Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Wali i Paulus manganto’oka tau boros, “Pa’a-pa’a, a’i-a’i, padongeka kojo gombongku damanganto’o notongku si’i.”

² Wali ojo pandonge ntau boros i Paulus magombo ri raya basa nsira, basa Ibrani, sira tikurang wo’u to makanano. Panewa i Paulus manganto’o,

³ “Aku si’i to Yahudi. Pasi lipu kare’engku kota Tarsus nja’u propinsi Kilikia. Pei yako dakodiwa aku maroo ri Yerusalem si’i pasi aku seja maguru resi guru Gamaliel to na’angga kojo ntau boros. Ia semo to mampotundeka aku see aku mampalaika kojo porenta nu bue-bue ngkita. Wali aku madota seja mangalulu i Pue Allah sewaju ewa komi seo si’i.

⁴ Wali see naka seore aku mangansesai sampe mate tau to mangalulu Jaya to nato’o i Yesu. Nempo to langkai nempo to we’a aku mangansoko sira pasi mangantarungku.

⁵ Wali kepala nto pampue pasi samparia to pobotus nto Yahudi sira semo matamanasa mangkonong palaongingku etu. Apa sira semo to nangawaika aku sura kuasa see aku maya yau resi ja’i ngkita to Yahudi nja’u kota Damsyik. Wali tempo aku yau seore njo’u kota Damsyik etu, aku mansongka damangansoko tau to mangalulu i Yesu nja’u ria. Aku damampungu sira pasi mangkeni ma’i ri Yerusalem si’i darahuku.

⁶ “Pei ri raya mpalinjangku yau ri kota Damsyik etu, bara ntongo eo kami mosumo ri kota etu. Tempo etu kodi majoli rata reme to makilo kojo mangansindo aku.

⁷ Wali tempo aku mangkita reme etu aku mapuka yau ri wawo ntana pei mangandonge loo mampogomboka aku, loo etu manganto’o, ‘O Saulus, Saulus, maka pei korom mangansesai Aku?’

⁸ Wali aku mampotanaka, ‘Bara sema Komi, Pue?’ Panewa Ia mangansono, ‘Aku semo i Yesu to Nasaret, to nusesai ngkorom etu.’ Etu semo to nato’oka i Pue aku.

⁹ Wali yunungku to mangalulu aku, sira mangkita seja reme etu, pei sira taa mangandonge loo to mampogomboka aku etu.

¹⁰ “Wali yako etu aku mampotanaka, manganto’o, ‘Kesaa to dakuika, Pue?’ Panewa i Pue manganto’o, ‘Pambangumo pei inta njo’u kota Damsyik. Rata nja’u ria panewa korom darato’oka samparia songka i mPue Allah to korom damangika.’

¹¹ Wali ojo karoonya i Pue mampogomboka aku etu aku polas, pei aku buta naika nu reme to makilo kojo etu. See naka aku jamo nakentar nu yunungku rata ri kota Damsyik.

¹² “Wali nja’u Damsyik re’e samba’a tau to sanganya i Ananias. I Ananias etu ia ngkai to madota kojo mangalulu porenta i Musa pasi ia na’angga kojo nto Yahudi samparia to maroo nja’u ria.

¹³ Wali tempo etu i Ananias ma’i resi aku pei makore ri awengku. Ia manganto’o, ‘O Saulus, a’ingku, loka matamu!’ Wali ri tempo etu semo aku mangkita muni rao pasi aku mangkita seja i Ananias.

¹⁴ “Roo see i Ananias manganto’o, ‘I Pue Allah anu napue nu bue ngkita, Ia room mangampilis korom damangansani pamporaniNya. Ia mangampilis korom damangkita i Yesu anu to singkonong pei i Pue Allah, pasi mangandonge looNya mampogomboka korom.

¹⁵ Wali korom damawali matamanasaNya to damampakarebaka samparia tau anu to nukita pasi to nudonge ngkorom.

¹⁶ Wali kesaa wo’u to nupeas ngkorom? Pambangu pei rabaptis. Porapika resi i Pue see korom daralapas yako ri dosamu.’ Ewa see gombo i Ananias resi aku seore.

¹⁷ “Wali yako etu re’e seore aku mawolili muni ri Yerusalem si’i. Rata rire aku yau makai-kai ri raya banua i mPue Allah. Tongo mpokaikaingku etu aku re’e mangkita pangkitangku.

¹⁸ Ri raya mpangkitangku etu aku re’e mangkita i Pue Yesu mampogomboka aku, manganto’o, ‘Ne’e rapeas, pei pakajoli piyai yako ri kota Yerusalem si’i apa tau rire taa damangaya gombomu mangkonong Aku.’

¹⁹ “Wali aku manganto’o, ‘Pue, sira damangaya kojo, apa sira mangansani kojo lengkongku tempo seore. Sira mangansani ewa wimba nikangku masua ri rayanya samparia banua to napampotunde nto Yahudi pei mangantarungku pasi mangantidas tau to mangaya Komi.

²⁰ Ewa see seja tempo matamanasa ngKomi, i Stepanus, rapopate yau. Tempo etu aku re’e seja mangalo’aka. Aku singkonong pei palaong to etu pasi aku semo to mangajagai pake ntau to mampopate yau ia. Wali ane sira mangandonge aku mampakarebaka sira mangkonong Komi si’i-si’i, palaong to etu damampakaipu raya nsira see naka sira damangaya.’ Ewa see aku manganto’oka i Pue Yesu.

²¹ “Pei Ia manganto’oka wo’u aku, ‘Inta, apa Aku damampokau korom njo’u longko resi tau to si’a to Yahudi.’ Etu semo gombo i mPue Yesu resi aku.”

²² Wali ojo pandonge ntau boros gombo i mPaulus manganto’o ia nayau resi tau to si’a to Yahudi, sira mawali makanano wo’u pasi tamo mampodongeka gombonya apa sira maja’a nakita tau to si’a to Yahudi. Sira maroso loonya sakaboo, sira manganto’o, “Pate yaumo tau si’i! Tamo masipato ia tuwu!”

²³ Tongonya sira sakaboo ewa wetu sira mangantajika bajunya nto’u rao pasi sira mangkaku awu ntana pei mansambuetaka seja nto’u rao apa maja’a kojo rayanya.

²⁴ Wali ojo pangkita ngkepala ntentara to sansowu kaborosinya tau boros maja’a kojo rayanya etu, ia mampokauka joanya mangkeni i Paulus njo’u raya banua nsira daraparesa. Ia manganto’oka sira mangansamparika i Paulus kayoro sampe rata temponya ia mampongakung sala to inikanya to mampakaja’a raya ntau boros naka pei sira sakaboo mampoja’a ia etu.

²⁵ Wali joa ngkepala ntentara etu mangampungu i Paulus pei ri katawanya ia rasampar, i Paulus mampogomboka kepala ntentara to mangkepalang tentara to satu kaborosinya, to makore ri awenya, ia manganto’o, “Wimba, bara nawaika mpomarenta komi mangansampar to Roma ane tawa rabotus?”

²⁶ Wali ojo pangandonge ngkepala ntentara gombo i mPaulus etu, ia yau resi kepala to si ia pei manganto’o, “Pakatao kojo to nuika ngkomi, Pa’a, apa tau etu to Roma!”

²⁷ Wali kepala ntentara to sansowu etu yau resi i Paulus panewa mampotanaka resi ia, to’onya, “To’oka aku, bara monso pu’u korom to Roma?” I Paulus mangansono, “Monso pu’u.”

²⁸ Wali kepala ntentara etu manganto’o, “Gete, aku bae kojo doi to ibayarikangku panewa aku mawali to Roma.” Sono i mPaulus, “Pei aku yako ri kare’engku to Roma semo.”

²⁹ Wali yako etu tau to damangansampar i Paulus mangamparesa ia etu, sira mansaka mampiyaika ia. Pasi kepala ntentara to mangampunguka i Paulus rante ngena, ia meka rayanya mampobuuka ia roomo mangampungu to Roma, apa palaong to etu mangewa porenta nto Roma.

³⁰ Wali kepala ntentara etu rani kojo mangansani sabanya to monso naka pei to Yahudi mampakasala i Paulus. Wali see naka eo rao wo’u ia mampotuu resi kepalakepala nto pampue pasi resi samparia to pobotus see sira dasiromu. Pasi ia mampokauka tau yau mangalapa i Paulus pei mangkeni ia mampotango tau to siromu etu.

Kisah Para Rasul

Video Kisah Para Rasul 22

Ikuti Kami:

KONTAK | PARTISIPASI | DONASI