kami nggaulu, bo nomparasaya pura-pura anu nitulisi riara Buku Atura Agama bo Buku Nabi-nabi.

¹⁵ Yaku nasimbayu ante toYahudi gahitu, yaku muni nanjarumaka Alatala mompakatuvu pura-pura tona lako ri kamatera, tona nanoa bo muni tona nadaa.

¹⁶ Haitumo sabana yaku nasaro nompasimbuku mokainggu nabelo ala ledo maria nuapa-nuapa nipoviaku masala ri panggita nu Alatala bara ri panggita nu manusia.

¹⁷ Nasaemo yaku nompalaisi ngata Yerusalem. Tapi dopa nasae hitu, yaku nanjili ri ngata Yerusalem nanggeni doi petulungi ka tona napakasi ri sia, bo muni yaku madota mombadekei pesombaku ka Alatala.

¹⁸ Tempo yaku da naria ri Banua nu Alatala nanggeni pesombaku nompakaupu *ada pompakagasa karoku, naria bara sako-ndua toYahudi lako ri propinsi Asia nanggava yaku. Ledo naria todea nosanggani-nggani ante yaku, bo ledo muni naria kagado tempo haitu.

¹⁹ Kakanana ira lako ri Asia kana maria muni ri sii mompangadu yaku ri ngayomiu ane maria mpuu pangaduara ka yaku.

²⁰ Tapi ira ledo ria ri sii, jadi aginamo tona ri sii anu nompangadu yaku, manguli pakalanto sala nuapa nikavara tempo yaku naria ri ngayo Polibu Mbaso Agama Yahudi.

²¹ Ledo naria sala nikavara, aga sambela tesa niuliku ri ngayora anu ledo nipokonora, ivei: 'Yaku nitangara eo hitu, sabana yaku nomparasaya tona namate kana matuvu mpanjili.'"

²² Jadi Gubernur Feliks nompopenonto polibu haitu apa nisanina mami pepatuduki i Yesus. Niulina, "Kupakaupu parakara hitu ane mariamo Tadulako Lisias ri sii."

²³ Naupu haitu niparentana balengga ntantara ala i Paulus batena rajagai. Tapi nau nijagai, ledo nitarunggu ntoto apa nidekeira ia nolipa-lipa sakide bo ledo nitagi roana nakava mantulungi ia.

²⁴ Bara sako-mbongi kaliuna, nanjilimo Gubernur Feliks nosanggani-nggani ante bereina nosanga i Drusila. I Drusila mai, toYahudi. I Feliks nantudu tona hau mangala i Paulus rakeni ri ngayona ala raepena i Paulus nombatentei pomparasayana i Yesus Kristus.

²⁵ I Paulus nanguli pokaingguta kana manoa, bo kita ledo mamala mangoseaka dota rarata nadaa, apa makava Eo Potangara ngena tempo Alatala mombatangara pura-pura manusia. Nangepe tesa i Paulus, naeka mpuumo i Feliks. Nanguli ia, "Ivesiamo ruru. Ane maria loga damo kupokio pade motesa vai kita."

²⁶ Kakanana nisarumaka i Feliksmo i Paulus mombadekei doi ka ia ala ia rakabasaka. Haitu sabana i Paulus nasaro nipokio i Feliks motesa-tesa ante ia.

²⁷ Rompae kaliuna, i Feliks nisambei, bo i Perkius Festus najadi gubernur ri bagia haitu. Tempo nolinja i Feliks, ia madota mangala rara ntoYahudi, jadi nipalambanamo i Paulus riara ntarunggu.

Kisah Para Rasul

Video Kisah Para Rasul 24

Ikuti Kami:

KONTAK | PARTISIPASI | DONASI